କନକ ବ୍ୟୁରୋ: ପୁଣି ହିମାଚଳ ପ୍ରଦେଶ ସରକାରରେ ହଲଚଲ । ହିମାଚଳ ପ୍ରଦେଶ କଂଗ୍ରେସ ସରକାର ଉପରୁ ସଙ୍କଟ ଟଳିନଥିବା ବାରି ହୋଇପଡୁଛି, କାରଣ ଯେତେବେଳେ ଜାତୀୟ ଗଣମାଧ୍ୟମରେ ହିମାଚଳ କଂଗ୍ରେସରେ ସବୁକିଛି ଠିକଠାକ୍ କୁହାଯାଉଛି ଠିକ୍ ସେତିକିବେଳେ ଗତକାଲିର କ୍ୟାବିନେଟ୍ ବୈଠକରେ ବିଦ୍ରୋହର ଧୂଆଁ ଉଠିଛି । ଆଉ ଏହି ବିଦ୍ରୋହ ଝଲକ ଶୁଖୁଙ୍କ ସରକାରର ଶିକ୍ଷାମନ୍ତ୍ରୀ ରୋହିତ୍ ଠାକୁର ଆରମ୍ଭ କରିଥିବା ଚର୍ଚ୍ଚା ହେଉଛି ।
Kanak News is now on WhatsApp
Join and get latest news updates delivered to you via WhatsApp
ଗତକାଲି ହିମାଚଳପ୍ରଦେଶ ସରକାରଙ୍କ କ୍ୟାବିନେଟ୍ ବୈଠକ ଚାଲିଥିବାବେଳେ ହଠାତ୍ ମଝିରୁ ଉଠି ବାହାରକୁ ଚାଲି ଆସିଥିଲେ ଶିକ୍ଷାମନ୍ତ୍ରୀ ରୋହିତ୍ ଠାକୁର । ଏହାପରେ ଏମିତି କ’ଣ ହେଲା ଯେ, କାହିଁକି ରାଗିଗଲେ ମନ୍ତ୍ରୀ ରୋହିତ୍ ଠାକୁର ବୁଝିବା ପାଇଁ ତାଙ୍କ ପଛେ ପଛେ ଉପ-ମୁଖ୍ୟମନ୍ତ୍ରୀ ମୁକେଶ ଅଗ୍ନିହୋତ୍ରୀ ମଧ୍ୟ ବାହାରକୁ ଚାଲିଆସିଲେ । ପରେ ଶିକ୍ଷାମନ୍ତ୍ରୀଙ୍କୁ ବୁଝା ସୁଝାଇ କ୍ୟାବିନେଟ୍ ବୈଠକରେ ବସାଇଲେ ଉପ-ମୁଖ୍ୟମନ୍ତ୍ରୀ । କିନ୍ତୁ ବିକ୍ରମାଦିତ୍ୟ ସିଂ କ୍ୟାବିନେଟ୍ ବୈଠକରେ ନଜର ଆସିନଥିଲେ ବୋଲି ଚର୍ଚ୍ଚା ହେଉଛି ।
ଠିକ୍ ସେହିପରି କ୍ୟାବିନେଟ୍ ମନ୍ତ୍ରୀ ଜଗତ ସିଂହ ନେଗୀ ମଧ୍ୟ କ୍ୟାବିନେଟ୍ ବୈଠକରୁ ଉଠି ପଳାଇଲେ, ଏହାପରେ କ୍ୟାବିନେଟ୍ ଶେଷ ହେବା ପରେ ଦୁଇ ଜଣ ମନ୍ତ୍ରୀ ଚଣ୍ଡିଗଡ଼ ଅଭିମୁଖେ ଯାତ୍ରା କରିଛନ୍ତି ବୋଲି ଚର୍ଚ୍ଚା ଜୋର ଧରିଛି । ତେବେ ଯେବେଠାରୁ ହିମାଚଳପ୍ରଦେଶ ରାଜ୍ୟସଭା ନିର୍ବାଚନ ହୋଇଛି ସେବେଠୁ କଂଗ୍ରେସ ସରକାର ମୁଣ୍ଡ ଉପରୁ ସମସ୍ୟା ପିଛା ଛାଡୁନି । ଆଉ ଏପରି ସମୟରେ ହିମାଚଳ ହାତକୁ ସମ୍ଭାଳିବା ପାଇଁ କେତେବେଳେ ସଙ୍କଟମୋଚକ ଶିବକୁମାରଙ୍କୁ ଡକାର ହେଉଛି ତ କେତେବେଳେ ଶୀର୍ଷ ନେତାଙ୍କ ଆର୍ବିଭାବ ।