ବଢିବ କି ଲକଡାଉନ ଅବଧି? କେଉଁ ଫର୍ମୁଲାରେ ଲକଡାଉନ ବଢାଇବେ କେନ୍ଦ୍ର ସରକାର, ମୋଦିଙ୍କ ବାର୍ତ୍ତା ଉପରେ ପୂରା ଦେଶର ନଜର ।
କନକ ବ୍ୟୁରୋ : ଓଡିଶା ସରକାର ଲକଡାଉନ ଅବଧିକୁ ଏପ୍ରିଲ ୩୦ ତାରିଖ ଯାଏଁ ବୃଦ୍ଧି କରିଛନ୍ତି । ହେଲେ ସାରା ଦେଶରେ କଣ ରହିବ ଲକଡାଉନର ଚିତ୍ର ସେନେଇ ଆସନ୍ତା କାଲି ହୋଇପାରେ ଏକ ବଡ ଘୋଷଣା । ଆସନ୍ତାକାଲି ସକାଳ ୧୦ଟାରେ ଦେଶବାସୀଙ୍କୁ ସମ୍ବୋଧିତ କରିବେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି । ଲକଡାଉନ ଅବଧି ବୃଦ୍ଧି ପ୍ରସଙ୍ଗରେ ପୂର୍ବରୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ସବୁ ରାଜ୍ୟର ମୁଖ୍ୟମନ୍ତ୍ରୀଙ୍କ ସହ ଆଲୋଚନା କରିଥିଲେ । ଏମିତିକି ଲକଡାଉନ ଅବଧି ବୃଦ୍ଧି ନେଇ ସଙ୍କେତ ବି ଦେଇଥିଲେ । ଆଉ ସେବେଠାରୁ ପୁରା ଦେଶ ମୋଦିଙ୍କ ବାର୍ତ୍ତାକୁ ଅପେକ୍ଷା କରିଛି । ଆଶା କରାଯାଉଛି କିଛି କଟକଣା କୋହଳ କରିବା ସହ ଲକଡାଉନ ଅବଧି ବୃଦ୍ଧି ନେଇ ଆସନ୍ତାକାଲି ପ୍ରଧାନମନ୍ତ୍ରୀ ଘୋଷଣା କରିପାରନ୍ତି ।
Kanak News is now on WhatsApp
Join and get latest news updates delivered to you via WhatsApp
ପ୍ରଧାନମନ୍ତ୍ରୀଙ୍କ କାର୍ଯ୍ୟାଳୟ ପକ୍ଷରୁ ଏହି ଟ୍ୱିଟ୍ ଆସିବା ପରେ ମଙ୍ଗଳବାର ମୋଦି ଦେଶକୁ ସମ୍ବୋଧନ କରିବା ସ୍ପଷ୍ଟ ହୋଇଛି । ୧୪ ଏପ୍ରିଲ ଦିନ ୧୦ଟାରେ ତାଲାବନ୍ଦର ଆଗାମୀ ରୂପରେଖ ନେଇ ଦେଶକୁ ସୂଚନା ଦେବେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି । ଗତ ଶନିବାର ମୁଖ୍ୟମନ୍ତ୍ରୀ ମାନଙ୍କ ସହ ଆଲୋଚନା ବେଳେ ତାଲାବନ୍ଦ ଅବଧି ବୃଦ୍ଧି କରିବାକୁ ଅଧିକାଂଶ ପ୍ରସ୍ତାବ ଆସିଥିଲା । ହେଲେ ଜୀବନ ସହ ଜୀବିକା ଜରୁରୀ ବୋଲି ପ୍ରଧାନମନ୍ତ୍ରୀଙ୍କ ପ୍ରତିକ୍ରିୟା ତାଲାବନ୍ଦ ବୃଦ୍ଧିର ଏକ ସୁନିୟନ୍ତ୍ରିତ ସ୍ୱରୂପ ଆଡକୁ ଇସାରା କରିଥିଲା ।
