କନକ ବ୍ୟୁରୋ : ବାଉନ୍ସର ବଲ ବାଜି ଆଉ ଜଣେ କ୍ରିକେଟର ଆହତ । ଏଭଳି ଏକ ଘଟଣା ବାଂଲାଦେଶ ପ୍ରିମିୟର ଲିଗରୁ ସାମ୍ନାକୁ ଆସିଛି । ସୋମବାର ବାଂଲାଦେଶ ପ୍ରିମିୟର ଲିଗରେ କାରବିଆନ ଖେଳାଳୀ ଆନ୍ଦ୍ରେ ଫ୍ଲେଚରଙ୍କ ବେକରେ ବଲ ବାଜିଥିଲା । ଆଉ ପଡିଆ ମଝିରେ ହିଁ ଫ୍ଲେଚର ବସି ପଡିଥିଲେ । ଆଉ ଖେଳିବାକୁ ସାହସ ଜୁଟାଇ ପାରିନଥିଲେ । ଶେଷରେ ତାଙ୍କୁ ଷ୍ଟ୍ରେଚରରେ ପଡିଆ ବାହାରକୁ ନିଆଯାଇଥିଲା । ପରେ ତାଙ୍କୁ ଉନ୍ନତ ଚିକିତ୍ସା ପାଇଁ ହସ୍ପିଟାଲ ପଠାଯାଇଛି ।

Advertisment

ମିଳିଥିବା ସୂଚନା ମୁତାବକ, ଖୁଲନା ଟାଇଗର୍ସ ଓ ଚଟ୍ଟଗ୍ରାମ ଚ୍ୟାଲେଞ୍ଜର୍ସ ମଧ୍ୟରେ ମୁକାବିଲା ଖେଳାଯାଉଥିଲା । ଖୁଲନା ଟାଇଗର୍ସ ପକ୍ଷରୁ ଫ୍ଲେଚର ବ୍ୟାଟିଂ କରୁଥିବା ବେଳେ ବୋଲିଂ କରୁଥିଲେ ରେଜାଉର ରେହମାନ ରାଜା । ୧୬ରେ ଫ୍ଲେଚର ବ୍ୟାଟିଂ କରି କ୍ରିଜରେ ଜମି ଆସୁଥିବା ବେଳେ ରେହମାନଙ୍କ ଏକ ସର୍ଟ ବଲକୁ ଖେଳିବାକୁ ପ୍ରୟାସ କରିଥିଲେ । କିନ୍ତୁ ସର୍ଟ ବଲଟି ବ୍ୟାଟରେ ବାଜିବା ପରିବର୍ତ୍ତେ  ଫ୍ଲେଚରଙ୍କ ବେକରେ ବାଜିଥିଲା । ଆଉ ତତକ୍ଷଣାତ ପଡିଆ ମଝିରେ ବସି ପଡିଥିଲେ ଫ୍ଲେଚର । କିଛି ସମୟଙ୍କ ଡାକ୍ତରଙ୍କ ନୀରିକ୍ଷଣ ପରେ ତାଙ୍କୁ ତୁରନ୍ତ ଷ୍ଟ୍ରେଚରରେ ପଡିଆ ବାହାରକୁ ନିଆଯାଇଥିଲା । ଆଉ ଏଠାରୁ ତାଙ୍କୁ ସିଧାସଳଖ ହସ୍ପିଟାଲ ପଠାଯାଇଥିଲା ।

ଫ୍ଲେଚର ଆହତ ହେବା ପରେ ବିକଳ୍ପ ଖେଳାଳୀ ଭାବେ ସିକନ୍ଦର ରାଜା ମୈଦାନକୁ ଓହ୍ଳାଇଥିଲେ ମଧ୍ୟ ଦଳର ବିଜୟ ଭେଟି ଦେଇପାରିନଥିଲେ । ବିଭିନ୍ନ ଦେଶରେ ଫ୍ରାଞ୍ଜାଇଜ କ୍ରିକେଟ ଖେଳୁଥିବା ଫ୍ଲେଚର ୨୦୨୧ ଟି-୨୦ ବିଶ୍ୱକପରେ ୱେଷ୍ଟଇଣ୍ଡିଜ ଟିମ ପକ୍ଷରୁ ଖେଳି ସାରିଛନ୍ତି । ଫ୍ଲେଚର ଏଯାବତ ୨୫ଟି ଦିନିକିଆ ଓ ୫୪ଟି ଟି-୨୦ ମ୍ୟାଚ ୱେଷ୍ଟଇଣ୍ଡିଜ ପକ୍ଷରୁ ଖେଳିଛନ୍ତି । ଏବେ ଫ୍ଲେଚର ସୁସ୍ଥ ଥିବା କଥା କହିଛନ୍ତି ଟିମର ମ୍ୟାନେଜର ।