ଡ୍ରଗ୍ସ ମାମଲାରେ ଆରୟନ ଖାନଙ୍କୁ ମିଳିଲାନି ବେଲ । ସେସନ କୋର୍ଟରେ ପୁଣି କରିବେ ଆବେଦନ
କନକ ବ୍ୟୁରୋ: ମନ୍ନତରେ ବିଳାସ ବ୍ୟସନରେ ଯାହାର ଦିନ କଟୁଥିଲା, ସେ ଏବେ ଜେଲର କୋଠରୀରେ ଦିନ କାଟିବେ । ବହୁ ମୂଲ୍ୟ ଶଯ୍ୟାରେ ଯିଏ ଆରାମରେ ଶୋଉଥିଲେ, ସେ ଏବେ ଚଟାଣରେ ଶୋଇବେ । ଯାହାକୁ ମନପସନ୍ଦର ଖାଦ୍ୟ ପରସା ଯାଉଥିଲା, ସେ ଏବେ ଜେଲର ଖାଦ୍ୟ ଖାଇବେ । ବଲିଉଡ ବାଦଶାହା ଶାହରୁଖଙ୍କ ପୁଅ ଆରୟନଙ୍କ ପାଇଁ ଏବେ ନୂଆ ଠିକଣା ପାଲଟିଛି ମୁମ୍ବାଇର ଆର୍ଥର ରୋଡ ଜେଲ୍ ।
Kanak News is now on WhatsApp
Join and get latest news updates delivered to you via WhatsApp
କୋର୍ଟରେ ଏନସିବି ପକ୍ଷରୁ ଯୁକ୍ତି ଦର୍ଶାଯାଇଥିଲା ଯେ, ଯଦି ଆରୟନଙ୍କୂୁ ଜାମିନ ମିଳେ, ତାହେଲେ ତଦନ୍ତରେ ହସ୍ତକ୍ଷେପର ଭୟ ରହୁଛି । ତେଣୁ ମୁମ୍ବାଇର କିଲା କୋର୍ଟରେ ଜାମିନ୍ ଆବେଦନ ଖାରଜ ପରେ ଆରୟନଙ୍କୁ ଜେଲକୁ ପଠାଦିଆଯାଇଛି । ତେବେ ଜେଲରେ ଆରୟନଙ୍କୁ ଏବେ ପ୍ରଥମେ ୩ରୁ ୫ ଦନ ସଙ୍ଗରୋଧରେ ରହିବାକୁ ହେବ । ଗୁରୁବାର ଆରୟନଙ୍କୁ ୧୪ ଦିନିଆ ବିଚାର ବିଭାଗୀୟ ହାଜକୁ ପଠାଇ ଦେଇଥିଲେ କୋର୍ଟର୍ ।ଅବଶ୍ୟ ଏବେ ଆରୟନଙ୍କ ଓକିଲ ସେସନ କୋର୍ଟରେ ଜାମିନ ପାଇଁ ଆବେଦନ କରିବେ । ତେବେ ଏହି ଆବେଦନର ଶୁଣାଣି ହେବା ଯାଏଁ ଆରୟନଙ୍କୁ ଆର୍ଥର ଜେଲର ଏକ ନମ୍ବର ବାରାକରେ ହିଁ ରହିବାକୁ ହେବ । ଯଦିଓ ଅନ୍ୟ କଏଦୀଙ୍କ ପରି ତାଙ୍କୁ ୟୁନିଫର୍ମ ପିନ୍ଧିବାକୁ ପଡ଼ିବନି, ତେବେ ଅନ୍ୟ କଏଦୀଙ୍କ ପରି ତାଙ୍କୁ ମଧ୍ୟ ଚଳିବାକୁ ହେବ । ଜେଲର ଖାଦ୍ୟ ଖାଇବାକୁ ପଡ଼ିବ ।
ସୂଚନାଯୋଗ୍ୟ ଯେ, ୨୩ ବର୍ଷୀୟ ଆରୟନଙ୍କୁ ୫ ଅକ୍ଟୋବରରେ ଗିରଫ କରିଥିଲା ଏନସିବି । ଗିରଫ ବେଳେ ତାଙ୍କ ନିକଟରୁ କୋକେନ ଓ ଚରସ ପରି ନିଶା ଦ୍ରବ୍ୟ ଜବତ ହୋଇଥିବା ଦାବି କରିଆସୁଛି ନାର୍କୋଟିକ୍ସ କଣ୍ଟ୍ରୋଲ ବ୍ୟୁରୋ । ଏହାସହ ଜଣେ ଅନ୍ତର୍ଜାତୀୟ ଡ୍ରଗ୍ସ ଡିଲରଙ୍କ ସହ ଆରୟାନ ଚାଟ କରିଥିବା କଥା ମଧ୍ୟ ଏନସିବି କହିଛି । ହେଲେ ଆରୟନଙ୍କ ଓକିଲ ଏହି ସବୁ ଅଭିଯୋଗକୁ ଖଣ୍ଡନ କରିଆସୁଛନ୍ତି । ଏନସିବି ଏହି ମାମଲାରେ ଏଯାଏଁ ମୋଟ୍ ୧୮ ଜଣଙ୍କୁ ଗିରଫ କରିସାରିଛି ।