କରୋନା ମୁକାବିଲା ପାଇଁ ତତ୍ପର ରାଜ୍ୟର ସମସ୍ତ ଜିଲ୍ଲା ପ୍ରଶାସନ । ରାୟଗଡା ସହରରେ ୧୪୪ ଧାରା ଜାରି, କେନ୍ଦ୍ରାପଡାରେ ଯାତ୍ରା ପରିବେଷଣ ଉପରେ ଲାଗିଲା ରୋକ ।
କନକ ବ୍ୟୁରୋ : କରୋନାକୁ କିଭଳି ମୁକାବିଲା କରାଯାଇପାରିବ ସେନେଇ ତତ୍ପର ହୋଇଉଠିଛନ୍ତି ରାଜ୍ୟର ସମସ୍ତ ଜିଲ୍ଲା ପ୍ରଶାସନ । କରୋନାର କୌଣସି ଔଷଧ ବାହାରିନଥିବାରୁ ସ୍ୱାସ୍ଥ୍ୟମନ୍ତ୍ରାଳୟର ନିର୍ଦ୍ଦେଶାବଳୀ ଅନୁଯାୟୀ କିଭଳି ଆୟତରେ ରଖାଯାଇପାରିବ ସେଥିପାଇଁ ବିଶେଷ ପଦକ୍ଷେପ ନେଇଛନ୍ତି । ବିଶେଷକରି ଭିଡକୁ ଏଡାଇବା ଉପରେ ଗୁରୁତ୍ୱ ଦେଇଛନ୍ତି ସ୍ଥାନୀୟ ପ୍ରଶାସନ ।
Kanak News is now on WhatsApp
Join and get latest news updates delivered to you via WhatsApp
କରୋନାକୁ ସରକାର ରାଜ୍ୟ ବିପର୍ଯ୍ୟୟ ଘୋଷଣା କରିବା ପରେ ମୁକାବିଲା ପାଇଁ ରାୟଗଡ଼ା ଜିଲ୍ଲା ପ୍ରଶାସନ ତରଫରୁ ବ୍ୟାପକ ପଦକ୍ଷେପ ନିଆଯାଇଛି । ସହରରେ ୧୪୪ ଧାରା ଜାରି କରାଯାଇଛି । ୧୦୦ ଲୋକରୁ ଅଧିକ ଜମା ହେବା ଉପରେ କଟକଣା ଲଗାଯାଇଛି । ଏହାଛଡା ବ୍ଲକସ୍ତରୀୟ ଅଧିକାରୀ ସିଏଚସି, ପିଏଚସିମାନଙ୍କର ଥିବା ଡାକ୍ତରଙ୍କୁ ବାହାରୁ ଆସୁଥିବା ଲୋକଙ୍କ ଉପରେ ନଜର ରଖିବାକୁ ନିର୍ଦ୍ଦେଶ ଦିଆଯାଇଛି ।
ସେହିପରି କୋରାପୁଟ ଜିଲ୍ଲା ପ୍ରଶାସନ ପକ୍ଷରୁ ଜରୁରୀକାଳିନ ପରସ୍ଥିତି ପାଇଁ ପ୍ରତ୍ୟେକ ପଂଚାୟତରେ ୧୦୦ ଲୋକ ରହିବା ପାଇଁ ଏକ ଗୃହ ଚିହ୍ନଟ କରିବାକୁ ଜିଲ୍ଲା ପ୍ରଶାସନ ପକ୍ଷରୁ ନିର୍ଦ୍ଦେଶ ଦିଆଯାଇଛି । ଜିଲ୍ଲାକୁ ଆସିଥିବା ବିଦେଶୀ ପର୍ଯ୍ୟଟକଙ୍କ ସ୍ୱାସ୍ଥ୍ୟ ପରୀକ୍ଷା କରାଯାଇଥିଲେ ମଧ୍ୟ ସେମାନଙ୍କ ଉପରେ କଡା ନଜର ରଖିବାକୁ ନିଷ୍ପତି ନିଆଯାଇଛି ।
ଖୋର୍ଦ୍ଧା ଜିଲ୍ଲାରେ କରୋନାର ମୁକାବିଲା ପାଇଁ ଅଂଟା ଭିଡିଛି ଜିଲ୍ଲା ପ୍ରଶାସନ । ବିଶେଷ କରି ସଚେତନତା ଓ ସତର୍କତା ଉପରେ ଜୋର ଦିଆଯାଇଛି । କେନ୍ଦ୍ରାପଡାରେ ମଧ୍ୟ କରୋନା ମୁକାବିଲା ପାଇଁ ଆଗୁଆ ପଦକ୍ଷେପ ନିଆଯାଇଛି । ଅଧିକ ଲୋକ ଏକାଠି ହେଉଥିବାରୁ ଯାତ୍ରା ପରିବେଷଣ ଉପରେ ରୋକ୍ ଲଗାଯାଇଛି । ଦେଶର ସର୍ବାଧିକ କରୋନା ସଂକ୍ରମିତ ହୋଇଥିବା ବାଣିଜ୍ୟକ ରାଜଧାନୀ ମୁମ୍ବାଇରେ ମଧ୍ୟ ଜନ ସମାଗମ ଉପରେ ରୋକ୍ ଲଗାଇବା ପାଇଁ ୧୪୪ ଧାରା ଜାରି କରିଛି ସ୍ଥାନୀୟ ପ୍ରଶାସନ ।