କାମ ଦେଉନି ବିଜୁ ସ୍ୱାସ୍ଥ୍ୟ କଲ୍ୟାଣ ନୂଆ ସ୍ମାର୍ଟ କାର୍ଡ । କାର୍ଡ ଧରି ଆସିଥିବା ରୋଗୀଙ୍କୁ ଚିକିତ୍ସା ନକରି ଫେରାଇଦେଲା ଆପୋଲୋ ହସ୍ପିଟାଲ ।
କନକ ବ୍ୟୁରୋ : ଘରୋଇ ଡାକ୍ତରଖାନାରେ କାମ ଦେଲାନି ବିଜୁ ସ୍ୱାସ୍ଥ୍ୟ କଲ୍ୟାଣ ଯୋଜନାରେ ମିଳିଥିବା ନୂଆ ସ୍ମାର୍ଟ କାର୍ଡ । କାର୍ଡ ଧରି ଆସିଥିବା ରୋଗୀଙ୍କୁ ଚିକିତ୍ସା ସେବା ନଦେଇ ଫେରାଇ ଦେଇଛି ଆପୋଲୋ ହସ୍ପିଟାଲ । ସୁନ୍ଦରଗଡ଼ରୁ ଆସିଛି ଏପରି ଅଭିଯୋଗ । ଏବେ ପ୍ରଶ୍ନ, ନିୟମ ଭାଙ୍ଗୁଥିବା ଘରୋଇ ହସ୍ପିଟାଲ ପ୍ରତି କଡ଼ା ଆଭିମୁଖ୍ୟ ଦେଖାଇବ କି ସ୍ୱାସ୍ଥ୍ୟ ବିଭାଗ ।
Kanak News is now on WhatsApp
Join and get latest news updates delivered to you via WhatsApp
ରାଜ୍ୟରେ ସରକାରଙ୍କ ବିଜୁ ସ୍ୱାସ୍ଥ୍ୟ କଲ୍ୟାଣର ସ୍ମାର୍ଟ କାର୍ଡ ଥାଇ ମଧ୍ୟ ଘରୋଇ ଡାକ୍ତରଖାନାରେ ହନ୍ତସନ୍ତ ହୋଇଛନ୍ତି ହିତାଧିକାରୀ । ସ୍ତନ କର୍କଟରେ ପୀଡିତ ସୁନ୍ଦରଗଡ ଜିଲ୍ଲା କୁଚେଡେଗା ପଞ୍ଚାୟତ ପଣ୍ଡିଆପାଲିର ଚନ୍ଦ୍ରକାନ୍ତି । ରାଜ୍ୟ ସରକାରଙ୍କ ସ୍ମାର୍ଟ ହେଲଥ୍ କାର୍ଡ ପାଇବା ପରେ ଚିକିତ୍ସା ପାଇଁ ଆସିଥିଲେ ଭୁବନେଶ୍ୱରର ଆପୋଲୋ ହସ୍ପିଟାଲ । କିନ୍ତୁ କାର୍ଡ ଦେଖି ଡାକ୍ତର କହିଥିଲେ ଟଙ୍କା ନଦେଲେ ପରୀକ୍ଷା ହେବ ନାହିଁ । ବାଧ୍ୟ ହୋଇ ଟଙ୍କା ଖର୍ଚ୍ଚ କରି ବିଭିନ୍ନ ପରୀକ୍ଷା କରି ଘରକୁ ଫେରିଛନ୍ତି ଚନ୍ଦ୍ରକାନ୍ତି ।
ଜିଲ୍ଲା ମୁଖ୍ୟ ଚିକିତ୍ସାଧିକାରୀ ଆପୋଲୋ କର୍ତ୍ତୃପକ୍ଷଙ୍କୁ ଏକ ପତ୍ର ଲେଖି ଚନ୍ଦ୍ରକାନ୍ତିଙ୍କୁ ଚିକିତ୍ସା ପାଇଁ ରେଫର କରିଥିଲେ । କିନ୍ତୁ ଟଙ୍କା ଦେଇ ଚିକିତ୍ସିତ ହେବା ଘଟଣାକୁ ନେଇ ସେ କହିଛନ୍ତି ସମନ୍ୱୟ ଅଭାବରୁ ଏପରି ହୋଇଛି, ଆଗକୁ ଚନ୍ଦ୍ରକାନ୍ତି ସମ୍ପୂର୍ଣ୍ଣ ମାଗଣା ଚିକିତ୍ସା ପାଇବେ । ଅନ୍ୟପଟେ ସ୍ମାର୍ଟକାର୍ଡ ବଣ୍ଟନକୁ ପ୍ରହସନ କହି ସରକାରଙ୍କୁ ସମାଲୋଚନା କରିଛି ବିଜେପି ।
ନୂଆ ସ୍ମାର୍ଟ ହେଲଥ କାର୍ଡ ଜରିଆରେ ସିଧାସଳଖ ଅନୁବନ୍ଧିତ ଘରୋଇ ଡାକ୍ତରଖାନାରେ ଚିକିତ୍ସା ମିଳିବ ବୋଲି କହିଥିଲେ ସରକାର । ଏପରିକି କେହି ଯେପରି ସମସ୍ୟାରେ ପଡିବେନି ପ୍ରତି ଘରୋଇ ହସ୍ପିଟାଲରେ ସ୍ୱାସ୍ଥ୍ୟ ମିତ୍ର ନିଯୁକ୍ତ ହୋଇଛନ୍ତି । ଏବେ ପ୍ରଶ୍ନ ଉଠୁଛି, ସ୍ମାର୍ଟ କାର୍ଡ ଥିବା ସତ୍ତେ୍ୱ ସରକାରଙ୍କ ସହ ଅନୁବନ୍ଧିତ ଡାକ୍ତରଖାନା ମାଗଣା ଚିକିତ୍ସା କରିବାକୁ ମନା କରୁଛନ୍ତି କାହିଁକି? ହସ୍ପିଟାଲ୍ ବିରୋଧରେ ବାରମ୍ବାର ଅଭିଯୋଗ ଆସୁଥିଲେ ବି କାହିଁକି ପଦକ୍ଷେପ ଗ୍ରହଣ କରୁନାହାନ୍ତି ସରକାର ?