ସଚିନଙ୍କ ପୁଅ ଅର୍ଜୁନଙ୍କ ପାଇଁ ସୁବର୍ଣ୍ଣ ସୁଯୋଗ । ଅର୍ଜୁନଙ୍କ ପାଇଁ ଖୋଲିଲା ଆଇପିଏଲ ଗେଟ୍ । ଆଇପିଏଲ ନିଲାମ ପ୍ରକ୍ରିୟା ପାଇଁ ଯୋଗ୍ୟତା ହାସଲ କଲେ ଅର୍ଜୁନ ।

534

କନକ ବ୍ୟୁରୋ : ସଚିନଙ୍କ ପୁଅ ଅର୍ଜୁନଙ୍କ ପାଇଁ ସୁବର୍ଣ୍ଣ ସୁଯୋଗ । ଅର୍ଜୁନଙ୍କ ପାଇଁ ଖୋଲିଲା ଆଇପିଏଲ ଗେଟ୍୍ । ଏଥର ଅର୍ଜୁନ ତେନ୍ଦୁଲକରଙ୍କ ପାଖରେ ଆଇପିଏଲ ଖେଳିବାର ସୁଯୋଗ ରହିଛି । କାରଣ ଆଇପିଏଲ ନିଲାମ ପ୍ରକ୍ରିୟା ପାଇଁ ଯୋଗ୍ୟତା ହାସଲ କଲେ ମାଷ୍ଟର ବ୍ଲାଷ୍ଟର ସଚିନ ତେନ୍ଦୁଲକରଙ୍କ ପୁଅ ଅର୍ଜୁନ । ଆସନ୍ତା ଫେବ୍ରୁଆରୀ ମାସରେ ହେବାକୁ ଥିବା ଆଇପିଏଲ ନିଲାମ ପ୍ରକ୍ରିୟାରେ ସାମିଲ ହେବେ ଅର୍ଜୁନ । ଯଦି କେଉଁ ଦଳ ତାଙ୍କୁ କିଣନ୍ତି ତେବେ ୨୦୨୧ ଆଇପିଏଲରୁ ସେ ନିଜ କ୍ୟାରିୟର ଆରମ୍ଭ କରିବେ ।

ଅର୍ଜୁନ ଚଳିତ ସୟଦମୁସ୍ତାକ ଅଲ୍ଲୀ ଟ୍ରଫିରେ ମୁମ୍ବାଇ ପକ୍ଷରୁ ଡେବ୍ୟୁ କରିଛନ୍ତି । ଏହାସହ ସେ ତାଙ୍କ କ୍ୟାରିୟରରେ ପ୍ରଥମଥର ପାଇଁ କୌଣସି ସିନିୟର ଦଳରେ ଖେଳିବାର ସୁଯୋଗ ପାଇଛନ୍ତି । ସୟଦ ମୁସ୍ତାକ ଅଲ୍ଲୀ ଟ୍ରଫି ତାଙ୍କ ପାଇଁ ଆଇପିଏଲର ବାଟ ଖୋଲିଛି । ଯଦି ଆଗକୁ ଅର୍ଜୁନ ସୟଦମୁସ୍ତାକ ଅଲ୍ଲୀ ଟ୍ରଫିରେ ଭଲ ପ୍ରଦର୍ଶନ କରନ୍ତି ତେବେ ତାଙ୍କୁ ଆଇପିଏଲରେ ଖେଳିବା ଆହୁରି ସହଜ ହୋଇଯିବ ।

ସୟଦମୁସ୍ତାକ ଅଲ୍ଲୀ ଟ୍ରଫିରେ ମୁମ୍ବାଇ-ହରିୟାଣା ବିପକ୍ଷ ମ୍ୟାଚରେ ଅର୍ଜୁନଙ୍କୁ ଦେଖିବାକୁ ମିଳିଥିଲା । ଏହି ମ୍ୟାଚରେ ଅର୍ଜୁନ ମୁମ୍ବାଇ ପକ୍ଷରୁ ବ୍ୟାଟିଂ ପାଇଁ ଆସିଥିଲେ । ହେଲେ ଏହି ମ୍ୟାଚରେ ତାଙ୍କୁ ବ୍ୟାଟିଂ କରିବାକୁ ସୁଯୋଗ ମିଳିନଥିଲା । କିନ୍ତୁ ନିଜ ବୋଲିଂରେ ଭଲ ପ୍ରଦର୍ଶନ କରିଛନ୍ତି ଅର୍ଜୁନ । ଏହି ମ୍ୟାଚରେ ଅର୍ଜୁନ ୩ ଓଭର ବୋଲିଂ କରି ୩୪ ରନ ଦେବା ସହ ୧ ୱିକେଟ ନେଇଛନ୍ତି ।

ଅର୍ଜୁନ ତେନ୍ଦୁଲକର ହେଉଛନ୍ତି ଭାରତୀୟ କ୍ରିକେଟର କିମ୍ବଦନ୍ତୀ ଖେଳାଳି ସଚିନ ତେନ୍ଦୁଲକରଙ୍କ ପୁଅ । ସଚିନ କ୍ରିକେଟରେ ପଦାର୍ପଣ କରିବାର ପ୍ରାୟ ୩୨ ବର୍ଷ ପରେ ଏବେ ତାଙ୍କ ପୁଅ ସିନିୟର ଦଳରେ ଖେଳିବାର ସୁଯୋଗ ପାଇଛନ୍ତି । ଅର୍ଜୁନ ଭାରତୀୟ ଟିମକୁ ମଧ୍ୟ ନେଟ୍ସରେ ବୋଲିଂ କରିଛନ୍ତି । ଏହାସହ ୨୦୧୮ରେ ଶ୍ରୀଲଙ୍କା ଗସ୍ତରେ ସେ ୧୯ ବର୍ଷରୁ କମ ଭାରତୀୟ ଦଳରେ ସାମିଲ ଥିଲେ ।

Comments are closed.