ବାତ୍ୟା ମୁକାବିଲା ନେଇ ସାବାସୀ ଦେଲେ ଶାହା । ଏସସିଓ ଭଳି ଅର୍ନ୍ତଜାତୀୟ ମଞ୍ଚରେ ଓଡ଼ିଶାର ବାତ୍ୟା ମୁକାବିଲା ଏବଂ କ୍ଷୟକ୍ଷତି ନିୟନ୍ତ୍ରଣକୁ ପ୍ରଶଂସା କଲେ ଗୃହମନ୍ତ୍ରୀ
କନକ ବ୍ୟୁରୋ : ଅନେକ ଥର ଝଡ ଆସିଛି ଆଉ ଓଡିଶାର ପିଠିରେ ମାଡ କରି ଫେରି ଯାଇଛି । ଝଡ ମାଡରେ କ୍ଷତାକ୍ତ ହୋଇ ବି, ସଫଳ ମୁକାବିଲା କରି ସାରା ବିଶ୍ୱରେ ଓଡିଶା ପ୍ରଶଂସା ସାଉଁଟିଛି । ପୂର୍ବରୁ ଚାରି ଚାରିଟି ବାତ୍ୟାର ସଫଳ ମୁକାବିଲା କରିଥିବା ରାଜ୍ୟ ସରକାର ଆସୁଥିବା ସମ୍ଭାବ୍ୟ ବାତ୍ୟାକୁ ବି ସାମ୍ନା କରିବା ପାଇଁ ପୁରା ପ୍ରସ୍ତୁତ ଅଛନ୍ତି । ସମ୍ଭାବ୍ୟ ବାତ୍ୟା ‘ବୁଲବୁଲ’ର ମୁକାବିଲା ପାଇଁ ସଂପୂର୍ଣ୍ଣ ତତ୍ପରତା ପ୍ରକାଶ କରିଛି ସରକାରୀ କଳ ।
Kanak News is now on WhatsApp
Join and get latest news updates delivered to you via WhatsApp
ଏସବୁ ଭିତରେ ବାତ୍ୟାର ଆଶଙ୍କା ଟଳୁଥିବା ବେଳେ ସେପଟେ ଗୃହମନ୍ତ୍ରୀ ଅମିତ ଶାହା ପ୍ରାକୃତିକ ବିପର୍ଯ୍ୟୟର ମୁକାବିଲା ନେଇ ଓଡିଶା ସରକାରଙ୍କୁ ବେଶ ପ୍ରଶଂସା କରିଛନ୍ତି । ଶାହା କହିଛନ୍ତି, ପ୍ରାକୃତିକ ବିପର୍ଯ୍ୟୟ ସହ ଲଢିବାରେ ଓଡିଶା ଉଦାହରଣ ସୃଷ୍ଟି କରିଛି । ଫୋନି ଭଳି ଏକ ବଡ ବାତ୍ୟାରେ ୬୪ ଜଣଙ୍କର ମୃତ୍ୟୁ ହୋଇଥିଲା, କିନ୍ତୁ ୧୯୯୯ ମହାବାତ୍ୟାରେ ୧୦ ହଜାରରୁ ଅଧିକ ଲୋକଙ୍କ ମୃତ୍ୟୁ ହୋଇଥିଲା । ଦିଲ୍ଲୀରେ ଅନୁଷ୍ଠିତ ସାଙ୍ଘାଇ କୋ-ଅପରେସନ୍ ଅର୍ଗାନାଇଜେସନ୍ ଅନ୍ତର୍ଗତ ସମସ୍ତ ଦେଶର ପ୍ରତିନିଧିଙ୍କ ବୈଠକରେ ଏହି ବୟାନ ଦେଇଛନ୍ତି ଶାହା ।
