ସୁନ୍ଦରଗଡ଼ର ବିରଜୁ କୁଲୁ ଫେରିବା ପରେ ସାମ୍ନାକୁ ଆସିଲା ଭଦ୍ରକର ଆନନ୍ଦ ପତ୍ରୀଙ୍କ କାହାଣୀ । ୫୫ ବର୍ଷ ହେଲା ପାକିସ୍ତାନର ଜେଲରେ ବନ୍ଦୀ ଜୀବନ କାଟୁଛନ୍ତି
କନକ ବ୍ୟୁରୋ : ପାକିସ୍ତାନ ଜେଲରେ ୨୫ ବର୍ଷ ବନ୍ଦୀ ଜୀବନ କାଟି ସୁନ୍ଦରଗଡର ବିରଜୁ କୁଲୁ ଗାଁକୁ ଫେରିବା ପରେ ଭଦ୍ରକର ଆନନ୍ଦ ପତ୍ରୀଙ୍କ ପରିବାରରେ ନୂଆ ଆଶା ସଂଚାର ହୋଇଛି । ଭାରତ ସରକାର ବିରଜଙ୍କୁ ନିଜ ଗାଁକୁ ଫେରାଇ ଆଣିବା ଭଳି ଆନନ୍ଦଙ୍କୁ ନିଜ ଗାଁକୁ ଫେରାଇ ଆଣିବା ପାଇଁ ବ୍ୟବସ୍ଥା କରିବାକୁ ଅନୁରୋଧ କରିଛନ୍ତି ତାଙ୍କ ପୁଅ ।
Kanak News is now on WhatsApp
Join and get latest news updates delivered to you via WhatsApp
୧୯୬୫ ମସିହା ଭାରତ ପାକିସ୍ତାନ ଯୁଦ୍ଧ ସମୟରେ କଲିକତା ରେଜିମେଂଟରେ ସିପାହୀ ଭାବେ କାର୍ଯ୍ୟ କରୁଥିଲେ ଆନନ୍ଦ ପତ୍ରୀ । ସେହିସମୟରେ ୱାଘା ବର୍ଡରରେ ନିୟୋଜିତ ଥିବା ଆନନ୍ଦ ହଠାତ୍ ଦିନେ ନିଖୋଜ୍ ହୋଇଯାଇଥିଲେ । ସେବେଠାରୁ ଆନନ୍ଦଙ୍କ ଫେରିବା ବାଟକୁ ଚାହିଁ ରହିଛନ୍ତି ତାଙ୍କ ପରିବାର । ୨୦୦୩ ଫେବ୍ରୁଆରୀ ୭ ତାରିଖରେ ଏକ ସମ୍ବାଦ ପତ୍ରରେ ଆନନ୍ଦଙ୍କ ଫଟୋ ଦେଖିବା ପରେ ସେ ପାକିସ୍ତାନ ଜେଲରେ ବନ୍ଦୀ ଥିବା ଜଣାପଡିଥିଲା । ସେବେଠାରୁ ଆନନ୍ଦଙ୍କ ମୁକ୍ତି ପାଇଁ ଉଦ୍ୟମ ଜାରି ରଖିଛନ୍ତି ତାଙ୍କ ପୁଅ । ଏନେଇ ପ୍ରଧାନମନ୍ତ୍ରୀଙ୍କଠାରୁ ଆରମ୍ଭ କରି ଭାରତ ସରକାରଙ୍କ ବିଭିନ୍ନ ବିଭାଗକୁ ଚିଠି ମଧ୍ୟ ଲେଖିଛନ୍ତି । ଏପରିକି ଆନନ୍ଦଙ୍କ ମୁକ୍ତି ପାଇଁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ମଧ୍ୟ ତକ୍ରାଳିନ ବୈଦେଶିକ ମନ୍ତ୍ରୀଙ୍କୁ ଚିଠି ଲେଖିଥିଲେ ।
ସୂଚନା ଅନୁସାରେ ୨୦୦୬ ମସିହାରେ ଯେତେବେଳେ ଦୁଇ ଦେଶର ଯୁଦ୍ଧ ବନ୍ଦୀମାନଙ୍କୁ ଅଦଳବଦଳ ନିୟମ ଅନୁଯାୟୀ ଛଡାଯାଉଥିଲା ତାଙ୍କ ବାପାଙ୍କୁ ମଧ୍ୟ ମୁକ୍ତି ମିଳିଯିବ ଭାବି ୱାଘା ବର୍ଡର ଯାଇଥିଲେ ବିଦ୍ୟାଧର । ହେଲେ , ଅନେକ ବନ୍ଦୀ ଫେରି ଆସିଥିଲେ ମଧ୍ୟ ଆନନ୍ଦଙ୍କର କୌଣସି ସୂଚନା ମିଳିନଥିଲା ।
ଏହା ଭିତରେ ଆନନ୍ଦ ନିଖୋଜ ହେବାକୁ ଦୀର୍ଘ ୫୫ ବର୍ଷ ବିତିଗଲାଣି । ହେଲେ ସେ କେଉଁଠି ଅଛନ୍ତି ଓ କିଭଳି ଅଛନ୍ତି ସେ ନେଇ ବୈଦେଶିକ ମନ୍ତ୍ରାଳୟ ପାଖରେ କୌଣସି ସଠିକ୍ ତଥ୍ୟ ନାହିଁ । କିନ୍ତୁ ଲାହୋର କୋର୍ଟ ଲାକପାଟ କେନ୍ଦ୍ରୀୟ ଜେଲରେ ଥିବା ନସିମ ଗୋପାଳ ନାମକ ଜଣେ ବନ୍ଦୀଙ୍କ ସହିତ ଆନନ୍ଦଙ୍କର ସାମଞ୍ଜସ୍ୟ ରହିଥିବା ସୂଚନା ଦେଇଥିଲା ବୈଦେଶିକ ମନ୍ତ୍ରାଳୟ । ତେଣୁ ସେ ଏବେ ଜୀବିତ କି ମୃତ ଏହାର ସତ୍ୟତା ଜାଣାଇବାକୁ ସରକାରଙ୍କ ନିକଟରେ ଦାବି କରିଛନ୍ତି ତାଙ୍କ ପରିବାର ।
ଦୀର୍ଘ ୨୫ ବର୍ଷ ପରେ ସୁନ୍ଦରଗଡର ବିରଜୁ ଫେରି ଆସିବା ପରେ ଦେଶ ମାତୃକା ପାଇଁ ନିଜ ଜୀବନକୁ ବାଜି ଲଗାଇଥିବା ଆନନ୍ଦଙ୍କୁ ଫେରାଇ ଆଣିବା ପାଇଁ ପୁଣି ଦାବି ହୋଇଛି ।