ଇଏ ବି ଜଣେ ଗୋପବନ୍ଧୁ: ବିଛଣାରେ ଶୋଇଛି ରୋଗୀଣା ସ୍ତ୍ରୀ, ହେଲେ ସେବା ଓ ସ୍ୱଚ୍ଛତାର ‘ସାରଥି’ ସାଜି ପରିବେଶକୁ ପରିଷ୍କାର ରଖୁଛନ୍ତି ବୁଲା ବିକାଳୀ
କନକ ବ୍ୟୁରୋ: ମିଶୁ ମୋର ଦେହ ଏ ଦେଶ ମାଟିରେ ଦେଶବାସୀ ଚାଲି ଯାଆନ୍ତୁ ପିଠିରେ… ଦେଶର ସ୍ୱରାଜ୍ୟ ପଥେ ଯେତେ ଗାଡ ପୂରୁ ତହିଁ ପଡି ମୋର ମାଂସ ହାଡ… ଉତ୍କଳମଣୀ ଗୋପବନ୍ଧୁ ଦାସଙ୍କ ଏ କଥାକୁ ସତ ପ୍ରମାଣିତ କରିଛନ୍ତି ରାୟଗଡା ଗୁଣପୁରର ଆଉ ଜଣେ ଗୋପବନ୍ଧୁ । ଘରେ ରୋଗୀଣା ସ୍ତ୍ରୀ ପଡିଛି, ଅଭାବ ଅସୁବିଧାରେ ପରିବାର ଚଳୁଛି ଆଉ ତାରି ଭିତରେ ସମାଜ ପାଇଁ ସ୍ୱପ୍ନ ଦେଖୁଛନ୍ତି, ପରିବେଶକୁ ସ୍ୱଚ୍ଛ ରଖିବାକୁ ସଂକଳ୍ପ ନେଇଛନ୍ତି ନିଆରା ମଣିଷ ସାରଥି ଶ୍ରୀରାମ ।
Kanak News is now on WhatsApp
Join and get latest news updates delivered to you via WhatsApp
ଦୀର୍ଘ ୧୩ ବର୍ଷ ତଳେ ଅର୍ଥାତ ୨୦୦୫ ମସିହାରେ ବଂଶଧାରା ନଦୀ ତୁଠକୁ ଆସିଥିବା ଜଣେ ବୃଦ୍ଧା ଅନାବନା ଗଛ ଲଟାରେ ଛନ୍ଦି ହୋଇ ତଳେ ପଡିଯାଇଥିଲେ । ଆଉ ତାଙ୍କୁ ସାରଥି ଉଦ୍ଧାର କରିବା ପରେ ବୃଦ୍ଧା ଜଣଙ୍କ ତାଙ୍କୁ ତୁଠ ସଫେଇ କରିବାକୁ ନେହୁରା ହୋଇଥିଲେ । ବାସ୍ ତା ପରଠାରୁ ଦୀର୍ଘ ତେର ବର୍ଷ ହେବ ବଂଶଧାରା ନଦୀର ସଫେଇ ଦାୟିତ୍ୱ ନିଜ ମୁଣ୍ଡକୁ ନେଇଛନ୍ତି ଶ୍ରୀରାମ ।
ସକାଳ ହେବା କ୍ଷଣି ହାତରେ ବାଲଟି ଓ ଛାଡୁ ଧରି ନଦୀ ତୁଠକୁ ସାଇକେଲରେ ବାହାରି ଯାଆନ୍ତି ଶ୍ରୀରାମ । ଆଉ ୪ ଘଣ୍ଟା ଧରି ତମାମ ତୁଠରେ ପଡିଥିବା ମଳ ଓ ଆଳିଆ ଆବର୍ଜନାକୁ ନିଜ ହାତରେ ସଫା କରନ୍ତି । ତେବେ ସେବାକୁ ସବୁକିଛି ଭାବି ଦେଇଥିବା ଏ ‘ସେବା ମଣିଷ’ ସମାଜ ପାଇଁ ନିଜ ଜୀବନକୁ ଉତ୍ସର୍ଗ କରିଦେଇଛନ୍ତି ।
ତେବେ ସ୍ୱଚ୍ଛତା ନିଶାରେ ପଡିଥିବା ଶ୍ରୀରାମ ସିମେଣ୍ଟ ଅଖା ଓ ପୁରୁଣା ଖବର କାଗଜ ବିକି ନିଜ ପରିବାର ପୋଷନ୍ତି । ଘରେ ତିନି ତିନିଟି ପିଲା ସହ ୧୧ ବର୍ଷ ହେବ ପତ୍ନୀ ପକ୍ଷାଘାତରେ ପୀଡିତ ଥିବାରୁ ଅଳ୍ପ ଆୟରେ ପରିବାର ଚଳାଇବା କଷ୍ଟକର ହେଇ ପଡୁଛି । ପରିବାରର ଆର୍ଥିକ ସ୍ଥିତି ଏତେ ସୁଦୃଢ ନଥାଇ ବି ସେ ଲୋକଙ୍କ ସେବା ସୁବିଧା ପାଇଁ ମାଗିଯାଚି ନଦୀ ଘାଟରେ ୩ଟି ମଣ୍ଡପ କରିଛନ୍ତି ।
ତେବେ ସ୍ୱଳ୍ପ ସମ୍ପତି ଥିବା ଶ୍ରୀରାମଙ୍କ ଏ ସ୍ୱଚ୍ଛତା ନିଶା ପାଇଁ ତାଙ୍କୁ ସବୁଆଡୁ ପ୍ରଶଂସା ମିଳୁଥିବା ବେଳେ ସ୍ଥାନୀୟ ଅଞ୍ଚଳ ପାଇଁ ଶ୍ରୀରାମ ସାଜିଛନ୍ତି ‘ସେବାର ମଣିଷ’ ।