ମାର୍ଚ୍ଚ ୨୫ରୁ ଦେଶବ୍ୟାପୀ ୨୧ ଦିନିଆ ଲକଡାଉନ ଘୋଷଣା କରିଥିଲେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି । ଏପ୍ରିଲ ୧୪ ମଧ୍ୟରାତ୍ରୀରେ ପ୍ରଥମ ପର୍ଯ୍ୟାୟ ତାଲାବନ୍ଦ ଅବଧି ଶେଷ ହେଉଥିବାରୁ ମଙ୍ଗଳବାର ଏନେଇ ସରକାର ତାଙ୍କ ପରବର୍ତୀ ପଦକ୍ଷେପ ଘୋଷଣା କରିବେ । କିଭଳି ହେବ ପରବର୍ତୀ ଲକଡାଉନର ସ୍ୱରୂପ ସେନେଇ ଉଚ୍ଚ ପଦସ୍ଥ ଅଧିକାରୀମାନଙ୍କ ସହ ମାନଓ ମନ୍ଥନ କରୁଛି ପ୍ରଧାନମନ୍ତ୍ରୀଙ୍କ କାର୍ଯ୍ୟାଳୟ । ମିଳିଥିବା ସୂଚନା ଅନୁସାରେ ମଙ୍ଗଳବାର ମୋଦି ଦେଶବାସୀଙ୍କୁ ସମ୍ବୋଧନ କରିବେ । ଏବଂ କେନ୍ଦ୍ର ଗୃହ ସଚିବ ଅଜୟ ଭଲ୍ଲା ସରକାରଙ୍କ ଡ୍ରାଫ୍ଟ ରିପୋର୍ଟକୁ ଦେଶବାସୀଙ୍କ ଆଗରେ ରଖିବେ । ଅର୍ଥାତ କେଉଁ ଅଂଚଳରେ ତାଲାବନ୍ଦର କଟକଣା କେତେ ମାତ୍ରାରେ ରହିବ ସେନେଇ ବିସ୍ତୃତ ରୁପରେଖ ଦେବେ । ଯାହାକୁ ରାଇସିନା ହିଲ୍ସରେ ପିଏମଓ, ଅର୍ଥ, ଗୃହ ଓ ପ୍ରତିରକ୍ଷା ମନ୍ତ୍ରୀ ଏବଂ ମନ୍ତ୍ରାଳୟର ଅଧିକାରୀମାନେ ଚୂଡାନ୍ତ ରୂପ ଦେବେ ।
ଚର୍ଚ୍ଚା ହେଉଛି ଦେଶରେ ଦ୍ୱିତୀୟ ପର୍ଯ୍ୟାୟ ଲକଡାଉନକୁ ତିନିଟି ସ୍ତରରେ କରିବାକୁ ଚାହୁଁଛନ୍ତି କେନ୍ଦ୍ର ସରକାର । କରୋନା ସଂକ୍ରମିତଙ୍କ ହାରକୁ ନେଇ ଅଂଚଳ ଆଧାରରେ ସ୍ଥିର ହେବ ପ୍ରତ୍ୟେକ ସ୍ତର ।
ପ୍ରଥମ ସ୍ତର
– ଦେଶର ଯେଉଁ ୧୬୦ଟି ଜିଲ୍ଲାରେ କରୋନା ସଂକ୍ରମଣର ଗୋଟିଏ ବି ମାମଲା ଆସିନାହିଁ ତାକୁ ତାଲାବନ୍ଦରୁ ବାଦ ଦିଆଯାଇ ପାରେ ।
– କିନ୍ତୁ ଏସବୁ ଜିଲ୍ଲାରେ କରୋନା ଭୂତାଣୁ ଯେଭଳି ନପହଞ୍ଚିବ ସେନେଇ କେତେକ ସତର୍କତା ମୂଳକ ପଦକ୍ଷେପ ମଧ୍ୟ ଲାଗୁ ହୋଇପାରେ
ଦ୍ୱିତୀୟ ସ୍ତର
– ୫୦୦ରୁ କମ୍ କରୋନା ସଂକ୍ରମିତ ଥିବା ଜିଲ୍ଲା ଗୁଡିକରେ ନିୟନ୍ତ୍ରିତ ବ୍ୟବସାୟିକ କାରବାର ପାଇଁ ନିଆଯାଇପାରେ ପଦକ୍ଷେପ
– ନିଷିଦ୍ଧାଞ୍ଚଳ ଭିତରେ ରହି ସରକାରୀ ସଂସ୍ଥା କିମ୍ବା ଘରୋଇ ଉଦ୍ୟୋଗ ସେମାନଙ୍କ କାରବାର କରିବାକୁ ଅନୁମତି ମିଳିବ
ତୃତୀୟ ସ୍ତର
– ମହାରାଷ୍ଟ୍ର, ଦିଲ୍ଲୀ, ତାମିଲନାଡୁ ଓ କେରଳ ଭଳି ଅଧିକ ସଂକ୍ରମିତ ରାଜ୍ୟରେ ନିୟନ୍ତ୍ରିତ କାରବାରକୁ ଅନୁମତି ମିଳିବ
– ନିର୍ଦ୍ଦିଷ୍ଟ ଅଞ୍ଚଳରେ ଅଣସଂଗଠିତ ଆର୍ଥିକ କାରବାରକୁ ଅନୁମତି ଦେଇପାରନ୍ତି କେନ୍ଦ୍ର ସରକାର
ଗୋଟିଏ ସ୍ଥାନରେ ଅଳ୍ପ ସମୟ ପାଇଁ ଦୋକାନ ଖୋଲିବା କିମ୍ବା କାରବାର କରିବା ପାଇଁ ଅନୁମତି ଦେବ ସ୍ଥାନୀୟ ପ୍ରଶାସନ