ଶେଷରେ ସତ ମାନିଲେ ଆକାଶ । କହିଲେ, ଟାଟା ମୋଟର୍ସରେ କରିନଥିଲେ ଚାକିରି । ସେପଟେ ଚାକିରି ଦେବା ପାଇଁ ଟଙ୍କା ନେଇଥିବାର ଆସିଲା ଅଭିଯୋଗ
କନକ ବ୍ୟୁରୋ : କଳାଧନରେ କୁବେର ପାଲଟିଥିବା ଆଇଏଫଏସ ଅଭୟକାନ୍ତ ପାଠକଙ୍କ ପୁଅ ଆକାଶ ପାଠକ । ଟାଟା ମୋଟର୍ସର ଏମଡି ଭାବେ ପରିଚୟ ଦେଇ ନିଯୁକ୍ତି ଦେବା ବାହାନାରେ ବେକାର ଯୁବକ-ଯୁବତୀଙ୍କୁ ଠକିଥିଲେ । ଟାର୍ଟର ବିମାନ ଭଡ଼ା ନେଇ ଆକାଶରେ ଉଡୁଥିଲେ, ବଡ଼ ବଡ଼ ହୋଟେଲରେ ଲକ୍ଷ ଲକ୍ଷ ଟଙ୍କା ଉଡାଇ ଅୟସ ଆରାମରେ ଦିନ କାଟୁଥିଲେ ।ଦ୍ୱିତୀୟ ଦିନର ଜୋରା ବେଳେ ଭିଜିଲାନ୍ସ ଆଗରେ ସତ ମାନି ଯାଇଛନ୍ତି ମିଛ ଓ ଜାଲିଆତିର ସୌଦାଗର ଆକାଶ ପାଠକ ।
Kanak News is now on WhatsApp
Join and get latest news updates delivered to you via WhatsApp
ରିମାଣ୍ଡରେ ନେଇ ଯେତେବେଳେ ଭିଜିଲାନ୍ସ ଗୁଡାଇ ତୁଡାଇ ପ୍ରଶ୍ନ କରିଛି, ସେତେବେଳେ ସତ ମାନି ଯାଇଛନ୍ତି ଆକାଶ ପାଠକ । ଭିଜିଲ୍ାନ୍ସ ସୂଚନା ଅନୁସାରେ, ଆକାଶ ସ୍ୱୀକାର କରିଛନ୍ତି ଟାଟା ମୋଟର୍ସରେ ସେ ଚାକିରି କରି ନଥିଲେ । ଚାର୍ଟର ବିମାନ ଭଡ଼ା ନେଇଥିବା କଥା ମଧ୍ୟ ଭିଜିଲାନ୍ସକୁ କହିଛନ୍ତି ଆକାଶ ।
ପାଣି ଭଳି ଲକ୍ଷ ଲକ୍ଷ ଟଙ୍କା ଖର୍ଚ୍ଚ କରି ଚାର୍ଟର ବିମାନରେ ଉଡୁଥିଲେ ଆକାଶ । ଭିଜିଲାନ୍ସ କହିଛି, ଏକଥା ବି ମାନି ଯାଇଛନ୍ତି ଆକାଶ । ଯେତେବେଳେ ଲକଡାଉନ ଚାଲିଥିଲା, ସାରା ଦେଶର ଲୋକ ଜୀବନ-ଜୀବିକା ପାଇଁ ସଂଘର୍ଷ କରୁଥିଲେ, ସେତେବେଳେ ପାଠକ ପରିବାର ଓ ପ୍ରଦୀପ ପାଣିଗ୍ରାହୀଙ୍କ ପରିବାର ଅୟସ ଆରାମରେ ପଂଚ ତାରକା ହୋଟେଲରେ ଦିନ କାଟୁଥିବା ଅଭିଯୋଗ ହୋଇଥିଲା । ପ୍ରଦୀପ ପାଣିଗ୍ରାହୀଙ୍କ ସହ କି ସଂପର୍କ ରହିଛି, କେବେ ଠାରୁ ସେମାନଙ୍କ ସହ ସଂପର୍କ, ଭିଜିଲାନ୍ସକୁ କହିଛନ୍ତି ଆକାଶ ।
ଟାଟା ମୋଟର୍ସରେ ଚାକିରି କରିନଥିବା ନେଇ ଆକାଶ ମାନି ଯାଇଥିବା ବେଳେ ତାଙ୍କ ବ୍ୟାଙ୍କ ଆକାଉଂଟକୁ ଏତେ ଟଙ୍କା କେମିତି ଆସିଲା ପ୍ରଶ୍ନ କରିଥିଲା ଭିଜିଲାନ୍ସ । ତେବେ ଏହି ପ୍ରଶ୍ନର ଉତରରେ ତାଳମେଳ ରହୁନଥିବା ଭିଜିଲାନ୍ସ ସୂତ୍ରରୁ ଜଣାପଡିଛି ।
ଭିଜିଲାନ୍ସ ଜାଣିବାକୁ ପାଇଥିଲା, ଆକାଶ ପାଠକଙ୍କ ୩ ଟି ବ୍ୟାଙ୍କ ଆକାଉଂଟରେ ପ୍ରାୟ ୧୫ କୋଟି ଟଙ୍କା ଡିପୋଜିଟ୍ ହୋଇଛି । ପୁନେ ଓ ଭୁବନେଶ୍ୱରରେ ଥିବା ଏହିସବୁ ଆକାଉଂଟକୁ କେଉଁଠୁ ଏତେ ଟଙ୍କା ଆସିଲା, କାହିଁକି କିଏ ତାଙ୍କୁ ଏତେ ଟଙ୍କା ଦେଇଛି, ଆକାଶଙ୍କ ଠାରୁ ଜାଣବାକୁ ଚାହିଁଥିଲା ଭିଜିଲାନ୍ସ । ତେବେ ଏ ନେଇ ବାରମ୍ବାର କଥା ବଦଳାଉଛନ୍ତି ଆକାଶ । ତେବେ ସତ ଜାଣିବାକୁ ପଲିଗ୍ରାଫ ଟେଷ୍ଟ ପାଇଁ କୋର୍ଟରେ ଆବେଦନ କରିପାରେ ଭିଜିଲାନ୍ସ ।
ସେପଟେ ଲାପଟପ୍ ଓ ମୋବାଇଲ୍ ଫୋନ ଯାଂଚରୁ କେଉଁ ବ୍ୟକ୍ତି ଓ କେଉଁ ସଂସ୍ଥା ନିକଟରୁ ଟଙ୍କା ଆସିଛି, ଏ ନେଇ ଭିଜିଲାନ୍ସ ହାତରେ ଅନେକ କିଛି ତଥ୍ୟ ଲାଗିଛି । ସେମାନଙ୍କ ନିକଟରୁ ଆକାଶଙ୍କ ଆର୍ଥିକ କାରବାରର ରହସ୍ୟ ଖୋଲିବ ବୋଲି ଆଶା କରାଯାଉଛି ।