ଆଇପିଏଲ ୨୦୨୧ : ସଚିନଙ୍କ ପୁଅ ଅର୍ଜୁନ କରିପାରନ୍ତି ଏଣ୍ଟ୍ରି, ନିଲାମୀରେ ଭାଗ ନେବାକୁ କରିଛନ୍ତି ରେଜିଷ୍ଟ୍ରେସନ ।
କନକ ବ୍ୟୁରୋ : ୨୦୨୧ ଆଇପିଏଲ ପାଇଁ ଆସନ୍ତା ଫେବ୍ରୁଆରୀ ୧୮ରେ ଖେଳାଳି ନିଲାମୀ ହେବ । ଏଥିପାଇଁ ମୋଟ ୧୦୯୭ ଜଣ ଖେଳାଳି ରେଜିଷ୍ଟ୍ରେସନ କରିଛନ୍ତି । କିଛି ପୁରୁଣା ଚେହେରା ନିଲାମ ପ୍ରକ୍ରିୟାରୁ ବାଦ୍ ପଡିଥିବା ବେଳେ କିଛି ନୂଆ ଚେହେରା ଏଣ୍ଟ୍ରି ମାରିଛନ୍ତି । ଆଉ ଏହି ନୂଆ ଚେହେରାଙ୍କ ମଧ୍ୟରୁ ଜଣେ ହେଉଛନ୍ତି ଅର୍ଜୁନ ତେନ୍ଦୁଲକର । କ୍ରିକେଟର ଭଗବାନ କୁହାଯାଉଥିବା ସଚିନ ତେନ୍ଦୁଲକରଙ୍କ ପୁଅ ଅର୍ଜୁନ ତେନ୍ଦୁଲକର ପ୍ରଥମଥର ପାଇଁ ଆଇପିଏଲର ନିଲାମୀ ପ୍ରକ୍ରିୟାରେ ଭାଗ ନେଇଛନ୍ତି । ଆଉ ସମସ୍ତଙ୍କର ନଜର ରହିଛି କେଉଁ ଟିମ୍ ଅର୍ଜୁନଙ୍କୁ କିଣିବ?
Kanak News is now on WhatsApp
Join and get latest news updates delivered to you via WhatsApp
ଯଦି ଆଇପିଏଲରେ ଅର୍ଜୁନ ଏଣ୍ଟ୍ରି ମାରନ୍ତି ତେବେ ଏଥିରେ ଆଶ୍ଚର୍ଯ୍ୟ ହେବାର କୌଣସି କାରଣ ନାହିଁ । କାରଣ ପୂର୍ବରୁ ଆଇପିଏଲର ସର୍ବାଧିକ ଥର ଚାମ୍ପିୟନ ହୋଇଥିବା ମୁମ୍ବାଇ ଇଣ୍ଡିଆନ୍ସର ନେଟ ବୋଲର ରହିଛନ୍ତି ଅର୍ଜୁନ । ଏପରିକି ଚଳିତ ଥର ମୁମ୍ବାଇ ପକ୍ଷରୁ ସୟଦ ମୁସ୍ତାକ ଅଲ୍ଲୀ ଟ୍ରଫି ମ୍ୟାଚ୍ ଖେଳିଛନ୍ତି ଅର୍ଜୁନ । ବାମହାତୀ ଦ୍ରୁତ ବୋଲର ଅର୍ଜୁନ ନିଜର ଏହି ପର୍ଦାପଣ ଟୁର୍ଣ୍ଣାମେଣ୍ଟରେ ସେଭଳି ଖାସ୍ ପ୍ରଦର୍ଶନ କରିପାରିନଥିଲେ । ୩ ଓଭର ବୋଲିଂ କରି ୩୪ ରନ୍ ବ୍ୟୟ କରି ମାତ୍ର ଗୋଟିଏ ୱିକେଟ ହାତେଇଥିଲେ ଅର୍ଜୁନ । ଆଉ ଏବେ ଆଇପିଏଲରେ ନିଲାମିରେ ନିଜ ନାଁ ରେଜିଷ୍ଟ୍ରେସନ କରିଛନ୍ତି ଅର୍ଜୁନ । ମିଳିଥିବା ସୂଚନା ମୁତାବକ, ନିଲାମରେ ନିଜର ବେସ୍ ପ୍ରାଇସ ଅର୍ଜୁନ ୨୦ ଲକ୍ଷ ଟଙ୍କା ରଖିଥିବା ବିଭିନ୍ନ ଗଣମାଧ୍ୟମରେ ପ୍ରକାଶ ପାଇଛି ।
