ବ୍ରଜରାଜନଗର ପାଇଁ ବିଜେଡି ଖୋଲିଲା କାର୍ଡ । ଦିବଙ୍ଗତ କିଶୋର ମହାନ୍ତିଙ୍କ ପତ୍ନୀଙ୍କୁ ପ୍ରାର୍ଥୀ କଲା ଦଳ, ବିଜେପିରୁ ରାଧାରାଣୀ ଓ କଂଗ୍ରେସରୁ କିଶୋର ଦେବେ ଟକ୍କର ।
କନକ ବ୍ୟୁରୋ : ଶେଷରେ ବ୍ରଜରାଜନଗର ଉପ-ନିର୍ବାଚନ ପାଇଁ ବିଜେଡି ପ୍ରାର୍ଥୀ ଘୋଷଣା କରିଛି । ପଶ୍ଚିମ ଓଡିଶାର ପ୍ରମୁଖ ଚେହେରା ସ୍ୱର୍ଗତ କିଶୋର ମହାନ୍ତିଙ୍କ ଧର୍ମପତ୍ନୀ ଅଳକା ମହାନ୍ତି ଏହି ଆସନରୁ ପ୍ରାର୍ଥୀ ହୋଇଛନ୍ତି । କଂଗ୍ରେସ କିଶୋର ପଟେଲଙ୍କୁ ପ୍ରାର୍ଥୀତ୍ୱ ଉପରେ ମୋହର ମାରିଛି । ୨୦୧୯ରେ କିଶୋର ମହାନ୍ତିଙ୍କ ବିରୋଧରେ ଲଢି ଅଳ୍ପ ବ୍ୟବଧାନରେ ହାରିଥିବା ରାଧାରାଣୀ ଏହି ଆସନରୁ ବିଜେପି ପ୍ରାର୍ଥୀ ହୋଇଛନ୍ତି । ଏବେ ଏଠାରେ ଅଳକା, ରାଧାରଣୀ ଓ କିଶୋରଙ୍କ ମଧ୍ୟରେ ଟକ୍କର ହେବ ।
Kanak News is now on WhatsApp
Join and get latest news updates delivered to you via WhatsApp
ପୂର୍ବତନ ବିଧାୟକ କିଶୋର ମହାନ୍ତିଙ୍କ ଅବର୍ତମାନରେ ବ୍ରଜରାଜନଗର ଲଢେଇ ପାଇଁ ସବୁଠାରୁ ଦମଦାର ପ୍ରାର୍ଥୀ ଚୟନ କରିବାକୁ ଯାଇ ଅଳକା ମହାନ୍ତିଙ୍କ ଉପରେ ଦଳ ବିଶ୍ୱାସ କରିଛି । ପ୍ରଥମ ଥର ପାଇଁ ୨୦୧୯ରେ ବିଜେଡି ଏହି ଆସନ ଅକ୍ତିଆର କରିଥିବାବେଳେ ଏଥର ଅନୁକମ୍ପାମୂଳକ ଭୋଟ ହାତେଇବା ଲକ୍ଷ୍ୟରେ ଅଛି ଦଳ । ଆଉ ସ୍ୱାମୀଙ୍କ ଅଧୁରା ସ୍ୱପ୍ନକୁ ପୂରଣ କରିବା ପାଇଁ ଆହ୍ୱାନ ଦେଇଛନ୍ତି ଅଳକା ମହାନ୍ତି । ସମସ୍ତଙ୍କୁ ନେଇ ପ୍ରଚାର ମୈଦାନକୁ ଯିବେ ବୋଲି କହିଛନ୍ତି ବିଜେଡି ପ୍ରାର୍ଥୀ ।
ସେପଟେ ରାଧାରଣୀ ପଣ୍ଡା ବିଜେଡିକୁ ଟକ୍କର ଦେବା ପାଇଁ ରଣନୀତି ପ୍ରସ୍ତୁତ କରିଛନ୍ତି । ୨୦୧୪ରେ ଏହି ଆସନରୁ ବିଧାୟିକା ନିର୍ବାଚିତ ହୋଇ ବିଧାନସଭାକୁ ଆସିଥିଲେ ରାଧାରାଣୀ । କିନ୍ତୁ ୨୦୧୯ରେ ଅଳ୍ପ ବ୍ୟବଧାନରେ ହାରିଥିଲେ ବି ସ୍ଥାନୀୟ ଅଂଚଳରେ ତାଙ୍କର ରାଜନୈତିକ ଗତିବିଧି ଜାରି ରଖିଥିଲେ । ବିଳମ୍ବ ହେଲେ ବି ସେହି ପୁରୁଣା ମୁହଁ କିଶୋର ପଟେଲ ନାଁରେ ମୋହର ମାରିଛି କଂଗ୍ରେସ କେନ୍ଦ୍ରୀୟ ନେତୃତ୍ୱ । କିଶୋରଙ୍କ ପ୍ରାର୍ଥୀତ୍ୱକୁ ନେଇ ପୂର୍ବରୁ ଚର୍ଚ୍ଚା ହେଉଥିଲା । ତାଙ୍କ ନାଁକୁ କେନ୍ଦ୍ରୀୟ ନେତୃତ୍ୱ ପାଖକୁ ପଠାଯାଇଥିଲା ।
ବ୍ରଜରାଜନଗର ପାଇଁ ବିଜେଡି ପ୍ରସ୍ତୁତ କରିଛି ବଡ ପ୍ଲାନ । ୩୮ଟି ପଂଚାୟତକୁ ଜଗିବେ ଛାତ୍ର, ଯୁବ ଓ ଛାମୁଆ ସଙ୍ଗଠନ । ନିର୍ବାଚନ ପରିଚାଳନା ପାଇଁ ଏକ ୧୨ଜଣିଆ କମିଟି ଗଠନ କରିଛି ବିଜେଡି, ଯେଉଁଥିରେ ପ୍ରଣବ ପ୍ରକାଶ ଦାସ, ନବ ଦାସ, ସୁଶାନ୍ତ ସିଂ, ସୁବାସ ସିଂ ଓ ୧୪ରୁ ଅଧିକ ବିଧାୟତଙ୍କୁ ଦାୟିତ୍ୱ ମିଳିଥିବା ନେଇ ସୂଚନା ମିଳିଛି ।