ଭାରତ ସରକାରଙ୍କ କୃଷି ଆଇନକୁ ଆମେରିକାର ସମର୍ଥନ । ବାଇଡେନ ସରକାର କହିଲେ, ନୂଆ କୃଷି ଆଇନ ଦ୍ୱାରା ବଜାରର ଦକ୍ଷତା ବଢିବ
କନକ ବ୍ୟୁରୋ: କୃଷି ଆଇନକୁ ଆମେରିକାର ସମର୍ଥନ । ଦେଶରେ ଚାଲିଥିବା କୃଷି ଆନ୍ଦୋଳନ ଏବେ ଅନ୍ତର୍ଜାତୀୟ ସ୍ତରରେ ଚର୍ଚ୍ଚାର ବିଷୟ ପାଲଟିଛି । ଏବେ ଆମେରିକା ଏ ନେଇ ପ୍ରତିକ୍ରିୟା ରଖିଛି । ଆମେରିକା ପକ୍ଷରୁ କୁହାଯାଇଛି, ନୂଆ କୃଷି ଆଇନ ଦ୍ୱାରା ବଜାରର ଦକ୍ଷତା ବଢିବ । ଅଧିକ ସଂଖ୍ୟାରେ ଘରୋଇ କମ୍ପାନୀ ପୁଂଜିନିବେଶ ପାଇଁ ଆଗ୍ରହୀ ହେବେ । କୃଷିକୁ ଭଲ କରିବା ଲାଗି ଯେକୌଣସି ପଦକ୍ଷେପକୁ ଆମେରିକା ସ୍ୱାଗତ କରିବ । କୃଷି କ୍ଷେତ୍ରରେ ଘରୋଇ ନିବେଶକୁ ସ୍ୱାଗତ କରୁଛି ଆମେରିକା ।
Kanak News is now on WhatsApp
Join and get latest news updates delivered to you via WhatsApp
ଆମେରିକା ଷ୍ଟେଟ ଡିପାର୍ଟମେଂଟର ପକ୍ଷରୁ ଆହୁରି ମଧ୍ୟ କୁହାଯାଇଛି ଯେ, ଆମେରିକା ବିଶ୍ୱାସ କରେ, ଶାନ୍ତିପୂର୍ଣ୍ଣ ଆନ୍ଦୋଳନ କୌଣସି ଶକ୍ତ ଗଣତନ୍ତ୍ରର ପରିଚୟ । ମତଭେଦକୁ କଥାବାର୍ତା ଜରିଆରେ ସମାଧାନ କରାଯିବା ଉଚିତ । ଏପରିକି ଭାରତର ସୁପ୍ରିମକୋର୍ଟ ମଧ୍ୟ ଶାନ୍ତିପୂର୍ଣ୍ଣ ବିରୋଧ ପ୍ରଦର୍ଶନକୁ ସମର୍ଥନ କରିଛନ୍ତି । ଆମେ ମତଭେଦକୁ ଆଲୋଚନା ଜରିଆରେ ସମାଧାନ ପାଇଁ ପ୍ରୋତ୍ସାହିତ କରୁଛୁ । ସେହିପରି ବିଭିନ୍ନ ଧାରଣା ସ୍ଥଳରେ ଇଂଟରନେଟ ସେବା ବନ୍ଦ କରିଦିଆଯାଇଥିବା ନେଇ ମଧ୍ୟ ପ୍ରତିକ୍ରିୟା ରଖି ଆମେରିକା କହିଛି, କୌଣସି ବି ତଥ୍ୟକୁ ସାଧାରଣ ଲୋକଙ୍କ ନିକଟରେ ପଂହଚାଇବା ଗଣତନ୍ତ୍ରର ଏକ ଭଲ ଲକ୍ଷଣ । ଇଂଟରନେଟ ବି ଏହାର ଏକ ଅଂଶ ।
କୃଷି ଆଇନ ପ୍ରତ୍ୟାହାର ଦାବିରେ କୃଷକମାନେ ପାଖାପାଖି ଅଢେଇ ମାସ ହେଲା ଆନ୍ଦୋଳନ ଚଳାଇଛନ୍ତି । ଏପରିକି ସରକାରଙ୍କ ପକ୍ଷରୁ ଦିଲ୍ଲୀ ସୀମାରେ ଚାଲିଥିବା ଆନ୍ଦୋଳନ ସ୍ଥଳରେ ଇଂଟରନେଟ ସୁବିଧାକୁ ବନ୍ଦ କରିଦିଆଯାଇଛି । ହରିୟାଣାର କିଛି ସ୍ଥାନରେ ବି ଇଂଟରନେଟ ସେବା ବନ୍ଦ ରହିଛି । ଏହାପରେ ଅର୍ନ୍ତଜାତୀୟ ପପ୍ ଷ୍ଟାର ରିହାନା ଓ ସ୍ୱିଡେନର କ୍ଲାଇମେଟ ଚେଂଜ ଆକ୍ଟିଭିଷ୍ଟ ଗ୍ରେଟା ଥନବର୍ଗ, ଚାଷୀ ଆନ୍ଦୋଳନକୁ ସମର୍ଥନ ଜଣାଇଛନ୍ତି । ଏପରି ସମୟରେ ଆମେରିକା ପ୍ରତିକ୍ରିୟା ରଖି କୃଷି ଆଇନକୁ ସମର୍ଥନ ଜଣାଇଛି ।