କେବଳ ଅର୍ଜୁନ ନୁହେଁ ବରଂ ଆଉ ଜଣେ ଭାରତୀୟ ଖେଳାଳି ମଧ୍ୟ ଚଳିତ ଆଇପିଏଲ ନିଲାମୀରେ ନିଜ ନାଁ ରେଜିଷ୍ଟ୍ରେସନ କରିଛନ୍ତି । ସ୍ପଟ ଫିକ୍ସିଂ ମାମଲାରେ ବିସିସିଆଇ ଦ୍ୱାରା ବ୍ୟାନ୍ ହୋଇଥିବା ଶ୍ରୀସନ୍ଥ ଦୀର୍ଘ ୭ ବର୍ଷ ପରେ ପୁଣିଥରେ ଆଇପିଏଲ ନିଲାମୀରେ ନିଜ ନାଁ ସାମିଲ କରାଇଛନ୍ତି । ୩୭ ବର୍ଷୀୟ ଶ୍ରୀସନ୍ଥ ଚଳିତଥର କେରଳ ପକ୍ଷରୁ ସୟଦ ମୁସ୍ତାକ ଅଲ୍ଲୀ ଟି-୨୦ ମ୍ୟାଚ୍ ଖେଳିଥିବା ବେଳେ ପୁଣିଥରେ ଆଇପିଏଲକୁ ଫେରିବାକୁ ଚାହିଁ ବସିଛନ୍ତି । ୨୦୧୩ରେ ସ୍ପଟ ଫିକ୍ସିଂ ମାମଲାରେ ଶ୍ରୀସନ୍ଥଙ୍କୁ ବ୍ୟାନ୍ କରିଥିଲା ବିସିସିଆଇ । ତେବେ ୨୦୧୯ରେ ଶ୍ରୀସନ୍ଥଙ୍କ ଉପରୁ ଏହି ବ୍ୟାନ୍ ହଟାଯାଇଥିଲା ।
ସେହିଭଳି ବିଭିନ୍ନ ଦଳ ରିଲିଜ କରିଥିବା ଷ୍ଟାର ଖେଳାଳି ପୁଣିଥରେ ଆଇପିଏଲ ନିଲାମୀରେ ନିଜର ଭାଗ୍ୟ ପରୀକ୍ଷା କରିବାକୁ ଯାଉଛନ୍ତି । ଯେଉଁମାନଙ୍କ ମଧ୍ୟରେ ରହିଛନ୍ତି ହରଭଜନ ସିଂ, କେଦାର ଯାଦବ, ଗ୍ଲେନ ମ୍ୟାକ୍ସୱେଲ, ଷ୍ଟିଭ ସ୍ମିଥ, ଜାସନ ରୟ, ଆରୋନ ଫିଞ୍ଚଙ୍କ ଭଳି ବଡ ଚେହେରା ରହିଛନ୍ତି । ଚଳିତଥର ଆଇପିଏଲ ଭାରତରେ ଖେଳାଯିବା ନେଇ ଅଧିକ ସମ୍ଭାବନା ରହିଛି । ଗତଥର କରୋନା କଟକଣା ପାଇଁ ଦୁବାଇରେ ଖେଳାଯାଇଥିଲା ଆଇପିଏଲ ଟୁର୍ଣ୍ଣାମେଣ୍ଟ । ଖେଳାଳିଙ୍କୁ ରିଲିଜ କରିବା ପରେ କିଙ୍ଗସ ଇଲେଭନ ପଞ୍ଜାବ ସର୍ବାଧିକ ୫୩.୨୦ କୋଟି ଟଙ୍କା ସହ ନିଲାମୀ ପ୍ରକ୍ରିୟାକୁ ଓହ୍ଲାଇବ । ଅଧିକ ଟଙ୍କା ରହିଥିବାରୁ ମନପସନ୍ଦର ଖେଳାଳିଙ୍କୁ ଟିମରେ ସାମିଲ କରିବା ପାଇଁ ପଞ୍ଜାବ ପାଖରେ ସୁଯୋଗ ରହିବ ।