କନକ ବ୍ୟୁରୋ: ମୃତ ଜ୍ୟୋତିପ୍ରକାଶଙ୍କ ପରିବାରକୁ ମିଳିବ ସହାୟତା । ରିଲିଫ୍ କୋଡ୍ ଅନୁସାରେ ଜ୍ୟୋତିପ୍ରକାଶଙ୍କ ପରିବାରବର୍ଗକୁ ୪ ଲକ୍ଷ ଟଙ୍କାର ଅନୁକମ୍ପା ରାଶି ଦିଆଯିବ । ଏନେଇ ସୂଚନା ଦେଇଛନ୍ତି ମନ୍ତ୍ରୀ ଅଶୋକ ଚନ୍ଦ୍ର ପଣ୍ଡା । ଭୁବନେଶ୍ୱର ନାଳରେ ଭାସିଯାଇଥିବା ଯେଉଁ ଜ୍ୟୋତିପ୍ରକାଶ ପାଇଁ ଓଡ଼ିଶାବାସୀ ପ୍ରାର୍ଥନା କରୁଥିଲେ ସେ ଡାକ ଭଗବାନ ଶୁଣିଲେନି । ମରଣଯନ୍ତା ପାଲଟିଥିବା ମୁକୁଳା ଡ୍ରେନରେ ଚାଲିଯାଇଛି ଜ୍ୟୋତିର ଜୀବନ । ଶେଷରେ ୧୯ ଘଂଟା ଅପରେସନ ପରେ ଆଜି ସକାଳେ ମୃତ ଦେହ ଠାବ କରିଛି ଅଗ୍ନିଶମ ବାହିନୀ । ଭୁବନେଶ୍ୱର ପଂଚଶଖା ନଗର ମୁଖ୍ୟ ଡ୍ରେନ ନିକଟ ବୁଦା ଭିତରୁ ନିଖୋଜ ଛାତ୍ର ଜ୍ୟୋତି ପ୍ରକାଶଙ୍କ ମୃତ ଦେହ ଉଦ୍ଧାର ହୋଇଛି । ପରେ ପୋଷ୍ଟମର୍ଟମ ପାଇଁ ଭୁବନେଶ୍ୱରର ଏମ୍ସ ହସ୍ପିଟାଲକୁ ନିଆଯାଇଛି ।
Kanak News is now on WhatsApp
Join and get latest news updates delivered to you via WhatsApp
ଅନ୍ୟପଟେ ଉଦ୍ଧାର ମୃତ ଦେହକୁ ଦେଖି ପରିବାର ଲୋକ ଚିହ୍ନିଛନ୍ତି କିନ୍ତୁ ଜନ୍ମ କରିଥିବା ମା’ ଆଉ ନିଜକୁ ସମ୍ଭାଳି ପାରୁନି । କେମିତି ବା ସମ୍ଭାଳିବ, ଯେଉଁ ହାତରେ ଦିନକ ପୂର୍ବରୁ ଖୁଆଇ ଦେଉଥିଲେ ସେ ହାତରେ ତା’ ମୃତ ଦେହକୁ କେମିତି ଧରିବ ଜଣେ ମା? ଆଖିରେ ଧାର ଧାର ଲୁହକୁ ଚାପି ଛାତିପିଟି କାନ୍ଦୁଛନ୍ତି ପରିବାର ଲୋକେ । ଏମିତିକି ପୁଅର ମୃତଦେହକୁ ଦେଖି ବାରମ୍ବାର ହସ୍ପିଟାଲରେ ଅଚେତ୍ ହୋଇଯାଉଛନ୍ତି ଜ୍ୟୋତିଙ୍କ ମା’ ।
ତେବେ ଗତକାଲି ଅପରାହ୍ନ ସମୟରେ ଭୁବନେଶ୍ୱରରେ ପ୍ରବଳ ବର୍ଷା ହୋଇଥିଲା । ବର୍ଷା ଛାଡ଼ିବା ପରେ ଟ୍ୟୁସନ ପାଇଁ ବାହାରିଥିଲେ ଜ୍ୟୋତିପ୍ରକାଶ । ରାସ୍ତା ବୁଡ଼ି ଯାଇଥିବାରୁ ମା’ ଟ୍ୟୁସନ ଯିବାକୁ ବାରଣ କରିଥିଲେ । କିନ୍ତୁ ଏକ ପ୍ରୋଜେକ୍ଟ କାମ ସାରି ସାଙ୍ଗେ ସାଙ୍ଗେ ଫେରି ଆସିବେ ବୋଲି କହିଥିଲେ ଜ୍ୟୋତି ପ୍ରକାଶ । ମାତ୍ର ବାଟରେ ମୁକୁଳା ଡ୍ରେନ୍ ମୃତ୍ୟୁ ଫାଶ ହୋଇ ବସିଥିଲା ବୋଲି ଜାଣିନଥିଲେ ଜ୍ୟୋତି । ଶେଷରେ ସେହି ମୁକୁଳା ଡ୍ରେନ୍ ତାଙ୍କ ମୃତ୍ୟୁର କାରଣ ପାଲଟିଲା ।