କନକ ବ୍ୟୁରୋ: ସରିଗଲା ଟେନିସର ସବୁଠାରୁ ବଡ଼ ଯୁଗ । ନିଜର ପ୍ରିୟ ଖେଳକୁ ଅଲବିଦା କହିଲେ ସ୍ୱିସ୍ ଷ୍ଟାର ରୋଜର ଫେଡେରର । ଟେନିସର ସବୁଠାରୁ ମହାନ ଖେଳାଳି ତଥା ଜେଣ୍ଟଲମ୍ୟାନ୍ ଭାବେ ପରିଚିତ ଫେଡେରରଙ୍କୁ ଆଉ ଟେନିସ୍ ଖେଳୁଥିବାର ଦେଖିବାକୁ ମିଳିବନି । ନିଜର ଚିରପ୍ରତିଦ୍ୱନ୍ଦ୍ୱୀ ରାଫେଲ ନାଡାଲଙ୍କୁ ସାଥୀ କରି ବିଦାୟୀ ମ୍ୟାଚ୍ ଖେଳିଥିଲେ ଦୁନିଆର ଏହି ସର୍ବଶ୍ରେଷ୍ଠ ଖେଳାଳି । ଲଣ୍ଡନରେ ଖେଳାଯାଇଥିବା ଏହି ମୁକାବିଲାରେ ଫେଡେରର ଓ ନାଡାଲଙ୍କ ସାମ୍ନା ହୋଇଥିଲା ଆମେରିକା ଫ୍ରାନ୍ସେସ ଟିୟାଫୋ ଓ ଜେଫ ସକଙ୍କ ସହ । ଯଦିଓ ଏହି ମ୍ୟାଚରେ ଫେଡେରର ହାରିଯାଇଛନ୍ତି, କିନ୍ତୁ ଏହି ପରାଜୟ ସହ ସେ ଛାଡ଼ି ଯାଇଛନ୍ତି ଅନେକ ସଫଳତା । ମ୍ୟାଚ୍ ପରେ ଖୁବ୍ ଭାବବିହ୍ୱଳ ହୋଇପଡ଼ିଥଲେ ନାଡାଲ ।
Kanak News is now on WhatsApp
Join and get latest news updates delivered to you via WhatsApp
ଲିଭର କପରେ ମ୍ୟାଚ୍ ହାରିବାର ଦୁଃଖ ଯେତିକି ନଥିଲା, ତା’ଠାରୁ ଅଧିକ କଷ୍ଟ ଦେଇଥିଲା ଟେନିସକୁ ଗୁଡବାଏ କହିବା । ଫେଡେରରଙ୍କ ଦୁଃଖରେ ସହଭାଗୀ ହୋଇଥିଲେ ନାଡାଲ । ଟେନିସର ଏହି ଦୁଇ ମହାନ୍ ଖେଳାଳି ହୁଏ କୋର୍ଟରେ ପରସ୍ପରକୁ କଡ଼ା ଟକ୍କର ଦିଅନ୍ତି, କିନ୍ତୁ ଉଭୟଙ୍କ ମଧ୍ୟରେ ବନ୍ଧୁତା ମଧ୍ୟ ବେଶ୍ ମଜଭୁତ । ସେଥିପାଇଁ ଫେଡେରରଙ୍କ ବିଦାୟରେ ଅଧିକ ଦୁଃଖୀ ହୋଇଥିଲେ ନାଡାଲ । ସେହିପରି ନୋଭାକ ଜୋକୋଭିଚ୍, ଆଣ୍ଡି ମରେ ମଧ୍ୟ ଖୁବ୍ ଭାବବିହ୍ୱଳ ହୋଇଥିଲେ ।
ଫେଡେରରଙ୍କ ବଡ଼ ରେକର୍ଡ
– ସର୍ବାଧିକ ୨୩୭ ସପ୍ତାହ ଧରି ଏଟିପିରେ ଏକ ନମ୍ବର
– ଏକମାତ୍ର ଖେଳାଳି ଭାବେ ଲଗାତାର ୧୦ ଗ୍ରାଣ୍ଡସ୍ଲାମ ଫାଇନାଲ୍ ଖେଳିବାର ରେକର୍ଡ
– ଏକମାତ୍ର ଖେଳାଳି ଭାବେ ତିନିଥର ବର୍ଷର ୪ଟି ଯାକ ଗ୍ରାଣ୍ଡସ୍ଲାମ ଫାଇନାଲ୍ ଖେଳିବାର ସୌଭାଗ୍ୟ ଅର୍ଜନ କରିଛନ୍ତି
– ୨୦୦୬, ୨୦୦୭, ୨୦୦୯ରେ ଚାରୋଟି ଯାକ ଗ୍ରାଣ୍ଡସ୍ଲାମ ଫାଇନାଲ୍ ଖେଳିଛନ୍ତି
– ସର୍ବାଧିକ ଗ୍ରାଣ୍ଡସ୍ଲାମ ଜିତିବାରେ ତୃତୀୟ ସ୍ଥାନରେ ଅଛନ୍ତି
– ଫେଡେରରଙ୍କ ନାଁରେ ରହିଛି ୨୦ ଗ୍ରାଣ୍ଡସ୍ଲାମ ଟାଇଟଲ
– ୨୨ ଗ୍ରାଣ୍ଡସ୍ଲାମ୍ ଟାଇଟଲ୍ ସହ ନାଡାଲ ପ୍ରଥମ, ୨୧ ଟାଇଟଲ୍ ସହ ଜୋକୋଭିଚ୍ ଦ୍ୱିତୀୟ
– ଦ୍ୱିତୀୟ ଖେଳାଳି ଭାବେ ଟେନିସରେ ସର୍ବାଧିକ ସିଙ୍ଗଲ୍ସ ମ୍ୟାଚ୍ ଜିତିଛନ୍ତି
– ଜିମି କର୍ନର୍ସ ୧୨୭୪ ମ୍ୟାଚ୍, ଫେଡେରର ୧୨୫୧ ମ୍ୟାଚ୍ ଜିତିଛନ୍ତି
– ବୟୋଜ୍ୟେଷ୍ଠ ଖେଳାଳି ଭାବେ ଜିତିଛନ୍ତି ୱିମ୍ବଲଡନ୍ ଟ୍ରଫି
– ୨୦୧୭ରେ ୩୫ ବର୍ଷ, ୩୪୨ ଦିନରେ କରିଥିଲେ ଏହି କାରନାମା
– ଗ୍ରାସ କୋର୍ଟରେ ସର୍ବାଧିକ ୬୫ ଜିତିବାର ରେକର୍ଡ
ସେପ୍ଟେମ୍ବର ୧୫ ତାରିଖରେ ୪୧ ବର୍ଷୀୟ ଫେଡେରର ଟେନିସରୁ ସନ୍ନ୍ୟାସ ଘୋଷଣା କରିଥିଲେ । ୨୪ ବର୍ଷର ଲମ୍ବା କ୍ୟାରିୟରରେ ୧୫୦୦ରୁ ଅଧିକ ମ୍ୟାଚ୍ ଖେଳିଥିବା ଫେଡେରରଙ୍କ ନାଁ ଟେନିସରେ ସର୍ବଦା ଉଚ୍ଚରେ ରହିବ ।