ଏବେ ଅମୁଲ କ୍ଷୀର ପିଇବେ ଆମେରିକାର ଲୋକେ, ଭାରତୀୟ କମ୍ପାନୀ ବିକ୍ରି କରିବାକୁ କଲା ଘୋଷଣା

କନକ ବ୍ୟୁରୋ : ଭାରତରେ ପ୍ରମୁଖ କ୍ଷୀର ଉତ୍ପାଦ କମ୍ପାନୀ ଅମୁଲ ଏବେ ବିଶ୍ୱସ୍ତରରେ ଏକ ବଡ ସଫଳତା ହାସଲ କରିଛି । ମୂଳ ଭାରତୀୟ କମ୍ପାନୀ ଅମୁଲ ଏବେ ଆମେରିକାରେ ତାର ଉତ୍ପାଦ ବିକ୍ରି କରିବ । ଅମୁଲ ତରଫରୁ ଆମେରିକାରେ କ୍ଷୀର ଉତ୍ପାଦ ବିକ୍ରି କରିବା ନେଇ ଯୋଜନା ପ୍ରସ୍ତୁତ କରିଛି । ଏହାକୁ ନେଇ ଗୁଜରାଟର ଏହି କମ୍ପାନୀ ଏବେ ଆମେରିକାର ପୂର୍ବାଞ୍ଚଳ ଓ ମଧ୍ୟପଶ୍ଚିମ ଅଞ୍ଚଳର ବଜାରରେ ଫ୍ରେସ କ୍ଷୀର ବିକ୍ରି କରିବାକୁ ମିଶିଗନ ମିଲ୍କ ପ୍ରଡ୍ୟୁସର ଆସୋସିଏସନ ସହ ଚୁକ୍ତି କରିଛି ।

ଗୁଜରାଟ କୋ-ଅପରେଟିଭ୍ ମିଲ୍କ ମାର୍କେଟିଂ ଫେଡେରେଶନର ପରିଚାଳନା ନିର୍ଦ୍ଦେଶକ ଜୟେନ ମେହତା କହିଛନ୍ତି କି, ଅମୁଲ କମ୍ପାନୀ ଆମେରିକାରେ ଫ୍ରେସ ମିଲ୍କ ପ୍ରଡକ୍ଟ ଲଂଚ କରିବାକୁ ଯାଉଛି । ସେ କହିଛନ୍ତି କି, ଏନେଇ ଆମେରିକାର ୧୦୮ ବର୍ଷ ପୁରୁଣା ଡାଏରୀ ସହକାରୀ ସଂସ୍ଥା ସହ ଚୁକ୍ତି ହୋଇଛି ।

ଏହା ପ୍ରଥମଥର ପାଇଁ ହେଉଛି କି, ଅମୁଲ ଉତ୍ପାଦ ଭାରତ ବାହାରେ ଅର୍ଥାତ ଆମେରିକା ଭଳି ଦେଶରେ ବିକ୍ରି ହେବାକୁ ଯାଉଛି । ମେହତା କହିଛନ୍ତି କି, ଅମୁଲ ତରଫରୁ ଆମେରିକାରେ ୩.୮ ଲିଟର ପ୍ୟାକେଟ ଓ ୧.୯ ଲିଟର ପ୍ୟାକେଟରେ ତାଜା କ୍ଷୀର ବିକ୍ରି କରିବ । ଭାରତରେ ଅମୁଲ କ୍ଷୀରର ଅଧା ଲିଟର କ୍ଷୀରର ଦାମ ୨୭ ଟଙ୍କା ହିସାବରେ ବିକ୍ରି କରୁଛି ।