କନକ ବ୍ୟୁରୋ : ଏ ଯୁଦ୍ଧ କାହା ପାଇଁ ? ରାଷ୍ଟ୍ରର ଭୌଗଳିକ ସୀମା ବୃଦ୍ଧି ପାଇଁ , ଧର୍ମକୁ ଅଗ୍ରାଧିକାର ଦେବା ପାଇଁ ନା ଅସ୍ତ୍ର ବ୍ୟବସାୟୀଙ୍କ ଲାଭ ପାଇଁ । ଏକଥା ଆମେ ଏଇଥି ପାଇଁ କହୁଛୁ ଯେ ଯଦି ଏ ସଂଘର୍ଷ ମଣିଷର ବିକାଶ ପାଇଁ, ମଣିଷର ଭଲ ପାଇଁ ତେବେ ସେହି ମଣିଷମାନଙ୍କୁ ହତ୍ୟା କରି କଣ ପ୍ରମାଣ କରିବାକୁ ଚାହୁଁଛନ୍ତି ଏହି ଶାସକ ଗୋଷ୍ଠୀ । ପ୍ରତିଶୋଧ ପରାୟଣ ଋଷ ହେଉ କି ଇସ୍ରାଏଲ । ଏ ଯୁଦ୍ଧ କେବଳ ଦେଖୁଛି କୁଢ କୁଢ ସାଧାରଣ ମଣିଷର ଶବ ଉପରେ ଧ୍ୱଂଶର ଲୀଳା । ଦେଶର ଭବିଷ୍ୟତ ବୋଲି ଆମେ ଯାହାକୁ କହୁଛୁ ସେମାନଙ୍କର ଆକୁଳ ଚିକ୍ରାର କ’ଣ ଦେଖାଯାଉନାହିଁ ସେହିମାନଙ୍କୁ ଯେଉଁମାନେ ସାଧାରଣ ଜନତାଙ୍କ ଭାଗ୍ୟ ବିଧାତା ବୋଲି ମଞ୍ଚ ଉପରେ ଡେଙ୍ଗୁରା ପିଟୁଛନ୍ତି ।

Advertisment

ଇସ୍ରାଏଲ ସେନାର ଗାଜା ଆକ୍ରମଣ ଫଳରେ ହମାସ ଚରମପନ୍ଥୀ ସଂଗଠନର କେତେ ଆତଙ୍କବାଦୀ ମୃତ୍ୟୁବରଣ କରିଛନ୍ତି ତାହା କାହାକୁ ଜଣାନାହିଁ । ହେଲେ ପ୍ରତିଶୋଧ ପରାୟଣ ଇସ୍ରାଏଲର ଆକ୍ରମଣ ହେଉ କି ହମାସ ଚରମପନ୍ଥୀ ସଂଗଠନର ଗାଜା ଆକ୍ରମଣ ହେଉ ତାହାର ଭୟଙ୍କର ପରିଣତିରୁ ବାଦ ପଡୁନାହାଁନ୍ତି ରିପୋର୍ଟର ମାନେ ।

ସଦ୍ୟ ସୂଚନା ମୁତାବକ ଲୋକପ୍ରିୟ ଗଣମାଧ୍ୟମ ଅଲ୍ ଜଜୀରାର ପତ୍ରକାର ବାଏଲ ଓଲ ଦହଦୋହଙ୍କ ପୁରା ପରିବାର ଯୁଦ୍ଧରେ ପ୍ରାଣ ହରାଇଛନ୍ତି । ଗାଜା ଉପରେ ଇସ୍ରାଏଲ ତରଫରୁ କରାଯାଇଥିବା ବିମାନ ଆକ୍ରମଣ ଫଳରେ ଏହି ସାମ୍ବାଦିକଙ୍କ ପତ୍ନୀ, ଦୁଇ ପୁଅ ଓ ଝିଅ ସମେତ ୪ ଜଣ ସଦସ୍ୟ ପ୍ରାଣ ହରାଇଛନ୍ତି । ସାମ୍ବାଦିକ ଜଣଙ୍କ ଏକ ଅନ୍ତର୍ଜାତୀୟ ଗଣମାଧ୍ୟମ ସହ କଥାବାର୍ତ୍ତା ବେଳେ କହିଛନ୍ତି ଯେ ଇସ୍ରାଏଲ ସେନା ମହିଳା ଓ ଶିଶୁମାନଙ୍କୁ ସର୍ବାଧିକ ନିର୍ଯାତନା ଦେଉଛି ।

ସାମ୍ବାଦିକ ଜଣଙ୍କ କହିଛନ୍ତି ଯେ ଇସ୍ରାଏଲ ସେନା ବହୁ ସଂଖ୍ୟାର ଲୋକଙ୍କ ଘର ଉପରେ ବୋମାବର୍ଷା କରୁଛି । ଯଦିଓ ଏହା ଇସ୍ରାଏଲ ଦଖଲର ପରମ୍ପରା । କିନ୍ତୁ ଶେଷରେ ଆମେ ଏହି ସ୍ଥାନରେ ରହିଛୁ । ଏହା ହେଉଛି ଆମର ଭାଗ୍ୟ, ଆମର ପସନ୍ଦ ଏବଂ ଧର୍ଯ୍ୟ ଏବଂ ଆମେ ଏହି ରାସ୍ତାରୁ ବିଚ୍ୟୁତ ହେବୁନାହିଁ । ଇସ୍ରାଏଲ- ଗାଜା ଯୁଦ୍ଧ ସଂଘର୍ଷକୁ କଭର କରୁଥିବା ୫୩ ବର୍ଷିୟ ଦହଦାଓ ଜଣେ ଜଣାଶୁଣା ଅଲ୍ ଜଜୀରା ସାମ୍ବାଦିକ । ପିଲା ଓ ପତ୍ନୀଙ୍କ ମୃତ୍ୟୁ ଖବର ପାଇବା ପରେ ସେ ଗାଜାରେ ଯୁଦ୍ଧର ସିଧା ପ୍ରସାରଣ କରୁଥିଲେ । ପତ୍ନୀ ଓ ପିଲାଙ୍କ ମୃତ୍ୟୁ ଖବର ଶୁଣିବା ମାତ୍ରେ ସେ ସମ୍ପୂର୍ଣ୍ଣ ସ୍ତବ୍ଧ ହୋଇଯାଇଥିଲେ ।