ସାରା ଭାରତରେ ଚାଲିଥିଲା ଆକାଶର ନେଟୱାର୍କ: କେବଳ ଓଡିଶାରେ ନୁହେଁ ଅନ୍ୟ ରାଜ୍ୟରେ ବି ଠକେଇ କରିଛି ଧୂର୍ତ୍ତ

କନକ ବ୍ୟୁରୋ: ସାରା ଭାରତରେ ଚାଲିଥିଲା ଆକାଶ ପାଠକଙ୍କ ନେଟୱାର୍କ । କେବଳ ଓଡିଶାରେ ନୁହେଁ ଅନ୍ୟ ରାଜ୍ୟରେ ବି ଠକେଇ କରିଥିଲା ଧୂର୍ତ ଆକାଶ ପାଠକ । ଆକାଶର ପିଏ ଡେଭିଡ୍ ପିଟରଙ୍କୁ ଜେରା କରିବାବେଳେ କ୍ରାଇମବ୍ରାଂଚକୁ ଏଭଳି ଚମକାଇ ଦେବା ଭଳି ତଥ୍ୟ ମିଳିଛି । ଗତକାଲିଠୁ ଡେଭିଡ ପିଟରଙ୍କୁ ଜେରା କରୁଛି କ୍ରାଇମବ୍ରାଂଚ । ଆକାଶ ପାଠକ ଟାଟା ମୋଟର୍ସରେ ଚାକିରୀ କରିନଥିବା ସେ ଜାଣି ନଥିଲେ ବୋଲି ଜେରା ବେଳେ କହିଛନ୍ତି । ତେବେ ଆସନ୍ତାକାଲି ଆକାଶ ପାଠକଙ୍କୁ ନେଇ କ୍ରାଇମବ୍ରାଂଚ ବଡ ତଥ୍ୟ ଦେଇପାରେ ବୋଲି ସୂଚନା ମିଳିଛି ।

ସେପଟେ ସରିଲା ପାଠକ ବାପପୁଅଙ୍କ ରିମାଣ୍ଡ ଅବଧି । ଉଭୟ ବାପ ପୁଅଙ୍କୁ କୋର୍ଟରେ ହାଜର କରାଯାଇଛି । ୩ ଦିନଆ ରିମାଣ୍ଡରେ ନେଇ ଅଭୟକାନ୍ତ ପାଠକ ଓ ପୁଅ ଆକାଶ ପାଠକଙ୍କୁ ଘନଘନ ଜେରା କରିଥିଲା ଭିଜିଲାନ୍ସ ଏସଆଇଟି । ଉଭୟ ବାପ, ପୁଅଙ୍କର ଆଜି ସ୍ୱାସ୍ଥ୍ୟ ପରୀକ୍ଷା ପରେ କୋର୍ଟରେ ହାଜର କରାଯାଇଛି । ଆର୍ଥିକ କାରବାର ଓ ଠକେଇ ନେଇ ଅଭୟକାନ୍ତ ପାଠକ ଓ ଆକାଶ ପାଠକଙ୍କୁ ଜେରା କରାଯାଇଥିଲା । ଗତକାଲି ଜେରା ବେଳେ ଆକାଶ ଟାଟା ମୋଟର୍ସରେ ଚାକିରି କରିନଥିବା ନେଇ ସ୍ୱୀକାର କରିଥିଲେ । ତେବେ ଆକାଉଂଟକୁ କୋଟି କୋଟି ଟଙ୍କା ଆସିବା ନେଇ ସେ ନିଜର ମତ ବଦଳାଉଥିବା ଭିଜିଲାନ୍ସ ପକ୍ଷରୁ ଜଣାପଡିଥିଲା ।