ଏପରି ସହର, ଯେଉଁଠି ନାହିଁ ସରକାର କି ଆଇନ କାନୁନ । ରହିବା ପାଇଁ ଘରଭଡା ଦେବାକୁ ପଡେନି । ଜାଣନ୍ତୁ କେଉଁଠି ଅଛି ଏପରି ସହର
କନକ ବ୍ୟୁରୋ : ବିଶ୍ୱରେ ଯେତେ ବି ଦେଶ ରହିଛି, ସବୁଠି ସରକାର ରହିଛନ୍ତି । କେଉଁଠି ରାଷ୍ଟ୍ରପତି ଶାସନ ଚାଲେ ତ ଆଉ କେଉଁଠି ପ୍ରଧାନମନ୍ତ୍ରୀଙ୍କ ଶାସନ ଚାଲିଥାଏ । କିନ୍ତୁ ଦୁନିଆରେ ଏପରି ଏକ ସ୍ଥାନ ରହିଛି, ଯେଉଁଠି ନା ସରକାର ଅଛନ୍ତି ନା ସେଠାକାର ଲୋକେ ଦେଶ ଦୁନିଆର ଖବର ପାଆନ୍ତି । ସେମାନଙ୍କ ପାଖରେ ମୋବାଇଲ କି ଟିଭି ମଧ୍ୟ ନାହିଁ । ଟିଭି, ମୋବାଇଲ କଥା ତ ଛାଡ ଏହି ସ୍ଥାନରେ ବିଜୁଲି ସୁବିଧା ବି ନାହିଁ । ସବୁଠୁ ବଡ କଥା ହେଉଛି ଏହି ସ୍ଥାନରେ ରହିବା ପାଇଁ ଲୋକଙ୍କୁ ଜମୀ କିଣିବାକୁ ପଡେନି, କି ରହିବା ପାଇଁ ଭଡା ଦେବାକୁ ପଡେନି । ତେବେ ଆସନ୍ତୁ ଜାଣିବା କେଉଁଠି ଏପରି ସ୍ଥାନ ରହିଛି ଯେଉଁଠାରେ ଭିନ୍ନ ଏକ ଜୀବନ ବଞ୍ଚୁଛନ୍ତି ଲୋକେ ।
ସ୍ଲାବ୍ ସିଟି… ଆମେରିକାର କାଲିଫୋର୍ଣ୍ଣିଆ ସ୍ଥିତ ଏକ ସ୍ଥାନ । ଯେଉଁଠି ବନ୍ଧୁକ ଓ ଡ୍ରଗ୍ସର ଦବଦବା ରହିଛି । ମାନସିକ ସମସ୍ୟାରେ ପୀଡିତ ଲୋକେ ଏଠାକୁ ଯାଆନ୍ତି ବା ଆଇନ କାନୁନର ରକ୍ଷା ପାଇଁ ଏଠାକୁ ଲୋକେ ଯାଇଥାନ୍ତି । କାରଣ ଏହି ମରୁ ଅଞ୍ଚଳରେ ସରକାର ବା ପ୍ରଶାସନ ନାହିଁ । ଯେଉଁମାନେ ବାସହରା ବା ସମାଜରୁ ବାସନ୍ଦ, ସେହିମାନଙ୍କ ପାଇଁ ସ୍ଲାବ୍ ସିଟି ହେଉଛି ଏକମାତ୍ର ଠିକଣା ।
ତେବେ ଏକ ଟିଭି ଚ୍ୟାନେଲର ସଂଚାଳକ ବେନ୍ ଫୋଗଲ ନିଜର ଏକ କାର୍ଯ୍ୟକ୍ରମରେ ଏହି ସ୍ଲାବ୍ ସିଟିର ଖୁଲାସା କରିଥିଲେ । ଘଟଣାସ୍ଥଳକୁ ଯାଇ ସ୍ଥିତି ପରଖିବା ସହିତ, ସେଠାକାର ଲୋକଙ୍କ ସହ କଥା ମଧ୍ୟ ହୋଇଥିଲେ । ସ୍ଲାବ୍ ସିଟିକୁ ନେଇ ଫୋଗାଲ କହନ୍ତି, ମରୁ ଅଞ୍ଚଳରେ ଥିବା ଏହି ସହରରେ ପାଣିର କୌଣସି ସୁବିଧା ନାହିଁ । ଗ୍ୟାସ୍ କିମ୍ବା ବିଜୁଳି ବ୍ୟବସ୍ଥା ବି ନାହିଁ । ୨ୟ ବିଶ୍ୱଯୁଦ୍ଧ ସମୟରେ ଆମେରିକୀୟ ସୈନ୍ୟଙ୍କ ଟ୍ରେନିଂ ପାଇଁ ଏହି ସ୍ଥାନ ନିର୍ମୀତ ହୋଇଥିଲା । ଏବଂ ୧୯୫୬ ମସିହାରେ ଏହାକୁ ନଷ୍ଟ ମଧ୍ୟ କରିଦିଆଯାଇଥିଲା । ସହରଟି କଂକ୍ରିଟ୍ ଧ୍ୱଂସସ୍ତୁପରେ ପରିଣତ ହୋଇଯାଇଥିଲା । କିନ୍ତୁ ଧିରେ ଧିରେ ଏହି ସ୍ଥାନ ନିଶାଖୋର ଏବଂ ପୂର୍ବ ସୈନ୍ୟଙ୍କ ବାସସ୍ଥଳି ପାଲଟିଲା । ଫୋଗଲ ଏମିତି କିଛି ଲୋକଙ୍କ ସହ କଥା ହୋଇଥିଲେ, ଯେଉଁମାନେ କହିଥିଲେ, ତାଙ୍କ ପାଖରେ ସମୟ ଦେଖିବା ପାଇଁ ଘଡି ନାହିଁ କି କ୍ୟାଲେଣ୍ଡର ନାହିଁ । ଏପରିକି ଦେଶ ଦୁନିଆର ଖବର ଜାଣିବା ପାଇଁ ଟିଭି ମଧ୍ୟ ନାହିଁ । ତଥାବି ଏଠାରେ ଲୋକେ ବେସ୍ ଖୁସିରେ ରହୁଛନ୍ତି । ସ୍ୱାଧୀନ ଭାବେ ଜୀବନ ନିର୍ବାହ କରୁଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ତେବେ ଏନେଇ ବେନ ଫୋଗଲଙ୍କ କହିବା କଥା ହେଉଛି, ଏହି ସହରରେ ବଞ୍ଚିବା ପାଇଁ ଅନେକ କଷ୍ଟ କରିବାକୁ ପଡେ କିନ୍ତୁ ଏଥିରୁ ଅନେକ କିଛି ସିଖିବାକୁ ମିଳେ । ସ୍ୱାଧୀନ ଭାବେ ବଞ୍ଚିବା ପାଇଁ ଏଭଳି ସ୍ଥାନର ଆବଶ୍ୟକତା ରହିଛି । ବାସ୍ ଆଇନ୍ କାନୁନର ରହିବା ଜରୁରୀ ।