ବାତ୍ୟା ମୁବାକିଲାରେ ସାରା ବିଶ୍ୱରେ ଏକ ଉଦାହରଣ ପାଲଟିଥିବା ଓଡ଼ିଶା, ଏବେ ସମ୍ଭାବ୍ୟ ବାତ୍ୟା ‘ବୁଲବୁଲ’ର ମୁକାବିଲା ପାଇଁ ସଂପୂର୍ଣ୍ଣ ତତ୍ପର । ବାତ୍ୟାର ଗତିପଥ ଏବଂ ରୂପରେଖ ଉପରେ ନଜର ରଖାଯାଇଥିବା ବେଳେ ସରକାରୀ କଳ ସାମଗ୍ରିକ ଭାବରେ ପ୍ରସ୍ତୁତ ରହିଛି ।
– ସମ୍ଭାବ୍ୟ ବାତ୍ୟା ସ୍ଥିତିର ମୁକାବିଲା ପାଇଁ ଜିଲ୍ଲାପାଳଙ୍କୁ ପ୍ରସ୍ତୁତ ରହିବାକୁ ନିର୍ଦ୍ଦେଶ ଦିଆଯାଇଛି
– ମତ୍ସ୍ୟଜୀବୀମାନଙ୍କୁ ସମୁଦ୍ର ଭିତରକୁ ନଯିବା ପାଇଁ ଆଗୁଆ ପରାମର୍ଶ ଦିଆଯାଇଛି
– ବାତ୍ୟା ଭଳି ସ୍ଥିତିର ମୁକାବିଲା ପାଇଁ ପ୍ରସ୍ତୁତ ଥିବାରୁ ବିଚଳିତ ନହେବାକୁ ପରାମର୍ଶ ଦିଆଯାଇଛି
ବର୍ତମାନ ଓଡ଼ିଶା, ଫସଲ ଅମଳ ସମୟ ଦେଇ ଗତି କରୁଥିବାରୁ ଚାଷୀଙ୍କୁ ତତ୍ପର ରହିବାକୁ କୃଷୀ ବିଭାଗ ପକ୍ଷରୁ ପରାମର୍ଶ ଦିଆଯାଇଛି । ଯେଉଁଥିରେ ଚାଷୀଙ୍କୁ କୁହାଯାଇଛି-
– ଅମଳ ହୋଇଥିବା ଫସଲକୁ ସୁରକ୍ଷିତ ସ୍ଥାନକୁ ନେଇ ଆସନ୍ତୁ
– ଫସଲ ଅମଳ ହୋଇନଥିଲେ ଜମିରୁ ପାଣି ନିଷ୍କାସନ ପାଇଁ ବ୍ୟବସ୍ଥା କରନ୍ତୁ
– ବର୍ଷା ପରେ ରୋଗ ପୋକ ଦାଉରୁ ଫସଲକୁ ରକ୍ଷା ପାଇଁ ସରକାର ପଦକ୍ଷେପ ନେବେ
ସେହିପରି ସମ୍ଭାବ୍ୟ ବାତ୍ୟାକୁ ଦୃଷ୍ଟିରେ ରଖି ଆବଶ୍ୟକୀୟ ସାମଗ୍ରୀ ଉବଲବ୍ଧ କରାଇବା ଅନେକ ସମୟରେ ସମସ୍ୟା ହେଉଥିବାରୁ କଳାବାଜରୀ ଉପରେ ନଜର ରଖିଛନ୍ତି ରାଜ୍ୟ ସରକାର । ପିଆଜ ଏବଂ ଆଳୁ ଭଳି ସାମଗ୍ରୀ କେମିତି ଲୋକ ଠିକ୍ ଦାମରେ ପାଇପାରିବେ ସେ ଦିଗରେ ସରକାର ଚିନ୍ତା କରୁଥିବା କହିଛନ୍ତି ଯୋଗାଣ ମନ୍ତ୍ରୀ । ତେବେ ପ୍ରାରମ୍ଭିକ ଆକଳନ ଅନୁସାରେ ସମ୍ଭାବ୍ୟ ବାତ୍ୟା ପଶ୍ଚିମବଙ୍ଗ ଏବଂ ବାଂଲାଦେଶ ମୁହାଁ ହେଉଛି । ତେଣୁ ବାତ୍ୟାକୁ ନେଇ ବିଚଳିତ ନହେବାକୁ ସରକାରୀ କଳ ପକ୍ଷରୁ କୁହାଯାଇଛି ।