ସୁନୀତା କେଜ୍ରିୱାଲଙ୍କ ପରେ ସାମ୍ନାକୁ ଆସିଲେ ସଂଜୟ ସିଂଙ୍କ ପତ୍ନୀ ଅନୀତା । ବିଜେପିକୁ ଟାର୍ଟେଟ୍, ସ୍ୱାମୀଙ୍କ ଦାୟିତ୍ୱ ସମ୍ଭାଳିବାକୁ ଦେଲେ ସଂକେତ
କନକ ବ୍ୟୁରୋ : ଦିଲ୍ଲୀ ଅବକାରୀ ନୀତି ମାମଲାରେ ଆମ୍ ଆଦମୀ ପାର୍ଟି ସାଂସଦ ତଥା ଉତ୍ତର ପ୍ରଦେଶ ପ୍ରଭାରୀ ସଂଜୟ ସିଂ ଏବେ ଜେଲରେ ଅଛନ୍ତି । ହେଲେ ରବିବାର ଦିନ ଇଣ୍ଡିଆ ମେଣ୍ଟର ମହାରାଲିରେ ସଂଜୟ ସିଂଙ୍କ ପତ୍ନୀ ଅନୀତାଙ୍କୁ ପ୍ରଥମଥର ପାଇଁ ରାଜନୈତିକ କାର୍ଯ୍ୟକ୍ରମରେ ଦେଖିବାକୁ ମିଳିଥିଲା । ଏହି କାର୍ଯ୍ୟକ୍ରମରେ ଯୋଗ ଦେଇ ସେ କହିଛନ୍ତି କି, ଏବେ ଦେଶବାସୀଙ୍କ ସମର୍ଥନ ଆମପ୍ରତି ରହିଛି ଓ ଲୋକଙ୍କ ସମର୍ଥନକୁ ନେଇ ସେ ଆଗକୁ ବଢିବେ ।
Kanak News is now on WhatsApp
Join and get latest news updates delivered to you via WhatsApp
ଏକ ଜାତୀୟ ଗଣମାଧ୍ୟମ ସହ କଥାବାର୍ତ୍ତା ବେଳେ ଅନୀତା କହିଛନ୍ତି କି, ଇଣ୍ଡିଆ ମେଣ୍ଟର ମଞ୍ଚରେ ସମସ୍ତ ସହଯୋଗ ମିଳିଛି । ପ୍ରଥମରୁ ଯେଭଳି କାନ୍ଧରେ କାନ୍ଧ ମିଶାଇ ଆମେ ଚାଲୁଥିଲୁ ଏବେ ମଧ୍ୟ ମୁଁ ମୋ ସ୍ୱାମୀଙ୍କ ସହିତ ମିଶି ଚାଲୁଛି । ସେ ଜେଲରେ ଅଛନ୍ତି , ଏହାର ଅର୍ଥ ନୁହେଁ ଯେ ମୋ ସ୍ୱାମୀ ଦୁର୍ବଳ ବୋଲି ସେ କହିଛନ୍ତି ।
ଅନୀତା କହିଛନ୍ତି କି, ସଂଜୟ ସିଂ ଜେଲ ଯିବା ପରେ ତାଙ୍କର ସମସ୍ତ କାମ ସେ କରୁଛନ୍ତି । ଏହାସହ ସଂଜୟ ସିଂ ଯେଉଁ କାମ ଛାଡି ଯାଇଛନ୍ତି ତାହା ଲୋକଙ୍କ ସହ ମିଶି ଆଗକୁ କରିବେ ବୋଲି ସେ କହିଛନ୍ତି । ସଂଜୟ ସିଂ ଗତବର୍ଷ ଅକ୍ଟୋବର ୧୦ ତାରିଖରେ ଇଡି ଦ୍ୱାରା ଗିରଫ ହୋଇ ଜେଲରେ ଅଛନ୍ତି । ସମାନ ମାମଲାରେ ପ୍ରଥମେ ମନୀଷ ସିଶୋଦିଆ, ପରେ ସଂଜୟ ସିଂ ଓ ଏବେ ଅରବିନ୍ଦ କେଜ୍ରିୱାଲ ଗିରଫ ହୋଇ ଜେଲରେ ଅଛନ୍ତି ।
ଅନୀତା ସିଂ ଗଣମାଧ୍ୟମ ସହ କଥାବାର୍ତ୍ତା କରିବା ବେଳେ କହିଛନ୍ତି କି, ସଂଜୟ ସିଂ ଥିଲେ ଏହି କାର୍ଯ୍ୟକ୍ରମ ଆହୁରି ଜୋରଦାର ହୋଇଥାନ୍ତି । ସେ ଯେଉଁ ମଞ୍ଚରେ ଠିଆ ହୁଅନ୍ତି ସେଠାରେ ମାହୋଲ ଅଲଗା ପ୍ରକାରର ହୋଇଥାଏ । ଏବେ ଆମେ ବିରୋଧୀ ଏକତା ପାଇଁ ଏକଜୁଟ ହୋଇଛୁ ଓ ଏହି ମେଣ୍ଟକୁ ଏତେ ମଜବୁତ କରିବୁ କି, ମୋଦୀଜୀ ପଛକୁ ହଟିବାକୁ ବାଧ୍ୟ ହେବେ ।