ଜମ୍ମୁ-କାଶ୍ମୀରରୁ ଧାରା ୩୭୦ ହଟିବା ପରେ ଏବେ ମୋଦି ସରକାରର ନଜର ପିଓକେ ଉପରେ । ପିଓକେକୁ ପୁଣିଥରେ ହାସଲ କରିବା ସହ ଏହାକୁ ଭାରତରେ ସାମିଲ କରିବା ମୋଦି ସରକାରଙ୍କ ସବୁଠୁ ବଡ ଏଜେଣ୍ଡା ବୋଲି କେନ୍ଦ୍ରମନ୍ତ୍ରୀ ଜିତେନ୍ଦ୍ର ସିଂ କହିବା ପରେ ସେନା ମଧ୍ୟ ଆକ୍ସନ ମୋଡକୁ ଆସିଛି । ଯେକୌଣସି ପରିସ୍ଥିତିର ସାମ୍ନା କରିବାକୁ ସେନା ପ୍ରସ୍ତୁତ ବୋଲି କହିଛନ୍ତି ସେନାମୁଖ୍ୟ ବିପିନ୍ ରାୱତ । ସରକାର ଆଦେଶ ଦେବା ମାତ୍ରେ ସେନା ଆଗକୁ ବଢିବ ।
Kanak News is now on WhatsApp
Join and get latest news updates delivered to you via WhatsApp
ଏହାପୂର୍ବରୁ କେନ୍ଦ୍ରମନ୍ତ୍ରୀ ଜିତେନ୍ଦ୍ର ସିଂ ମୋଦି ସରକାରଙ୍କ ଦ୍ୱିତୀୟ ପାଳିର ୧୦୦ ଦିନର ସଫଳତାର କାହାଣୀ କହୁଥିବା ବେଳେ ପୁଣିଥରେ ପିଓକେ ହାସଲ କରିବା ଆମର ଆଗାମୀ ଏଜେଣ୍ଡା ବୋଲି କହିଥିଲେ । ଆଉ ଏହା କେବଳ ଯେ ବିଜେପି ଦଳର ଷ୍ଟ୍ରାଟେଜି ତାହା ନୁହେଁ ବରଂ ୧୯୯୪ରୁ ପୂରା ଦେଶ ଏହି ଦିନକୁ ଅନାଇ ବସିଛି । ଏପରିକି ୧୯୯୪ରେ ନରସିଂହ ରାଓ ସରକାରରେ ଏନେଇ ସର୍ବସମ୍ମତି କ୍ରମେ ଏକ ସଂକଳ୍ପ ମଧ୍ୟ ପାରିତ ହୋଇଥିଲା ।
ଗୋଟିଏ ପଟେ କେନ୍ଦ୍ରମନ୍ତ୍ରୀ ଓ ଅନ୍ୟପଟେ ସେନାମୁଖ୍ୟଙ୍କ ଏଭଳି ବୟାନ ଏବେ ପାକିସ୍ତାନରେ ବସିଥିବା ଇମ୍ରାନ ସରକାର ଛାତିରେ ଛନକା ଭରିଛି । ବାରମ୍ବାର ଯୁଦ୍ଧର ଧମକ ଦେଉଥିବା ପାକିସ୍ତାନ ପ୍ରଧାନମନ୍ତ୍ରୀ ଇମ୍ରାନ ଖାନ ଭାରତର ଏଭଳି ଆକ୍ରମଣାତ୍ମକ ଭଙ୍ଗୀ ଦେଖି ଭୟଭୀତ ହୋଇଛନ୍ତି । ପୂର୍ବରୁ ଧାରା ୩୭୦ ହଟିବା ପରେ ଇମ୍ରାନ ସରକାର ଯେଉଁ ମୁହଁ ଫୁଟାଣି ମାରୁଥିଲେ ସେଥିରେ ଏକପ୍ରକାର ପୂର୍ଣ୍ଣଚ୍ଛେଦ ପଡିଛି ।