ଦୀପାବଳି ପରେ ଦିଲ୍ଲୀରେ ଚିନ୍ତା ବଢାଇଲା ବାୟୁ ପ୍ରଦୂଷଣ: ଏନସିଆର ଓ ଆଖପାଖ ଅଂଚଳରେ ୪ ଶହ ଉପରେ ବିଷାକ୍ତ ବାୟୁର ମାନକ; କଟକଣାକୁ ଫୁ କରି ବାଣ ଫୁଟାଇବାରୁ ସ୍ଥିତି ହୋଇଛି ସାଂଘାତିକ
କନକ ବ୍ୟୁରୋ: କରୋନା କାଳରେ ଦିଲ୍ଲୀରେ କଟକଣା ଭିତରେ ପାଳନ ହୋଇଛି ଦୀପାବଳି । କିନ୍ତୁ କିଛି ସ୍ଥାନରେ ନିୟମର ଉଲଂଘନ ପାଇଁ ଦିଲ୍ଲୀ ବାସୀଙ୍କୁ ଭୋଗିବାକୁ ପଡିବ ଯାତନା । ଦୀପାବଳି ସମୟରେ ଦେଶର ରାଜଧାନୀ ଦିଲ୍ଲୀରେ ବାୟୁର ଗୁଣବତାମାନ ବିପଦଜନକ ସ୍ତରରେ ପହଂଚିଛି । ଦିଲ୍ଲୀରେ ବାୟୁ ଗୁଣବତା ସବୁଠୁ ଅଧିକ ଖରାପ ସ୍ଥିତିରେ ପହଂଚି ଥିବା ଜଣାପଡିଛି । ଏବେ ବିଷାକ୍ତ ବାୟୁର ବଳୟ ଦିଲ୍ଲୀକୁ ଆଚ୍ଛାଦିତ କରି ରଖୁଛି । ପ୍ରଦୂଷଣର କୁହୁଡି ଯୋଗୁଁ ସକାଳୁ ସକାଳୁ ଗାଡି ଚଳାଚଳ ମଧ୍ୟ ପ୍ରଭାବିତ ହେଉଛି ।
Kanak News is now on WhatsApp
Join and get latest news updates delivered to you via WhatsApp
ହେଲେ ସବୁଠାରୁ ଚିନ୍ତା ଜନକ କଥା ହେଉଛି, ଏହି ବିଷାକ୍ତ ବାୟୁ କରୋନା କାଳରେ ଲୋକଙ୍କ ସ୍ୱାସ୍ଥ୍ୟବସ୍ଥା ଉପରେ ଗମ୍ଭୀର ପ୍ରଭାବ ପକାଉଛି । ଶନିବାର ସକାଳେ ବାୟୁର ମାନକ ୪୨୪ ରେକର୍ଡ ହୋଇଥିଲା । ଯାହାକି ବିପଦଜନକ ସ୍ଥିତି । ଏପରି ସ୍ଥିତିରେ ଦୀପାବଳିରେ ଦିଲ୍ଲୀର ଏନସିଆର ସମେତ ଅନେକ ସ୍ଥାନରେ ବାଣ ଫୁଟା ଯାଇଥିବା ଦେଖିବାକୁ ମିଳିଛି । ଏହାକୁ ନେଇ ଦିଲ୍ଲୀ ବାସୀଙ୍କ ଚିନ୍ତା ବଢିଲାଣି । ଶନିବାର ଦିଲ୍ଲୀର ବାୟୁ ଗୁଣବତା ସୂଚକାଙ୍କ ଏକ୍ୟୁଆଇ ୪୨୪ , ଶୁକ୍ରବାର ୩୨୪, ଗୁରୁବାର ୩୧୪, ବୁଧବାର ୩୪୪ ଓ ମଙ୍ଗଳବାର ୪୭୬ ଏକ୍ୟୁ ଆଇ ରେକର୍ଡ କରାଯାଇଛି ।