ଅଜିତ୍ ଅଗରକର ହେବେ ବିସିସିଆଇ ଚୟନ କମିଟିର ମୁଖ୍ୟ । କମିଟିର ତାଲିକାରେ ପ୍ରକାଶ ପାଇଲା ନାମ । ଓଡିଶାରୁ ଶିବସୁନ୍ଦର ଦାସ ବି ହୋଇପାରନ୍ତି ସାମିଲ
କନକ ବ୍ୟୁରୋ : ଭାରତୀୟ ଟିମ୍ ର ନୂଆ ଚୟନକର୍ତ୍ତା ଚୟନ ପ୍ରକ୍ରିୟା ଏବେ ଶେଷ ପର୍ଯ୍ୟାୟରେ ପହଂଚିଛି । ବିସିସିଆଇର ପୂର୍ବ କ୍ରିକେଟର ଅଜିତ ଅଗରକରଙ୍କ ସମେତ ୫ ପୂର୍ବତନ ଖେଳାଳୀଙକ ନାମ ସିଲେକ୍ସନ କମିଟି ପାଇଁ ଚୟନ କରାଯାଇଛି । ବିସିସିଆଇ ଅଗରକରଙ୍କ ବ୍ୟତିତ ଚେତନ ଶର୍ମା, ମନିନ୍ଦର ସିଂ, ନୟମ ମୋଙ୍ଗିଆ ଓ ଏସ୍.ଏସ. ଦାସଙ୍କ ନାମ କୁ ସର୍ଟଲିଷ୍ଟ କରିଛି ।
Kanak News is now on WhatsApp
Join and get latest news updates delivered to you via WhatsApp
କହିରଖୁ କି ଏହି ପଦ ପାଇଁ ଅଗରକରଙ୍କ ସମେତ ମୋଟ ୧୧ ଜଣ ପୂର୍ବତନ ଖେଳାଳି ଆବେଦନ କରିଥିଲେ । ଯାହାଙ୍କ ମଧ୍ୟରୁ ପଶ୍ଚିମ ଜୋନରେ ଅଜିତ ଅଗରକର, ଅଭୟ କୁଷବିର୍ଲା ଓ ନୟନ ମୋଙ୍ଗିଆ ଆବେଦନ କରିଥିଲେ । ସେହିଭଳି ଭତର ଜୋନରୁ ଚେତନ ଶର୍ମା, ମନିନ୍ଦର ସିଂ, ବିଜୟ ଡାହିୟା, ଅଜୟ ରାତ୍ରା, ଓ ନିଖିଲ ଚୋପ୍ରା ନାମାଙ୍କନ ଭରିଥିଲେ । ପୂର୍ବ ଜୋନରୁ ଶିବସୁନ୍ଦର ଦାସ, ଦେବାଶିଷ ମହାନ୍ତି ଓ ରାଣାଦେବ ବୋଷ ଆବେଦନ କରିଥିଲେ । ଏହି ୧୧ ଜଣଙ୍କ ମଧ୍ୟରୁ ୫ ଜଣଙ୍କ ନାମ ସିଏସି ସିଲେକ୍ସନ କମିଟିକୁ ପଠାଇଥିଲା । ଯାହାଙ୍କ ମଧ୍ୟରେ ଅଗରକର, ଚେତନ ଶର୍ମା,ମନିନ୍ଦର ସିଂ, ନୟନ ମୋଙ୍ଗିଆ ଓ ଶିବସୁନ୍ଦର ଦାସଙ୍କ ନାମ ସାମିଲ ଅଛି ।
ବିସିସିଆଇର ନୂଆ ସମ୍ବିଧାନ ମୁତାବକ ସବୁଠାରୁ ଅଧିକ ଟେଷ୍ଟ ମ୍ୟାଚ୍ ଖେଳିଥିବା ଖେଳାଳୀ ହିଁ ମୁଖ୍ୟ ଚୟନକର୍ତ୍ତା ପଦରେ ଉପସ୍ଥାପିତ ହୋଇପାରିବ । ତେଣୁ ଆବେଦନ କରିଥିବା ୧୧ ଜଣ କ୍ରିକେଟରଙ୍କ ମଧ୍ୟରୁ ଅଜିତ ଅଗରକର ସବୁଠାରୁ ଅଧିକ ୨୬ ଟି ଟେଷ୍ଟମ୍ୟାଚ୍ ଖେଳି ସାରିଛନ୍ତି । ଏହା ବ୍ୟତିତ ଅଗରକର ଭାରତ ପାଇଁ ୧୯୧ ଟି ଏକଦିବସୀୟ ମ୍ୟାଚ୍ ବି ଖେଳିଛନ୍ତି । ତେଣୁ ସେ ମୁଖ୍ୟ ଚୟନକର୍ତ୍ତା ପଦବିରେ ବସିବା ପାଇଁ ସବୁଠାରୁ ବଡ ଦାବିଦାର ଭାବେ ଉଭା ହୋଇଛନ୍ତି । ଏନେଇ ମଦନ ଲାଲଙ୍କ ଅଧ୍ୟକ୍ଷତାରେ ଚାଲିଥିବା କ୍ରିକେଟ ଉପଦେଷ୍ଟା କମିଟି ୫ ଜଣଙ୍କ ନାମ ସର୍ଟଲିଷ୍ଟ କରିଛି । ଏହା ପରେ ସର୍ଟଲିଷ୍ଟରେ ଥିବା ୫ ଜଣଙ୍କର ଇଣ୍ଟରଭ୍ୟୁ ହେବ । ଯାହାଙ୍କ ମଧ୍ୟରୁ ୩ ଜଣଙ୍କୁ ଚୟନ କରାଯିବ ।
କହିରଖୁ କି ବର୍ତ୍ତମାନ ବିସିସିଆଇର ଚୟନ କମିଟିରେ ସଦସ୍ୟ ଥିବା ଜତିନ ପରାଞ୍ଜୟ, ଦେବାଙ୍ଗ ଗାନ୍ଧୀ ଓ ଶରଣଦୀପ ସିଂଙ୍କର କାର୍ଯ୍ୟକାଳ ସମାପ୍ତ ହୋଇଛି । ତାଙ୍କ ସ୍ଥାନରେ ପଶ୍ଚିମ ଜୋନରୁ ଅଜିତ ଅଗରକର ଓ ପୂର୍ବ ଜୋନରୁ ଶିବସୁନ୍ଦର ଦାସଙ୍କୁ ଅବସ୍ଥାପିତ କରାଯାଇପାରେ । ଏହି ଚୟନ କମିଟି ଇଂଲଣ୍ଡ ବିରୋଧରେ ହେବାକୁ ଥିବା ଘରୋଇ ମ୍ୟାଚ୍ ପୂର୍ବରୁ ତାଙ୍କର କାମ ଆରମ୍ଭ କରିବେ ବୋଲି ସୂଚନା ମିଳିଛି ।