କନକ ବ୍ୟୁରୋ : ୨୦୦୮ଅହମ୍ମଦାବାଦ ସିରିଜ ବିସ୍ଫୋରଣ ମାମଲାରେ ୩୮ ଜଣଙ୍କୁ ଫାଶୀ ଦଣ୍ଡାଦେଶ । ଗୁଜୁରାଟର ସ୍ପେଶାଲ କୋର୍ଟ ୩୮ ଜଣଙ୍କୁ ଫାଶୀ ଦଣ୍ଡାଦେଶ ଶୁଣାଇଥିବା ବେଳେ ୧୧ ଜଣଙ୍କୁ ଆଜୀବନ ଜେଲ ଦଣ୍ଡାଦେଶ ଶୁଣାଇଛନ୍ତି । ଏହାସହ ବିସ୍ଫୋରଣରେ ମୃତକଙ୍କ ପରିବାରକୁ ୧ ଲକ୍ଷ ଓ ଗମ୍ଭୀର ରୂପେ ଆହତ ହୋଇଥିବା ବ୍ୟକ୍ତିଙ୍କୁ ୫୦ ହଜାର ଟଙ୍କା ଓ ସାମାନ୍ୟ ଆହତ ହୋଇଥିବା ବ୍ୟକ୍ତିଙ୍କୁ ୨୫ ହଜାର ଟଙ୍କା ଅନୁକମ୍ପାମୂଳକ ସହାୟତା ରାଶି ଦେବାକୁ ନିର୍ଦ୍ଦେଶ ଦେଇଛନ୍ତି କୋର୍ଟ ।  ଆଉ ଏହା ନ୍ୟାୟିକ ଇତିହାସର ସବୁଠୁ ବିରଳ ଘଟଣା । ଏକାକାଳୀନ ୩୮ ଜଣଙ୍କୁ ଫାଶୀ ଦଣ୍ଡାଦେଶ ଦିଆଯିବା ପୂର୍ବରୁ କେବେ ଦେଖିବାକୁ ମିଳିନଥିଲା ।  ଅହମ୍ମଦାବାଦ ସିରିଜ ବିସ୍ଫୋରଣ ଘଟଣାରେ ୭୮ ଜଣ ଅଭିଯୁକ୍ତ ଥିଲେ । ପରବର୍ତ୍ତୀ ସମୟରେ ଜଣେ ଅଭିଯୁକ୍ତ ସରକାରୀ ସାକ୍ଷୀ ହୋଇ ଯାଇଥିଲେ । ତେବେ ମାମଲା ୭୭ ଜଣ ଅଭିଯୁକ୍ତଙ୍କ ବିରୋଧରେ ଚାଲିଥିଲା । ୧୧୬୩ ଜଣଙ୍କ ଠାରୁ ବୟାନ, ୬ ହଜାରରୁ ଅଧିକ ପ୍ରମାଣ ଯୋଗାଡ କରାଯାଇଥିଲା । ତେବେ ପ୍ରମାଣ ଅଭାବରୁ ୨୮ ଜଣଙ୍କୁ ନିର୍ଦ୍ଦୋଷ ଭାବେ ଖଲାସ କରାଯାଇଥିଲା । ଆଉ ଆଜି ୬୭୫୨ ପୃଷ୍ଠାର ରାୟରେ ୪୯ ଜଣଙ୍କୁ ଦୋଷୀ ସାବ୍ୟସ୍ତ କରାଯାଇଛି । ନ୍ୟାୟିକ ଇତିହାସରେ ଏହା ପ୍ରଥମଥର ପାଇଁ ହୋଇଛି ଯେତେବେଳେ ୪୯ ଜଣ ଅଭିଯୁକ୍ତଙ୍କୁ ଆତଙ୍କବାଦୀ ଭାବେ ଦୋଷୀ କରାଯାଇଛି । ୟୁଏପିଏ ଆଇନ ବଳରେ ସମସ୍ତ ୪୯ ଜଣଙ୍କୁ ଦୋଷୀ ଚିହ୍ନଟ କରାଯାଇଛି ।

Advertisment

୨୦୦୮ରେ ହୋଇଥିଲା କଣ?

୨୬ ଜୁଲାଇ ୨୦୦୮ରେ ଅହମ୍ମଦାବାଦରେ ସନ୍ଧ୍ୟା ୬ଟା ୪୫ ମିନିଟରେ ବିସ୍ଫୋରଣ ହୋଇଥିଲା । ପ୍ରଥମ ବିସ୍ଫୋରଣ ମଣିନଗର ଅଞ୍ଚଳରେ ହୋଇଥିଲା । ସେତେବେଳେ ମଣିନଗର ଏବେ ପ୍ରଧାନମନ୍ତ୍ରୀ ଥିବା ନରେନ୍ଦ୍ର ମୋଦୀଙ୍କ ନିର୍ବାଚନମଣ୍ଡଳୀ ଥିଲା । ଆଉ ଏହାପରେ ପାଖାପାଖି ୭୦ ମିନିଟ୍ ମଧ୍ୟରେ ଆଉ ୨୦ଟି ବମ ବିସ୍ଫୋରଣ ହୋଇଥିଲା । କେହି କିଛି ବୁଝି ପାରିନଥିଲେ । ଆଉ ଏହି ବିସ୍ଫୋରଣରେ ୫୬ ଲୋକଙ୍କର ଜୀବନ ଯାଇଥିବା ବେଳେ ୨୦୦ରୁ ଅଧିକ ଲୋକ ଆହତ ହୋଇଥିଲେ ।

ଆତଙ୍କବାଦୀ ମାନେ ଟିଫିନରେ ବମ୍ ରଖି ଏହାକୁ ଜନଗହଳିପୂର୍ଣ୍ଣ ସ୍ଥାନରେ ସାଇକେଲରେ ରଖିଥିଲେ । ଏହି ବିସ୍ଫୋରଣରେ ଇଣ୍ଡିଆନ ମୁଜାହିଦ୍ଦିନ, ସିମି ଆତଙ୍କବାଦୀ ସଙ୍ଗଠନ ସାମିଲ ଥିଲେ । ଆଉ ବିସ୍ଫୋରଣର ୫ ମିନିଟ୍ ପୂର୍ବରୁ ହିଁ ଆତଙ୍କବାଦୀ ମାନେ ନ୍ୟୁଜ୍ ଏଜେନ୍ସିକୁ ଏକ ମେଲ ପଠାଇ ଲେଖିଥିଲେ ଯେ, ଯାହା ଇଚ୍ଛା କ. ଯଦି ଅଟକାଇ ପାରିବ ତ ଅଟକାଇ ଦେଖାଅ ।