ସର୍ଜିକାଲ ଷ୍ଟ୍ରାଇକ ରିଟର୍ଣ୍ଣସ : ଦ୍ୱିନ ଦ୍ୱିପ୍ରହରରେ ମିଆଁମାର ସୀମାରେ ପଶିଲେ, ୫ ଆତଙ୍କବାଦୀଙ୍କୁ ମାରିଲେ ଭାରତୀୟ କମାଣ୍ଡୋ

12

ଦେଶରେ ସର୍ଜିକାଲ ଷ୍ଟ୍ରାଇକକୁ ନେଇ ବିବାଦ ଓ ରାଜନୀତି ଥମି ନଥିବାବେଳେ ପୁଣି ଏକ ସର୍ଜିକାଲ ଷ୍ଟ୍ରାଇକ କରିଛି ଭାରତୀୟ ସେନା । ମିଳିଥିବା ସୂଚନା ଅନୁସାରେ ଭାରତୀୟ ସେନା ବୁଧବାର ଅପରାହ୍ନରେ ଏହି ଅପରେସନ କରିଛି । ସେନାର ଲଢୁଆ ଓ ପ୍ରଶିକ୍ଷିତ ୧୨-ପାରାକମାଣ୍ଡୋର ଜବାନ ମାନେ ମିଆଁମାର ସୀମାରେ ପଶି ନ୍ୟାସନାଲ ସୋସିଆଲିଷ୍ଟ କାଉନସିଲ ଅଫ ନାଗାଲାଣ୍ଡ ( ଖାପଲାଙ୍ଗ ଗୋଷ୍ଠୀ) (ଏନଏସସିଏନ-କେ) ର ଏକ ଶିବିରକୁ ଧ୍ୱଂସ କରିଦେବା ସହ ୫ ଜଣ ଆତଙ୍କବାଦୀଙ୍କୁ ମାରିଛନ୍ତି ।

କମାଣ୍ଡୋମାନେ ମିଆଁମାର ସୀମା ଭିତରକୁ ତିନି କିଲୋମିଟର ପଶି ସେଠାରେ ଥିବା ଏନଏସସିଏନ-କେର ସ୍ୱେଲୋ ନାମକ ଶିବିର ଉପରେ ଅତର୍କିତ ଆକ୍ରମଣ କରିଥିଲେ । ଏହା ଫଳରେ ୫ ଜଣ ଆତଙ୍କବାଦୀ ନିହତ ହେବା ସହ ଅବଶିଷ୍ଟ ଆତଙ୍କବାଦୀ ପଳାୟନ କରିଥିଲେ । କମାଣ୍ଡୋ ମାନେ ରକେଟ ଲଞ୍ଚର, ମୋର୍ଟାର, ଓ ଗ୍ରେନେଡ଼ରେ ସଜ୍ଜିତ ହୋଇ ମିଆଁମାର ସୀମା ମଧ୍ୟକୁ ପ୍ରବେଶ କରିଥିଲେ । ପାଖାପାଖି ଅପରାହ୍ନ ୨ଟାରେ ମିଆଁମାର ସୀମାର ୩ କିଲୋମିଟର ଭିତରକୁ ପଶିଥିଲେ । ଦୁଇ ଘଣ୍ଟାର ଏହି ଅପରେସନରେ ୫ ଜଣ ଆତଙ୍କବାଦୀଙ୍କୁ ନିପାତ କରିବାକୁ ସକ୍ଷମ ହୋଇଥିଲେ ଭାରତୀୟ କମାଣ୍ଡୋ । ଗତ ସପ୍ତାହରେ ନାଗାଲାଣ୍ଡର ମନ ଜିଲ୍ଲାରେ ଏହି ଏନଏସସିଏନ-କେର ଆତଙ୍କବାଦୀମାନେ ଗରିଲା ଆକ୍ରମଣ କରିବାରୁ ୨ଜଣ ଆସାମ ରାଇଫଲ ଜଓ୍ଵାନ ସହୀଦ ହୋଇଥିଲେ । ଏହାର ପ୍ରତିଶୋଧ ନେବାକୁ ସେନା ଏହି ସର୍ଜିକାଲ ଷ୍ଟ୍ରାଇକ କରିଥିବା ଜଣାପଡିଛି ।

ଏନଏସସିଏନ-କେ ସଂଗଠନ ପକ୍ଷରୁ ମଧ୍ୟ ଏହି ସର୍ଜିକାଲ ଷ୍ଟ୍ରାଇକକୁ ସ୍ୱୀକାର କରାଯାଇଛି । ଏଥିରେ ତାଙ୍କଗୋଷ୍ଠୀରେ କୈଣସି ସଦସ୍ୟ ମରିନାହାନ୍ତି । ଭାରତୀୟ ସେନା ଆସିବା ଆମେ ଆଗୁଆ ଜାଣିଦେବାରୁ ଗୁଳିବିନିମୟ ହୋଇଥିଲା ଓ ଭାରତୀୟ ସେନା ପଳାଇଯାଇଥିଲେ ବୋଲି ଏନଏସସିଏନ-କେ କହିଛି ।

ଅନ୍ତର୍ଜାତୀୟରୁ ଆରମ୍ଭ କରି ଜାତୀୟ ତଥା ରାଜ୍ୟର ୩୧୪ ବ୍ଲକରେ ଘଟୁଥିବା ପ୍ରତିଟି ଘଟଣା ଉପରେ ସମ୍ବାଦ ଓ କନକ ନ୍ୟୁଜ ଆପଣଙ୍କୁ ଦେଉଛି ୨୪ ଘଂଟିଆ ଅପଡେଟ | କରୋନାର ସଂକଟ ସମୟରେ ଆମେ ଲୋଡୁଛୁ ଆପଣଙ୍କ ସହଯୋଗ । ‘ସମ୍ବାଦ’ ଗ୍ରୁପର ଡିଜିଟାଲ ମିଡିଆକୁ ଆର୍ଥିକ ସମର୍ଥନ ଜଣାଇ ଆଂଚଳିକ ସାମ୍ବାଦିକତାକୁ ଶକ୍ତିଶାଳୀ କରନ୍ତୁ |

Comments are closed.