କନକ ବ୍ୟୁରୋ :  ଲତା ମଙ୍ଗେଶକରଙ୍କ ଦେହାନ୍ତ ପରେ ସାରା ଦେଶରେ ଶୋକର ଛାୟା ଖେଳି ଯାଇଛି । ରାଷ୍ଟ୍ରପତି, ପ୍ରଧାନମନ୍ତ୍ରୀଙ୍କ ସମେତ ଦେଶର ଅନେକ ସେଲିବ୍ରେଟି ଲତାଙ୍କ ମୃତ୍ୟୁରେ ମର୍ମାହତ ହୋଇ ଶୋକ ପ୍ରକାଶ କରିଛନ୍ତି । ହେଲେ ଜଣେ ଭାରତୀୟ ଗାୟକଙ୍କ ମୃତ୍ୟୁରେ ବି ମର୍ମାହତ ହୋଇପଡିଛି ପଡୋଶୀ ଦେଶ ପାକିସ୍ତାନ । ପାକିସ୍ତାନର ଅନେକ ନେତା ଓ ସେଲିବ୍ରେଟିମାନେ ସୋସିଆଲ ମଡିଆ ମାଧ୍ୟମରେ ଲତା ମଙ୍ଗେଶକରଙ୍କୁ ଶ୍ରଦ୍ଧାଞ୍ଜଳୀ ଜ୍ଞାପନ କରିଛନ୍ତି ।

Advertisment

ପାକିସ୍ତାନର ସଂଘୀୟ ସୂଚନା ଓ ପ୍ରଶାରଣ ମନ୍ତ୍ରୀ ଫବାଦ ହୁସେନ ଲେଖିଛନ୍ତି “ଭାରତର ଜଣେ କିମ୍ବଦନ୍ତୀ ଚାଲିଗଲେ” । ସେ ଆହୁରି ଲେଖିଛନ୍ତି କି, ଲତା ଅନେକ ଦଶକଧରି ସଂଗୀତ ଦୁନିଆରେ ରାଜ କରୁଥିଲେ, ସେ ସଂଗୀତର ରାଣିଥିଲେ । ସେ ଚାଲିଗଲେ ସିନା ହେଲେ ଆଗାମୀ ପିଢିପାଇଁ ବି ସେ ସ୍ୱରର ଛାପ ଛାଡିଯାଇଛନ୍ତି ।

କେବଳ ଫବାଦ ହୁସେନ ନୁହଁନ୍ତି ପାକିସ୍ତାନର ଜଣାଶୁଣା ନିବେଶକ ତଥା ବ୍ୟାଙ୍କର ମୀର ମହମ୍ମଦ ଅଲ୍ଲୀ ଖାନ ବି ଲତାଙ୍କ ମୃତ୍ୟୁରେ ଶୋକ ପ୍ରକାଶ କରି ସୋସିଆଲ ମିଡିଆରେ ଶ୍ରଦ୍ଧାଞ୍ଜଳୀ ଦେଇଛନ୍ତି । ସେ ଲେଖିଛନ୍ତି କି ଲତା ଏକାଧାରରେ ଭାରତ ପାଇଁ ଜଣେ ଲିଜାଣ୍ଡ ଓ ଆଇକନ ଥିଲେ । ସେ ୭୦ ବର୍ଷ ଧରି ଲୋକମାନଙ୍କର ମନୋରଞ୍ଜନ କରିବାରେ ସଫଳ ହୋଇଛନ୍ତି ।

ମନ୍ତ୍ରୀ ଓ ବ୍ୟବସାୟୀଙ୍କ ପରେ ପାକିସ୍ତାନର ଲୋକପ୍ରିୟ ଗାୟକ ଅଲ୍ଲୀ ଜଫର ଲତାଙ୍କ ଗୀତକୁ ନିଜ କଣ୍ଠରେ ଗାଇ ଲେଖିଛନ୍ତି କି ଲତା ମଙ୍ଗେଶକରଙ୍କ ଶ୍ରଦ୍ଧାଞ୍ଜଳୀ ଲେଖିବାକୁ ମୋ ଓଠରେ ଭାଷା ନାହିଁ । କେବଳ ସଂଗୀତକୁ ନିଜ ଜୀବନର ମାନେ ବୁଝିଥିବା ଜଣେ କଳାକାରକୁ କେବେ ବି ମୃତ୍ୟୁ ସ୍ପର୍ଶ କରିପାରିବ ନାହିଁ , ତାଙ୍କ ଆତ୍ମାକୁ ଶାନ୍ତି ମିଳୁ ।