ସୁଡଙ୍ଗ ଭିତରେ ମୃତ୍ୟୁକୁ ଦେଖି ମୁହଁମାଡି ପଡିଥିଲା ଜୀବନ । ଭୟ ଭିତରେ ଦେବଦୂତ ସାଜି ବଞ୍ଚିବାର ଭରସା ଦେଲେ ଯବାନ । ଉତ୍ତରାଖଣ୍ଡ ଜଳପ୍ରଳୟ ପରେ ଯବାନଙ୍କ ତ୍ୟାଗ ଦେଖି ଦେଶବାସୀ ନୁଆଁଇଲେ ମୁଣ୍ଡ ।
କନକ ବ୍ୟୁରୋ: ବାହାରେ ମାଡି ଆସୁଥିଲା ମୃତ୍ୟୁ, ଭିତରେ କିଛି ଜାଣି ନଥିଲା ଜୀବନ । ଇଏ ସେହି ସୁଡଙ୍ଗ ଯେଉଁଠି ଜୀବନକୁ ଘେରାବନ୍ଦୀ କରିଥିଲା ଯମ, କବଜା କରି ରଖିଥିଲା କାଦୁଅ ମିଶା ପାଣି । ଆଉ ମୃତ୍ୟୁର ଆଁରୁ ମୁକୁଳିବାକୁ ଛଟପଟ ହେଉଥିଲା ଜୀବନ । ଜଣେ କି ଦୁଇ ଜଣ ନୁହେଁ ଏକାଧିକ ଶ୍ରମିକ ବଞ୍ଚିବା ପାଇଁ ଚିତ୍କାର କରୁଥିଲେ । ବାସ୍ ଏତିକି ବେଳେ ନିଜ ଜୀବନକୁ ପାଣି ଛଡାଇ ପ୍ରଳୟର ପାଟି ଭିତରକୁ ଡେଇଁ ପଡିଥିଲେ ବୀର ଯବାନ । ଆଉ ମୃତ୍ୟୁର ଟନେଲରୁ ଜୀବନ ଟାଣି ଆଣିବାକୁ ଆରମ୍ଭ ହୋଇଥିଲା ଅପରେସନ…
Kanak News is now on WhatsApp
Join and get latest news updates delivered to you via WhatsApp
ପ୍ରକୃତି ତାଣ୍ଡବ ରଚିଯିବା ପରେ ସବୁଠି ପଡିଥିଲା ପ୍ରଳୟର ପଦଚିହ୍ନ, ବିପର୍ଯ୍ୟୟର ବିକଟାଳ ଦାଗ । ଘର, ଦ୍ୱାର, ଗାଁଗଣ୍ଡା, ବଡ ବଡ ପୋଲ ସବୁ ମାଟିରେ ମିଶିଯାଇଥିଲା । ଆଉ ସେହି ମୃତ୍ୟୁ ମିଶା ମାଟିର ଫାଶରେ ଫଶିଥିବା ଲୋକଙ୍କୁ ବଞ୍ଚାଇବାକୁ ଆଗେଇ ଯାଇଥିଲେ ଆଇଟିବିପିର ଯବାନ । ଏଇ ହେଉଛି ସେହି ସମୟର ଫଟୋ ଯେଉଁଠି ଜଣେ ଯବାନ କାଦୁଅ ଭିତରେ ପଶି ଟନେଲ ଭିତରକୁ ଯାଉଛନ୍ତି ଆଉ ସୁଡଙ୍ଗ ଭିତରେ ଫଶିଥିବା ଶ୍ରମିକଙ୍କୁ ଉଦ୍ଧାର ପାଇଁ ପ୍ରାଣମୂର୍ଚ୍ଛା ଉଦ୍ୟମ ଚଳାଇଛନ୍ତି ।
