ଅଗ୍ନିବୀର ପ୍ରସଙ୍ଗରେ ତାତିଲା ସଂସଦ । ରାହୁଲଙ୍କ ଅଭିଯୋଗ ପରେ, ଜବାବ ରଖିଲେ ପ୍ରତିରକ୍ଷା ମନ୍ତ୍ରୀ । ପଢନ୍ତୁ, କଣ ଜବାବ ଦେଲେ ରାଜନାଥ?
କନକ ବ୍ୟୁରୋ: ଅଗ୍ନିବୀର ପ୍ରସଙ୍ଗରେ ତାତିଲା ସଂସଦ । ସୋମବାର ଦେଶରେ ଅଗ୍ନିବୀର ଯୋଜନାକୁ ନେଇ ବିରୋଧୀ ଦଳ ନେତା ରାହୁଲ ଗାନ୍ଧୀ ସଂସଦରେ ପ୍ରଶ୍ନ ଉଠାଇଛନ୍ତି । ସେ କହିଛନ୍ତି, ମୋଦୀ ସରକାର ଅଗ୍ନିବୀରଙ୍କ ମୃତ୍ୟୁ ହେଲେ ତାଙ୍କୁ ସହିଦର ମାନ୍ୟତା ଦେଉନି । ଏମିତି କି ତାଙ୍କୁ କ୍ଷତିପୂରଣ ମଧ୍ୟ ଦେଉନି । ତେଣୁ କଂଗ୍ରେସ କ୍ଷମତାକୁ ଆସିଲେ ଏହି ଯୋଜନାକୁ ହଟେଇବ । ଅଗ୍ନିବୀର ଯୋଜନା ସେନାର ନୁହେଁ ବରଂ ପିଏମଓର ସ୍କିମ ବୋଲି ସଂସଦରେ କହିଛନ୍ତି ରାହୁଲ ଗାନ୍ଧୀ ।
Kanak News is now on WhatsApp
Join and get latest news updates delivered to you via WhatsApp
ଅନ୍ୟପଟେ ଏହାର ଜବାବ୍ ରଖି କେନ୍ଦ୍ର ପ୍ରତିରକ୍ଷା ମନ୍ତ୍ରୀ ରାଜନାଥ ସିଂହ କହିଛନ୍ତି, ଅଗ୍ନିବୀର ସହିଦଙ୍କୁ ସରକାରଙ୍କ ତରଫରୁ ଏକ କୋଟି ଟଙ୍କାର କ୍ଷତିପୂରଣ ରାଶି ଯୋଗାଇ ଦିଆଯାଏ । ରାହୁଲ ଗାନ୍ଧୀ ଅଗ୍ନିବୀରଙ୍କୁ ନେଇ ଭୁଲ ବୟାନ ଦେଇଛନ୍ତି । ସେ ସଂସଦକୁ ଭୁଲେଇବାକୁ ଚେଷ୍ଟା କରୁଛନ୍ତି ।
ଜାଣିରଖିବା ଉଚିତ୍ ଯେ, ୨୦୨୨ ମସିହା ଜୁନ୍ ମାସ ୧୪ ତାରିଖରେ ମୋଦୀ ସରକାର ଅଗ୍ନିବୀର ଯୋଜନାର ଘୋଷଣା କରିଥିଲେ । ଏହି ଯୋଜନାରେ ୧୭.୫ ବର୍ଷରୁ ୨୧ ବର୍ଷ ସୀମା ଭିତରେ ଥିବା ଯୁବକ ଅଗ୍ନିବୀର ହେଇପାରିବେ ବୋଲି ନିୟମ ରହିଥିଲା । ଏହି ଯୋଜନାରେ ଭାରତୀୟ ସ୍ଥଳ ସେନା, ବାୟୁ ସେନା, ଏବଂ ନୌସେନାରେ ଯବାନମାନଙ୍କୁ ୪ ବର୍ଷ ପାଇଁ କାମ କରିବାର ସୁଯୋଗ ମିଳେ । ୪ ବର୍ଷ କାମ କରିସାରିବା ପରେ କେବଳ ୨୫ ପ୍ରତିଶତ ଯବାନଙ୍କୁ ସେନାର ସ୍ଥାୟୀ ନିଯୁକ୍ତି ମିଳେ । ହେଲେ କେନ୍ଦ୍ରର ଏହି ଯୋଜନାକୁ ବିରୋଧୀମାନେ ଲଗାତାର ବିରୋଧ କରି ଆସୁଛନ୍ତି । ନିୟମ ମୁତାବକ, ଯୁଦ୍ଧରେ ସହିଦ ହେଇଥିବା ଅଗ୍ନିବୀରଙ୍କୁ କ୍ଷତିପୂରଣ ରାଶି ମଧ୍ୟ ମିଳିଥାଏ ବୋଲି କେନ୍ଦ୍ର ପ୍ରତିରକ୍ଷା ମନ୍ତ୍ରୀ ସଂସଦରେ ଉତ୍ତର ରଖିଛନ୍ତି ।