ରାଜଧାନୀ ରାସ୍ତାରେ ପାଣି ଜମିବାକୁ ନେଇ ଟ୍ୱିଟର ୱାର୍
ସାଂସଦ ଅପରାଜିତା ଷଡଙ୍ଗୀଙ୍କ ଟ୍ୱିଟକୁ ନେଇ ଟାର୍ଗେଟ କଲେ ବିଜେଡ଼ି ନେତ୍ରୀ ଶ୍ରୀମୟୀ ମିଶ୍ର; କହିଲେ ୨୦୦୬ରୁ ୨୦୦୯ ପର୍ଯ୍ୟନ୍ତ ବିଏମସି କମିଶନର ଥିବା ଅପରାଜିତାଙ୍କ କାମର ପରିଣାମ ଭୋଗୁଛନ୍ତି ସହରବାସୀ
କନକ ବ୍ୟୁରୋ : ଭୁବନେଶ୍ୱରରେ ପ୍ରବଳ ବର୍ଷା ଏବଂ ବର୍ଷା ପାଣିରେ ରାଜଧାନୀ ରାସ୍ତାରେ ପାଣିର ସୁଅ ଛୁଟିଛି । ଆଉ ଏହାକୁ ନେଇ ଆରମ୍ଭ ହୋଇଛି ଟ୍ୱିଟର ୱାର । ଗତକାଲି ପ୍ରଥମେ ଭୁବନେଶ୍ୱର ସାଂସଦ ଅପରାଜିତା ଷଡଙ୍ଗୀ ଟ୍ୱିଟ୍ କରି ବିଜେଡି ସରକାରକୁ କଟାକ୍ଷ କରିଥିଲେ । ୨୧ ବର୍ଷର ଶାସନ ପରେ ଏପରି କାହିଁକି ହେଉଛି ବୋଲି ପ୍ରଶ୍ନ କରିବା ସହ ପାଣିରେ ଉବୁଟୁବୁ ହେଉଥିବା ରାଜଧାନୀ ରାସ୍ତାର କିଛି ଫଟୋ ମଧ୍ୟ ସେ ପୋଷ୍ଟ କରିଥିଲେ ।
Kanak News is now on WhatsApp
Join and get latest news updates delivered to you via WhatsApp
ଏହା ପରେ ତାଙ୍କ ଟ୍ୱିଟରର ଜବାବ ଦେଇଥିଲେ ଭୁବନେଶ୍ୱରର ପୂର୍ବତନ ମେୟର ତଥା ବର୍ତମାନର ବିଧାୟକ ଅନନ୍ତ ଜେନା । ଆଉ ଏବେ ଓଟିଡିସି ଅଧ୍ୟକ୍ଷ ତଥା ବିଜେଡି ନେତ୍ରୀ ଶ୍ରୀମୟୀ ମିଶ୍ର ସାଂସଦ ଅପରାଜିତାଙ୍କୁ ଟାର୍ଗେଟ୍ କରିଛନ୍ତି । ଟ୍ୱିଟ୍ କରି ଲେଖିଛନ୍ତି, ୨୦୦୬ରୁ ୨୦୦୯ ପର୍ଯ୍ୟନ୍ତ ୩ ବର୍ଷ ବିଏମସି କମିଶନର ଦାୟିତ୍ୱରେ ଥିଲେ ଅପରାଜିତା ଷଡଙ୍ଗୀ । ନିଜ ଉନ୍ନତ ମସ୍ତିଷ୍କରେ ସେତେବେଳେ ଯେଉଁ ଭଲ କାମ କରିଥିଲେ ତାର ପରିଣାମ ଏବେ ସହରବାସୀଙ୍କୁ ଭୋଗିବାକୁ ପଡୁଛି । ବିଏମସି କମିଶନର ଭାବେ ତାଙ୍କ କାର୍ଯ୍ୟର ପ୍ରାୟଶ୍ଚିତ କରୁଛୁ ବୋଲି ଲେଖିଛନ୍ତି ଶ୍ରୀମୟୀ ମିଶ୍ର । ଏହା ପରେ ସାଂସଦ ଅପରାଜିତା ଷଡଙ୍ଗୀ ସାମ୍ବାଦିକ ସମ୍ମିଳନୀ କରି ଜବାବ ରଖିଛନ୍ତି । ଷ୍ଟାଣ୍ଡିଂ କମିଟିର ସୁପାରିଶକୁ କାହିଁକି ଗ୍ରହଣ କରାଗଲା ନାହିଁ ବୋଲି ସେ ପ୍ରଶ୍ନ କରିଛନ୍ତି । ଏହା ସହ ଅପରାଜିତା ଆଜି ଭୁବନେଶ୍ୱରର ବିଭିନ୍ନ ଅଂଚଳ ବୁଲି ସ୍ଥିତି ଅନୁଧ୍ୟାନ କରିଛନ୍ତି ।