ସେନା ଯବାନଙ୍କୁ ମିଳିବ ସ୍ୱଦେଶୀ ସୁରକ୍ଷାକବଚ । ହାଡଭଙ୍ଗା ଶୀତରେ ସାଥୀ ସାଜିବ, ମାଇନସ ୫୦ ଡିଗ୍ରୀ ତାପମାତ୍ରାରେ ବି ଗରମ ଦେବ ।
କନକ ବ୍ୟୁରୋ : ସେନା ଯବାନଙ୍କ ପାଇଁ ସ୍ୱଦେଶୀ ସୁରକ୍ଷାକବଚ । ଥଣ୍ଡା ଅଞ୍ଚଳରେ ଚାଲୁଥିବା ଅପରେସନରେ ଯବାନଙ୍କ ପାଇଁ ସାଜିବ ବ୍ରହ୍ମାସ୍ତ୍ର । ପୂର୍ବ ଲଦାଖ, ଉତ୍ତର ସିକ୍କିମ, ହିମାଚଳ ପ୍ରଦେଶ, ଉତ୍ତରାଖଣ୍ଡ ଭଳି ଅଞ୍ଚଳରେ ନିୟୋଜିତ ଥିବା ଯବାନ ଏବେ ସ୍ୱଦେଶୀ ଗରମ କପଡା ପିନ୍ଧିବେ । ଏହି ଏକ୍ସଟ୍ରିମ ୱେଦର କ୍ଲଥିଙ୍ଗ୍ ସିଷ୍ଟମ କେବଳ ଆରାମ ପ୍ରଦାନ କରିବନି ବରଂ ଏହାର ରକ୍ଷାଣବେକ୍ଷଣ ମଧ୍ୟ ବେଶ ସହଜ । ଏହି ସ୍ୱତନ୍ତ୍ର ଗରମ ପୋଷାକର ଓଜନ ବହୁତ କମ ଥିବା ବେଳେ ଏହାକୁ ପିନ୍ଧି ସେନା ଯବାନ ମାନେ ବେଶ ସହଜରେ କାମ କରିପାରିବେ । ଡିଆରଡିଓ ଏହି ପୋଷାକ ତିଆରି କରିବାକୁ ୫ ସ୍ୱଦେଶୀ କମ୍ପାନିକୁ ଦେଇଛି ଏବଂ ଖୁବଶୀଘ୍ର ଏହାର ଉତ୍ପାଦନ ଆରମ୍ଭ ହେବ ।
![](https://cdn-icons-png.flaticon.com/512/2504/2504957.png)
Kanak News is now on WhatsApp
Join and get latest news updates delivered to you via WhatsApp
୨୦୨୦ରେ ପୂର୍ବ ଲଦାଖ ଅଞ୍ଚଳରେ ଚୀନ୍ ସେନା ସହ ମୁହାଁମୁହିଁ ସ୍ଥିତି ଉପୁଜିବା ପରେ ଭାରତ ଏଲଏସିରେ ୫୦ ହଜାର ଅତିରିକ୍ତ ଯବାନଙ୍କୁ ନିୟୋଜିତ କରିଛି । ତେବେ ଏତେ ସଂଖ୍ୟକ ଯବାନଙ୍କ ପାଇଁ ୨୦୨୦ରେ ଆମେରିକାରୁ ଗରମ ପୋଷାକ କିଣିଥିଲା ଭାରତୀୟ ସେନା । କିନ୍ତୁ ଚଳିତଥର ସ୍ୱଦେଶୀ ଗରମ ପୋଷାକ ବ୍ୟବହାର କରିବେ ସେନା ଯବାନ । ଏହି ସ୍ୱତନ୍ତ୍ର ଗରମ ପୋଷାକ ଶୂନରୁ ମାଇନସ ୫୦ ଡିଗ୍ରୀ ପର୍ଯ୍ୟନ୍ତ ତାପମାତ୍ରା ସମ୍ଭାଳିପାରିବ । ଡିଆରଡିଓ ଦ୍ୱାରା ପ୍ରସ୍ତୁତ କରଯାଇଥିବା ଏହି ୩ ଲେୟାର ବିଶିଷ୍ଟ ଗରମ ପୋଷାକ ସେନା ଯବାନଙ୍କ ପାଇଁ ଥଣ୍ଡାରେ ରକ୍ଷାକବଚ ସାଜିବ । ପ୍ରଥମ ଲେୟାର ପିନ୍ଧି ଯବାନ ବେଶ ଆରାମରେ ୧୫ ଡିଗ୍ରୀ ସେଲିସିୟସରେ କାମ କରିପାରିବେ । ସେହିଭଳି ୩ ଲେୟାରର ଗରମ ପୋଷାକ ପିନ୍ଧିଲେ ମାଇନସ ୫୦ ଡିଗ୍ରୀ ପର୍ଯ୍ୟନ୍ତ ଥଣ୍ଡା ସମ୍ଭାଳିହେବ । ଏହି ସ୍ୱତନ୍ତ୍ର ପୋଷାକକୁ ୱାଟରପ୍ରୁଫ୍ ଓ ୱିଣ୍ଡପ୍ରୁଫ୍ କରାଯାଇଛି । ଯାହାଦ୍ୱାରା ହିମାଳୟର ଉପରପାଶ୍ୱର୍ରେ ହେଉଥିବା ବରଫପାତ ଓ ଥଣ୍ଡା ପବନରୁ ରକ୍ଷା ପାଇପାରିବେ ସେନା ଯବାନ । ସବୁଠୁ ବଡ କଥା ହେଉଛି, ଏହି ଗରମ ପୋଷାକ ପିନ୍ଧି ସେନା ଯବାନ ମାନେ ବେଶ ସହଜରେ ନିଜର କାର୍ଯ୍ୟ କରିପାରିବେ ।
ଏହି ସ୍ୱତନ୍ତ୍ର ଗରମ ପୋଷାକ ବ୍ୟାକ୍ଟେରିଆନିରୋଧୀ । ତେଣୁ ଏହାକୁ ଧୋଇବାର ମଧ୍ୟ ଆବଶ୍ୟକତା ନାହିଁ । ଏହାର ଓଜନ ଏତେ କମ କରାଯାଇଛି ଯେ, ଯବାନ ମାନେ ବେଶ ସହଜରେ ନିଜର ଡ୍ୟୁଟି କରିପାରିବେ । ଆଉ ସବୁଠୁ ବଡ କଥା ହେଲା, ପୂର୍ବରୁ ସେନା ଯବାନଙ୍କ ପାଇଁ ବିଦେଶରୁ କିଣାଯାଉଥିବା ଗରମ ପୋଷାକର ଦର ଠାରୁ ଏହି ଗରମ ପୋଷାକର ଦର ମଧ୍ୟ ଯଥେଷ୍ଟ କମ ରହିଛି । ଆଉ ଏହାକୁ ଦେଶରେ ତିଆରି କରି ବିଦେଶୀ ମୁଦ୍ରା ବଞ୍ଚାଇପାରିବ ଭାରତ ।