ମଣିଷଙ୍କ ପରେ ଏବେ ପଶୁମାନଙ୍କୁ କରୋନା ଟିକା । ଆମେରିକାର ଚିଡିଆଖାନାରେ ବାଘ ଓ ଭାଲୁଙ୍କୁ ଦିଆଯାଉଛି ଭ୍ୟାକ୍ସିନ ।

କନକ ବ୍ୟୁରୋ : ସାରା ବିଶ୍ୱକୁ ବେହାଲ କରିଥିବା କରୋନା ବିରୋଧରେ ଟିକା ହିଁ ଏକମାତ୍ର ବିକଳ୍ପ ବୋଲି ବୈଜ୍ଞାନିକମାନେ ମତ ଦେଇଛନ୍ତି । ଏହି ମତକୁ ଗ୍ରହଣ କରି ସାରା ବିଶ୍ୱରେ ଏବେ ଜୋରଦାର ଟିକାକରଣ ଚାଲିଛି । କରୋନା ସଂକ୍ରମଣରେ ସବୁଠାରୁ ଅଧିଖ କ୍ଷତିଗ୍ରସ୍ତ ହୋଇଥିବା ଆମେରିକାରେ ଏବେ ୩୨ କୋଟିରୁ ଅଧିକ ଅର୍ଥାତ ମୋଟ ଜନସଂଖ୍ୟାର ୮୦ ପ୍ରତିଶତ ଲୋକଙ୍କୁ ଟିକା ଦିଆଯିବା ପରେ ପଶୁମାନଙ୍କୁ ଟିକା ଦେବାକୁ ଆରମ୍ଭ କରିଛନ୍ତି ଆମେରିକା ସରକାର । ଆମେରିକାର ଚିଡିଆଖାନାରେ ପଶୁ ମାନଙ୍କୁ କରୋନା ସଂକ୍ରମଣରୁ ରକ୍ଷା କରିବାକୁ ଟିକାକରଣ ଅଭିଯାନ ଆରମ୍ଭ ହୋଇଛି ।

ଆମେରିକାର ସେନଫ୍ରାନ୍ସିସ୍କୋ ଅଞ୍ଚଳରେ ଥିବା ଓଳଲାଣ୍ଡ ଚିଡିଆଖାନାରେ ପଶୁମାନଙ୍କୁ କରୋନା ନିରୋଧି ଟିକା ପ୍ରଦାନ କରାଯାଉଛି । ସେଠାରେ ପ୍ରଥମେ ବାଘ ଓ ଭାଲୁମାନଙ୍କୁ ଏହି ଟିକା ପ୍ରଦାନ କରାଯାଉଛି । ପଶୁମାନଙ୍କ ପାଇଁ ଏହି କରୋନା ଟିକା ଆମେରିକାର ନ୍ୟୁ ଜର୍ସି ସ୍ଥିତ ହେଲ୍ଥ କମ୍ପାନୀ ଜିଓଟିକ୍ ପ୍ରସ୍ତୁତ କରିଛି । ଓଳଲାଣ୍ଡ ଜୋ ତରଫରୁ କରାଯାଇଥିବା ଟ୍ୱିଟରେ କୁହାଯାଇଛି କି, ପଶୁମାନଙ୍କୁ ଟିକାକରଣ କରିବାକୁ ଜିଓଟିକ୍ ତରଫରୁ ୧୧ ହଜାର ଟିକା ଦାନ କରାଯାଇଛି । ଏହି ଟିକାକୁ ଦେଶର ୨୭ ଟି ରାଜ୍ୟର ୭୦ ଟି ଚିଡିଆଖାନାକୁ ପ୍ରଦାନ କରାଯିବ । ଏହି ଟିକାକୁ ପ୍ରାରମ୍ଭରେ ବାଘ, ଭାଲୁ, ନେଉଳ ମାନଙ୍କୁ ଦିଆଯିବ ବୋଲି କୁହାଯାଇଛି ।

ହେଲ୍ଥ କମ୍ପାନୀ ଜିଓଟିକର ଉପ ସଭାପତି ମହେଶ କୁମାର କହିଛନ୍ତି କି, ଗତବର୍ଷ ଯେତେବେଳେ ହଙ୍ଗକଙ୍ଗରେ ଗୋଟିଏ ପୋଷା କୁକୁର ଠାରେ କରୋନା ଭୂତାଣୁ ଚିହ୍ନଟ ହୋଇଥିଲା ସେତେବେଳ ଠାରୁ କମ୍ପାନୀ ପକ୍ଷରୁ ଟିକା ଉପରେ କାମ କରିବା ଆରମ୍ଭ କରାଯାଇଥିଲା । ଏହାସହ ୮ ମାସ ମଧ୍ୟରେ ପ୍ରଥମ ପରୀକ୍ଷଣ ଆରମ୍ଭ କରାଯାଇଥିଲା । ଏହାକୁ ବିଶ୍ୱ ସ୍ୱସ୍ଥ୍ୟ ସଂଗଠନ ନିକଟରେ ପୈଠ କରାଯାଇଥିଲା । ଏବେ ପୋଷା ଜନ୍ତୁଙ୍କୁ ଟିକାର ଆବଶ୍ୟକତା ନଥିବାରୁ ଏହାକୁ ଚିଡିଆଖାନାରେ ଥିବା ପଶୁମାନଙ୍କୁ ଦିଆଯାଉଛି ।

କହିରଖୁ କି କୌଣସି ପଶୁରୋଗ ବା ଜନ୍ତୁରୋଗ ଯେବେ ମଣିଷ ମାନଙ୍କୁ ସଂକ୍ରମିତ କରି ଅନିଷ୍ଟ କରେ, ତାକୁ ମହାମାରୀ କହନ୍ତି। ପୁଣି ପଶୁଙ୍କ ଶରୀରକୁ ଯାଇ ଏହି ଭୂତାଣୁର ଅଧିକ ମ୍ୟୁଟେସନ ନହେବା ପାଇଁ ଆମେରିକା ଏଭଳି ଉଦ୍ୟମ କରୁଛି