ତେବେ ଦୀର୍ଘ ସମୟର ଅପରେସନ ପରେ ତପୋବନ ନିକଟରେ ଥିବା ନିର୍ମାଣଧୀନ ଟନେଲ ଭିତରୁ ୧୬ ଜଣଙ୍କୁ ଉଦ୍ଧାର କରାଯାଇଥିଲା । ଆଉ ଇଏ ହେଉଛି ସେହି ଉଦ୍ଧାର ସମୟର ଭାବବିହ୍ୱଳର ଦୃଶ୍ୟ । ମୃତ୍ୟୁର ଗାତରୁ ଜୀବନକୁ ଛଡାଇ ଆଣିବା ପରେ ଜଣେ ଲୋକ କେମିତି ଖୁସିରେ ଆତ୍ମହରା ହେଉଛି ଆଉ ଦେବଦୂତ ସାଜିଥିବା ଯବାନଙ୍କୁ କେମିତି ହାତଯୋଡି ଶବ୍ଦହୀନ ଧନ୍ୟବାଦ ଜଣାଉଛି ତାହା ଏ ଦୃଶ୍ୟରୁ ବେଶ ବାରିହୋଇ ପଡୁଛି । ଖାଲି ସେ ନୁହେଁ ବରଂ ଉଦ୍ଧାର ପରର ଖୁସି ଯବାନଙ୍କ ମୁହଁରେ ହସ ହୋଇ ଫୁଟିଛି…
ରାତିସାରା ଚାଲିଥିଲା ଟନେଲ ଭିତରେ ଜୀବନ ଖୋଜା । ୧୬ ଜଣ ଉଦ୍ଧାର ପରେ ବି ଆଉ ୩୭ ଜଣ ଶ୍ରମିକ ଫଶିଥିବା ସୂଚନା ମିଳିବା ପରେ ଜେସିବି ଲଗାଇ ଚାଲିଥିଲା ଅପରେସନ । ହେଲେ ସେନାର ସବୁ ପ୍ରଚେଷ୍ଟା ବୃଥା ହୋଇଥିଲା । କାଦୁଅର ସ୍ତର ଏତେ ଅଧିକ ଯେ ଆଗକୁ ଯିବା ଅସମ୍ଭ ଥିଲା । ସେପଟେ ଉତ୍ତରାଖଣ୍ଡରେ ଉଦ୍ଧାରକାମ ତ୍ୱରାନ୍ୱିତ କରିବାକୁ ରାତାରାତି ଘଟଣାସ୍ଥଳରେ ପହଞ୍ଚିଥିଲା ଏନଡିଆରଏଫ, ଏସଡିଆରଏଫ, ଆର୍ମି । ଉଦ୍ଧାରକାମରେ ଆଇଟିବିପି ଯବାନଙ୍କ ସହ ମୋଟ ୨୫୦ ଯବାନ ସାମିଲ ହୋଇ ଟନେଲରେ ପଶିଥିଲେ ହେଁ ୧୦୦ ମିଟର ପରେ ଆଉ ଆଗକୁ ଯାଇହୋଇ ନଥିଲା । ସୁଡଙ୍ଗ ସାରା କାଦୁଅ ଓ ମଇଳା ଭର୍ତ୍ତି ଥିବାରୁ ଉଦ୍ଧାରକାମରେ ବାଧା ସୃଷ୍ଟି ହୋଇଥିଲା । ସେପଟେ କାଦୁଅର ଏ ଭୟଙ୍କର ସ୍ତର ଭିତରେ ଫଶିଥିବା ଶ୍ରମିକଙ୍କ ମୃତ୍ୟୁ ଆଶଙ୍କା ଅଧିକ ବଢିବଢି ଯାଉଛି । ତଥାପି ରାତିର ଅନ୍ଧାର ଭିତରେ ନୂଆ ଆଶା ନେଇ ଜୀବନ ଅଣ୍ଡାଳୁଛନ୍ତି ଯବାନ । କାଳେ କେଉଁଠି କିଏ ବଞ୍ଚିଯାଇଥିବେ । ସତରେ ଯବାନଙ୍କ ଏ ତ୍ୟାଗ ଆଗରେ ନଇଁଯାଉଛି ମୁଣ୍ଡ ।