ଟିଏମସି ସହିତ ଚାଲିଥିବା ବିବାଦ ମଧ୍ୟରେ ଦୁଇ ଦିନିଆ ଗସ୍ତରେ ପଶ୍ଚିମବଙ୍ଗରେ ପହଂଚିଲେ ଗୃହମନ୍ତ୍ରୀ ଅମିତ ଶାହା । ବିଜେପି ନେତାଙ୍କୁ କଲେ ସ୍ୱାଗତ
କନକ ବ୍ୟୁରୋ : ଆଗାମୀ ବର୍ଷ ହେବାକୁ ଥିବା ପଶ୍ଚିମବଙ୍ଗ ନିର୍ବାଚନ ପୂର୍ବରୁ ରାଜ୍ୟ ବିଜେପିକୁ ପ୍ରସ୍ତୁତ କରିବାକୁ କେନ୍ଦ୍ର ଗୃହମନ୍ତ୍ରୀ ଅମିତ ଶାହା ୨ ଦିନିଆ ପଶ୍ଚିମବଙ୍ଗ ଗସ୍ତରେ ଯାଇ ଆଜି କୋଲକତାରେ ପହଂଚିଛନ୍ତି । ତାଙ୍କ ଗସ୍ତ ଏମିତି ସମୟରେ ହୋଇଛି କି ଯେତେବେଳେ ରାଜ୍ୟ କ୍ଷମତାରେ ଥିବା ତୃଣମୂଳ କଂଗ୍ରେସର ନେତା ଓ ବିଧାୟକ ମାନେ କ୍ରମାଗତ ଦଳରୁ ଇସ୍ତଫା ଦେଉଛନ୍ତି । ଅନୁମାନ କରାଯାଉଛି କି ଯେଉଁ ବିଧାୟକ, ମନ୍ତ୍ରୀ ଓ ନେତା ମାନେ ଟିଏମସି ଛାଡିଛନ୍ତି ସେମାନେ ଆଜି ଶାହାଙ୍କ ଉପସ୍ଥିିିତିରେ ବିଜେପିରେ ଯୋଗ ଦେଇ ପାରନ୍ତି ।
Kanak News is now on WhatsApp
Join and get latest news updates delivered to you via WhatsApp
ବିଜେପିର ରାଷ୍ଟ୍ରୀୟ ମିଡିଆ ପ୍ରଭାରୀ ଅନିଲ ବଲୁନିଙ୍କ କହିବା ମୁତାବକ ଶାହା ଏହି ଗସ୍ତ ବେଳେ ବିଭିନ୍ନ କାର୍ଯ୍ୟକ୍ରମରେ ଭାଗ ନେଇପାରନ୍ତି । ଏହି କ୍ରମରେ ଆଜି ପ୍ରଥମେ ଶ୍ରୀ ଶାହା ଏନଆଇଏ ଅଧିକାରୀଙ୍କ ସହ ଏକ ବୈଠକ କରିବେ । ଏହାପରେ ଉତ୍ତର କୋଲକତା ସ୍ଥିତ ସ୍ୱାମୀ ବିବେକାନନ୍ଦ ଆବାସରେ ପହଂଚି ସେଠାରେ ତାଙ୍କ ପ୍ରତିମୂର୍ତ୍ତିରେ ଶ୍ରଦ୍ଧାଞ୍ଜଳି ଜ୍ଞାପନ କରିବେ । ଏହାପରେ ଶ୍ରୀ ଶାହା ମେଦିନାପୁର ଯିବେ । ସେଠାରେ କ୍ରାନ୍ତିକାରୀ ଖୁଦିରାମ ବୋଷଙ୍କ ପ୍ରତିମୂର୍ତ୍ତିରେ ଶ୍ରଦ୍ଧାଞ୍ଜଳୀ ଜ୍ଞାପନ କରି ଦୁଇଟି ମନ୍ଦିରରେ ପୂଜାର୍ଚ୍ଚନା କରିବାର କାର୍ଯ୍ୟକ୍ରମ ରହିଛି । ମଧ୍ୟାହ୍ନରେ ସେଠାରେ ଶ୍ରୀ ଶାହା ଏକ କୃଷକର ଘରେ ମଧ୍ୟାହ୍ନ ଭୋଜନ କରିବେ । ଏହାପରେ ମେଦିନାପୁର କଲେଜ ପଡିଆ ଠାରେ ଏକ ଜନସଭାକୁ ଉଦବୋଧନ ଦେବେ ଗୃହମନ୍ତ୍ରୀ । ଜଣେ ବରିଷ୍ଠ ବିଜେପି ନେତା କହିଛନ୍ତି କି କିଛି ତୃଣମୂଳ କଂଗ୍ରେସ ନେତା ଶାହାଙ୍କ ରାଲିବେଳେ ବିଜେପିରେ ଯୋଗ ଦେବାର ସମ୍ଭାବନା ରହିଛି । ଏହି ରାଲି ପରେ ଶାହା କୋଲକତା ଫେରି ଆସିବେ । ସେଠାରେ ରାଜ୍ୟର କିଛି ବିଜେପି ନେତାଙ୍କ ସହ ନିର୍ବାଚନ ବାବଦରେ ଆଲୋଚନା କରିବାର କାର୍ଯ୍ୟକ୍ରମ ରହିଛି ।
ସୂଚନା ଥାଉକି କିଛିଦିନ ହେବ ପଶ୍ଚିମବଙ୍ଗରେ ବିଜେପି ଓ ଟିଏମସି ମଧ୍ୟରେ ବିବାଦ ଲାଗି ରହିଛି । ଏହି ବିବାଦ ଭିତରେ ବିଜେପି ରାଷ୍ଟ୍ରୀୟ ଅଧ୍ୟକ୍ଷ ଜେ.ପି ନଡ୍ଡାଙ୍କ ଗାଡି ଉପରେ ଆକ୍ରମଣ ହୋଇଥିଲା ଯାହାକୁ ନେଇ କେନ୍ଦ୍ର ବିଜେପି ଓ ଟିଏମସି ମଧ୍ୟରେ କଥା କଟା କଟି ହୋଇଛି । ଏହା ସହ ଜେପି ନଡ୍ଡାଙ୍କ ଗସ୍ତ ପରେ କିଛି ବିଜେପି ଓ ଟିଏମସି କର୍ମୀ ହତ୍ୟାର ଶିକାର ହୋଇଛନ୍ତି । ଯାହାକୁ ନେଇ ଉଭୟ ଦଳ ପରସ୍ପର ଉପରେ ଆରୋପ ଲଗାଇଛନ୍ତି । ଏହା ସହ କେନ୍ଦ୍ର ଗୃହମନ୍ତ୍ରଣାଳୟ ପଶ୍ଚିମବଙ୍ଗର ୩ ଜଣ ଆଇପିଏସଙ୍କୁ ଡେପୁଟେସନରେ କେନ୍ଦ୍ରକୁ ଡାକିଥିବା ବେଳେ ତାହାକୁ ପ୍ରତ୍ୟାଖ୍ୟାନ କରିଦେଇଥିଲେ ମୁଖ୍ୟମନ୍ତ୍ରୀ ମମତା ବାନାର୍ଜୀ । ଏସବୁ ଭିତରେ ଶାହାଙ୍କ ଗସ୍ତ ବେଳେ ଗୁରୁତ୍ୱ ବହନ କରୂୁଛି ।