ଆମାଜନ ମୁଖ୍ୟ ଜେଫ୍ ବେଜୋସଙ୍କ ଭାରତ ଗସ୍ତକୁ ବିରୋଧ । ଓଡିଶାର ୮ଟି ସହରରେ ବ୍ୟବସାୟୀଙ୍କ ଜୋରଦାର ପ୍ରତିବାଦ
ରାଜଧାନୀ ଭୁବନେଶ୍ୱରରେ ୧୦ରୁ ଅଧିକ ବ୍ୟବସାୟୀ ସଙ୍ଗଠନ ବିରୋଧ ପ୍ରଦର୍ଶନ
କନକ ବ୍ୟୁରୋ: ଆମାଜନ ମୁଖ୍ୟ ଜେଫ୍ ବେଜୋସଙ୍କ ଭାରତ ଗସ୍ତକୁ ଓଡିଶାର ବ୍ୟବସାୟୀଙ୍କ ବିରୋଧ । ରାଜ୍ୟର ୮ ଟି ସହରରେ ଏହାକୁ ନେଇ ପ୍ରତିବାଦ କରାଯାଉଛି । ରାଜଧାନୀ ଭୁବନେଶ୍ୱରରେ ୧୦ ରୁ ଅଧିକ ବ୍ୟବସାୟୀ ସଙ୍ଗଠନ ବିରୋଧ ପ୍ରଦର୍ଶନ କରୁଛନ୍ତି । ବେଜୋସଙ୍କ ଗସ୍ତ ଦିନକୁ ବ୍ୟବସାୟୀ ପ୍ରତିବାଦ ଦିବସ ଭାବେ ପାଳନ କରିବେ ବୋଲି କହିଛନ୍ତି । ଆଜି ଆମାଜନ୍ ମୁଖ୍ୟ ଜେଫ୍ ବେଜୋସ ଭାରତ ଆସିବା କାର୍ଯ୍ୟକ୍ରମ ରହିଛି ।
Kanak News is now on WhatsApp
Join and get latest news updates delivered to you via WhatsApp
ତେବେ ଏହି ଗସ୍ତକୁ ବିରୋଧ କରିବାକୁ ଅଂଟା ଭିଡିଛି ଭାରତୀୟ ବ୍ୟବସାୟୀ ସଂଘ, ସର୍ବଭାରତୀୟ ମୋବାଇଲ ରିଟେଲର୍ସ ସଂଘ, ସର୍ବ ଭାରତୀୟ ଖାଉଟି ଉତ୍ପାଦ ବିତରକ ମହାସଂଘ ସମେତ ୫୦୦୦ ରୁ ଅଧିକ ବଣିକ ସଂଘ । ଆମାଜନ ଏବଂ ୱାଲମାର୍ଟ ମାଲିକାନାରେ ପରିଚାଳିତ ଫ୍ଲିପକାର୍ଟ ଭଳି କମ୍ପାନୀଙ୍କ ଆଧିପତ୍ୟ ଭାରତର ଖୁଚୁରା ବ୍ୟବସାୟରେ ବଢ଼ିବାରେ ଲାଗିଛି । ଗ୍ରାହକଙ୍କୁ ଆକର୍ଷିତ କରିବାକୁ କମ୍ପାନୀ ବିପୁଳ ରିହାତି ଏବଂ ସ୍ୱତନ୍ତ୍ର ଅଫର ପ୍ରଦାନ କରୁଛନ୍ତି । ଏପରି ସ୍ଥିତିରେ ଖୁଚୁରା ବ୍ୟବସାୟୀ ସେମାନଙ୍କ ସହିତ ପ୍ରତିଯୋଗୀତା କରିପାରୁନଥିବାରୁ , ଆମାଜନ ମୁଖ୍ୟଙ୍କ ଭାରତ ଗସ୍ତକୁ ସେମାନେ ବିରୋଧ କରୁଛନ୍ତି ।