ତୀବ୍ର ହେଉଛି ଚାଷୀର ସ୍ୱର : ନବନିର୍ମାଣ କୃଷକ ସଂଗଠନର ଜୟ କିଷାନ ସମାବେଶରେ ଯୋଗଦେବେ ଆନ୍ନା ହଜାରେ
କନକ ବ୍ୟୁରୋ : ଆସୁଛନ୍ତି ଆନ୍ନା ହଜାରେ । ତିନିଦିନିଆ ଓଡିଶା ଗସ୍ତରେ ଆସନ୍ତାକାଲି ଆସିବେ ଗାନ୍ଧିବାଦୀ ନେତା ଆନ୍ନା ହଜାରେ । ୨୩ ତାରିଖରେ ଜଗତସିଂହପୁରରେ ହେବାକୁ ଥିବା ସେ ଜୟ କିଷାନ ସମାବେଶରେ ସାମିଲ ହେବେ । ନବ ନିର୍ମାଣ ସଂଗଠନର ଦାବି ପ୍ରାଇସ୍, ପ୍ରେଷ୍ଟିଜ୍ ଓ ପେନସନ ନେଇ ନବକୃଷ୍ଣ ଚୌଧୁରୀଙ୍କ ରାଜ୍ୟସ୍ତରୀୟ ଜୟନ୍ତୀ ଅବସରରେ ଏହି ସମାବେଶ ଆୟୋଜିତ ହେଉଛି । ଏଥିରେ ଯୋଗଦେଇ ଆନ୍ନା ହଜାରେ ଉଦବୋଧନ ଦେବାର କାର୍ଯ୍ୟକ୍ରମ ରହିଛି ।
Kanak News is now on WhatsApp
Join and get latest news updates delivered to you via WhatsApp
ସେପଟେ ଗତ ଅକ୍ଟୋବର ୧୧ ତାରିଖରେ ନୂଆ ଦିଲ୍ଲୀ ଜନ୍ତରମନ୍ତରଠାରେ ନବନିର୍ମାଣ କୃଷକ ସଂଗଠନର ଜାତୀୟ ସମାବେଶରେ ଯୋଗ ଦେଇ ଚାଷୀ ଆନ୍ଦୋଳନକୁ ସମର୍ଥନ ଦେଇଥିଲେ । ଦେଶର ସବୁ ଅଂଚଳରେ ଚାଷୀ ସମସ୍ୟାନେଇ ତେଜୁଥିବା ଆନ୍ଦୋଳନକୁ ସେ ସମର୍ଥନ କରିବା ସହ ସାରାଦେଶ ଗସ୍ତ କରିବେ ବୋଲି ଘୋଷଣା କରିଥିଲେ ଆନ୍ନା । ଆସନ୍ତାକାଲି ଅପରାହ୍ନ ୧ଟା ବେଳେ ଭୁବନେଶ୍ୱରରେ ପହଂଚିବାର କାର୍ଯ୍ୟକ୍ରମ ରହିଛି । ବିମାନ ବନ୍ଦରରୁ ଆନ୍ନାଙ୍କୁ ସମ୍ବର୍ଧନା ଦେଇ ଏକ ବିଶାଳ ରାଲିରେ ରାଜ୍ୟ ଅତିଥି ଭବନକୁ ପାଛୋଟି ଅଣାଯିବ ବୋଲି ନବନିର୍ମାଣ କୃଷକ ସଂଗଠନ ପକ୍ଷରୁ ସୂଚନା ଦିଆଯାଇଛି ।
ସେଠାରେ ଅପରାହ୍ନ ୪ଟାରୁ ୫ଟା ୩୦ ପର୍ଯ୍ୟନ୍ତ ବିଭିନ୍ନ ରାଜନୈତିକ ନେତୃତ୍ୱ, ବିଶିଷ୍ଟ ଗଣମାଧ୍ୟମର ବରିଷ୍ଠ ସମ୍ପାଦକ ଓ ସାମ୍ବାଦିକ, ସ୍ୱେଚ୍ଛାସେବୀ ଅନୁଷ୍ଠାନ, ସାମାଜିକ କର୍ମୀଙ୍କ ସହ ଆନ୍ନା ହଜାରେ ଆଲୋଚନା କରିବାର କାର୍ଯ୍ୟକ୍ରମ ରହିଛି । ପରେ ସଂଧ୍ୟା ୬ଟାରେ ଭୁବନେଶ୍ୱର ସ୍ଥିତ କୃୁରବା ନାରୀ ମହଲରେ ସଂଗଠନର କର୍ମକର୍ତାଙ୍କୁ ଉଦବୋଧନ ଦେବେ । ପରଦିନ ୨୩ ତାରିଖ ସକାଳ ୯ଟା ୩୦ରୁ ବିଶାଳ ଶୋଭାଯାତ୍ରାରେ ଜଗତସିଂହପୁର ସମାବେଶ ଅଭିମୁଖେ ଆନ୍ନା ହଜାରେ ଯାତ୍ରା କରିବେ ଏବଂ ଏହି ସମାବେଶରେ ସେ ଉପସ୍ଥିତ ହଜାର ହଜାର ଚାଷୀଙ୍କୁ ଉଦବୋଧନ ଦେବାର କାର୍ଯ୍ୟକ୍ରମ ରହିଛି । ପରେ ଭୁବନେଶ୍ୱରକୁ ଫେରି ସଂଧ୍ୟା ୬ଟା ବେଳେ ସମ୍ବାଦିକ ସମ୍ମିଳନୀରେ ଯୋଗଦେବେ ଆନ୍ନା । ୨୪ ତାରିଖ ସକାଳୁ ସେ ପୁଣେ ଫେରି ଯିବେ ବୋଲି ଜଣାପଡିଛି ।