କନକ ବ୍ୟୁରୋ: ମଣିଷ ଜୀବନକୁ ବଞ୍ଚାଇବାକୁ ଆମ୍ବୁଲାନ୍ସ ବ୍ୟବହାର ହେଉଥିବା ଆପଣ ଦେଖିଥିବେ । ହେଲେ ଏବେ ରାସ୍ତାରେ ଗଡୁଛି ଟ୍ରି ଆମ୍ବୁଲାନ୍ସ । ବୁଲି ବୁଲି ସହରଯାକ ଗଛଙ୍କର କରୁଛି ଚିକତ୍ସା । ହ୍ରଦର ନଗରୀ ଭାବେ ଜଣାଶୁଣା ଉଦୟପୁରରେ ଗଛଙ୍କ ସୁରକ୍ଷା ପାଇଁ ଆରମ୍ଭ ହୋଇଛି ଟ୍ରି ଆମ୍ବୁଲାନ୍ସ ।
Kanak News is now on WhatsApp
Join and get latest news updates delivered to you via WhatsApp
ନମୋକାର ବୋଲି ଏକ ସଙ୍ଗଠନ ସହରରେ ସବୁଜିମା ଆଣିବାକୁ ଏବଂ ଗଛ ସମ୍ପଦର ସୁରକ୍ଷା ପାଇଁ ଏହି ଆମ୍ବୁଲାନ୍ସ ସେବା ଆରମ୍ଭ କରିଛି । ଚାରିଆଡେ ଇଟା ସିମେଣଣ୍ଟର ପ୍ରାଧାନ୍ୟ ଦେଖାଯାଉଥିବାବେଳେ ସହରକୁ ସବୁଜିମାରେ ଭରିଦେବାକୁ ସଂସ୍ଥା ଆରମ୍ଭ କରିଛି ଟ୍ରି ଆମ୍ବୁଲାନ୍ସ ସେବା । ଗଛ ଲଗାଇବା ଠାରୁ ଆରମ୍ଭ କରି ଏହାକୁ ପାଣି ଦେବା ଏବଂ ଆବଶ୍ୟକ ସ୍ଥଳେ କୌଣସି କାରଣରୁ ନଷ୍ଟ ହୋଇଯାଉଥିବା ଗଛର ଚିକିତ୍ସା ମଧ୍ୟ କରାଯାଉଛି । ଏହି ଆମ୍ବୁଲାନ୍ସରେ ରହିଛି ଗଛଙ୍କ ପାଇଁ ଆବଶ୍ୟକ ସବୁ ଉପକରଣ । ଏଯାଏଁ ସଂସ୍ଥାର କର୍ମଚାରୀ ୫ ହଜାରରୁ ଅଧିକ ଗଛ ଲଗାଇ ସାରିଲେଣି । ଏତିକିରେ କଥା ସରୁନି ଯେଉଁ ଗଛ ଗୁଡିକୁ ଲଗାଯାଏ ନିର୍ଦ୍ଦିଷ୍ଟ ସମୟ ବ୍ୟବଧାନରେ ଆମ୍ବୁଲାନ୍ସ ବୁଲି ବୁଲି ସେଗୁଡିକର ଯାଞ୍ଚ କରେ ଯେ, ଗଛ ଗୁଡିକ ସୁସ୍ଥ ଅଛନ୍ତି କି ନାହିଁ । ଆବଶ୍ୟକ ସ୍ଥଳେ ଗଛ ଗୁଡିକର ଉପଚାର ମଧ୍ୟ କରାଯାଏ ।
ଟ୍ରି ଆମ୍ବୁଲାନ୍ସରେ ସବୁବେଳେ ୬ଜଣିଆ କର୍ମଚାରୀ ରହିଥାନ୍ତି । ଏମାନେ ଆମ୍ବୁଲାନ୍ସ ନେଇ ସକାଳ ୭ଟାରୁ ବାହାରି ଯାନ୍ତି ଯେ ସନ୍ଧ୍ୟା ୫ଟା ଯାଏଁ ସହରର ଗଛ ମାନଙ୍କ ରକ୍ଷାବେକ୍ଷଣରେ ଲାଗିଥାନ୍ତି । ପ୍ରଥମେ ଏହି ସଂସ୍ଥାକୁ ୩୫ଜଣ ମିଶି ଆରମ୍ଭ କରିଥିଲେ । ହେଲେ ଏପରି ଏକ ସକାରାତ୍ମକ କାମକୁ ଦେଖି ଏଥିରେ ୭୫୦ରୁ ଅଧିକ ଲୋକ ଯୋଡି ହେଲେଣି । ନିଜ ନିଜ ପକେଟରୁ କିଛି ଟଙ୍କା ଦେଇ ଗଛ ମାନଙ୍କ ପାଇଁ ବିନଯୋଗ କରନ୍ତି । ଏବେ ତ ସ୍ଥାନୀୟ ଲୋକ ଏହାକୁ ପ୍ରଶଂସା କରୁଛନ୍ତି । ନମୋକାର ସଂସ୍ଥାର ଏହି ଟ୍ରି ଆମ୍ବୁଲାନ୍ସ ଲୋକଙକ ମନରେ ଉଜାଗର ଗରିଛି ପ୍ରକୃତି ପ୍ରତି ଥିବା ପ୍ରତ୍ୟେକଙ୍କର ଦାୟିତ୍ୱବୋଧକୁ ।