ପ୍ରଧାନମନ୍ତ୍ରୀଙ୍କ ସହ ବୈଠକ ବେଳେ ଦିଲ୍ଲୀ ମୁଖ୍ୟମନ୍ତ୍ରୀଙ୍କ ଦାବି : କହିଲେ, ଦେଶର ଅକ୍ସିଜେନ୍ ପ୍ଲାଂଟକୁ ନିୟନ୍ତ୍ରଣକୁ ନେଉ ସେନା
ଅକ୍ସିଜେନ ଅଭାବ ଦେଖାଦେଲେ କାହାକୁ ଜଣାଇବେ ବୋଲି କଲେ ପ୍ରଶ୍ନ; ବୈଠକରେ ରାଜନୀତି କରୁଥିବା କେନ୍ଦ୍ରର ଅଭିଯୋଗ
କନକ ବ୍ୟୁରୋ : ୧୦ଟି ସର୍ବାଧିକ ସଂକ୍ରମିତ ରାଜ୍ୟର ମୁଖ୍ୟମନ୍ତ୍ରୀଙ୍କ ସହ ଆଲୋଚନା କରିଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି । କରୋନାର ଦ୍ରୁତ ସଂକ୍ରମଣ ଓ ହସ୍ପିଟାଲ ବେଡରୁ ଆରମ୍ଭ କରି ଅକ୍ସିଜେନ୍ ସିଲିଣ୍ଡରର ଅଭାବ ଅଭିଯୋଗ ଭିତରେ ସ୍ଥିତିର ସମୀକ୍ଷା କରିଛନ୍ତି ମୋଦି । ତେବେ ମୁଖ୍ୟମନ୍ତ୍ରୀ ମାନଙ୍କ ସହ ଚର୍ଚ୍ଚାବେଳେ ଅତ୍ୟନ୍ତ କ୍ଷୋଭ ପ୍ରକାଶ କରିଛନ୍ତି ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲ । ଦେଶରେ ଅକ୍ସିଜେନ୍ ପ୍ଲାଂଟଗୁଡିକୁ ସେନା ନିଜ ନିୟନ୍ତ୍ରଣକୁ ନେବା ଦରକାର ବୋଲି ସେ ପ୍ରସ୍ତାବ ଦେଇଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ସେହିପରି ଦିଲ୍ଲୀର ଅନୁରୋଧ କ୍ରମେ କେନ୍ଦ୍ର ସରକାର ଅକ୍ସିଜେନ କୋଟା ବୃଦ୍ଧି କରିବାକୁ ସେ ପ୍ରଧାନମନ୍ତ୍ରୀଙ୍କୁ କୃତଜ୍ଞତା ଜଣାଇଛନ୍ତି । ତଥାପି ଏହା ପର୍ଯ୍ୟାପ୍ତ ନୁହେଁ ବୋଲି ଅଭିଯୋଗ କରିଛନ୍ତି କେଜ୍ରିୱାଲ । ସେହିପରି ଅକ୍ସିଜେନର ଅଭାବ ଦେଖାଦେଲେ ଓ ଜରୁରିକାଳୀନ ସ୍ଥିତିର ମୁକାବିଲା ପାଇଁ ତୁରନ୍ତ ଅକ୍ସିଜେନ ଆବଶ୍ୟକ ପଡିଲେ ସେ କେନ୍ଦ୍ରରେ କାହାକୁ ଫୋନ କରି ଜଣାଇବେ ବୋଲି ବୈଠକରେ ପ୍ରଶ୍ନ କରିଛନ୍ତି । ଏପରିକି ଦିଲ୍ଲୀକୁ ଆସୁଥିବା ଅକ୍ସିଜେନ ଟ୍ରକକୁ ଅନ୍ୟ ରାଜ୍ୟରେ ଅଟକାଇ ଦିଆଗଲେ କାହାକୁ ଆପତି କରିବେ ବୋଲି ପଚାରିଛନ୍ତି । ଏହାକୁ ନେଇ କେନ୍ଦ୍ର ସରକାର ତୀବ୍ର ପ୍ରତିକ୍ରିୟା ପ୍ରକାଶ କରିଛନ୍ତି ।
ପ୍ରଧାନମନ୍ତ୍ରୀଙ୍କ ସହ ହୋଇଥିବା ଗୁରୁତ୍ୱପୂର୍ଣ୍ଣ ବୈଠକକୁ କେଜ୍ରିୱାଲ ରାଜନୈତିକ ଉଦ୍ଦେଶ୍ୟରେ ବ୍ୟବହାର କରିଥିବା ଅଭିଯୋଗ ହୋଇଛି । ସେହିପରି ବୈଠକରେ କଣ ଆଲୋଚନା ହେଲା ତାକୁ ସାର୍ବଜନୀନ କରି ଦିଲ୍ଲୀ ମୁଖ୍ୟମନ୍ତ୍ରୀ ଏହାର ଗୋପନୀୟତା ନିୟମକୁ ଉଲ୍ଲଂଘନ କରିଛନ୍ତି । କେନ୍ଦ୍ରର ଏଭଳି ଆପତି ପରେ ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲ ପ୍ରଧାନମନ୍ତ୍ରୀଙ୍କୁ କ୍ଷମା ମାଗିଥିବା ଜାତୀୟ ଗଣମାଧ୍ୟମରେ ଚର୍ଚ୍ଚା ହେଉଛି ।