ସବୁ ସୀମା ଲଂଘିଗଲେ ଅଗରତାଲା ଜିଲ୍ଲାପାଳ । ବିବାହ ଭୋଜି ବନ୍ଦ କରିବାକୁ ଯାଇ ଫିଲ୍ମ ଷ୍ଟାଇଲେ ଦେଖାଇଥିଲେ ଦବଙ୍ଗଗିରି ।
କନକ ବ୍ୟୁରୋ: ଆସାମର ଅଗରତାଲାରେ ସୋମବାର ରାତିରେ ଏକ ବିବାହ ମଣ୍ଡପରେ ନାଇଟ୍ କର୍ଫ୍ୟୁ ଲାଗୁ ହେବା ପରେ ବିବାହ ଭୋଜି ସରିନଥିଲା । ଏହି ସମୟରେ ସେହି ବାଟ ଦେଇ ଯାଉଥିବା ଜିଲ୍ଲାପାଳ ଶୈଳେଶ କୁମାର ଯାଦବ ମଣ୍ଡପକୁ ଯାଇଥିଲେ । ଆଉ ତାପରେ ଘଟିଥିଲା କିଛି ଅଭାବନୀୟ ଘଟଣା ।
Kanak News is now on WhatsApp
Join and get latest news updates delivered to you via WhatsApp
କୌଣସି ଫିଲ୍ମର ଖଳନାୟକ ଭଳି ଅଚାନକ ପଶି ଆସି ସମସ୍ତଙ୍କୁ ଭୟଭୀତ କରିବା ସହିତ ବଡ ପାଟି କରି ସମସ୍ତଙ୍କୁ ଡରାଇଥିଲେ ଜିଲ୍ଲାପାଳ । କେବଳ ପାଟି କରି ନଥିଲେ ବୟସ୍କ ପୁରୋହିତଙ୍କୁ ମାଡ ମଧ୍ୟ ମାରିବାକୁ ପଛାଇ ନଥିଲେ ଜିଲ୍ଲାପାଳ ବାବୁ । ଏଥିସହ ବର-କନ୍ୟା ବସିଥିବା ସ୍ଥାନକୁ ଯାଇ ସେମାନଙ୍କୁ ଡରାଇଥିଲେ । ବିବାହ ଭୋଜିରେ ଯୋଗ ଦେଇଥିବା ବୟସ୍କ, ମହିଳା ପିଲା କେହି ବି ଜିଲ୍ଳାପାଳଙ୍କ କ୍ରୋଧରୁ ଛାଡ ପାଇନଥିଲେ । ଶେଷରେ ପୋଲିସକୁ ଲଗାଇ ସମସ୍ତଙ୍କୁ ମଣ୍ଡପରୁ ତଡି ଦେଇଥିଲେ ି ଭାରତୀୟ ପ୍ରଶାସନିକ ଅଧିକାରୀ- ଶୈଳେଶ କୁମାର ଯାଦବ ।
ଜିଲ୍ଲାପାଳ ମହୋଦୟଙ୍କର ଏତିକିରେ ରାଗ ଶାନ୍ତ ହୋଇନଥିଲା । ହିନ୍ଦୀ ଚଳଚିତ୍ର ନାୟକ ଷ୍ଟାଇଲରେ ସେହି ସ୍ଥାନରୁ ସ୍ଥାନୀୟ ଥାନା ଅଧିକାରୀଙ୍କୁ କାର୍ଯ୍ୟରୁ ନିଲମ୍ବିତ କରିଥିଲେ । କହିଥିଲେ ସ୍ଥାନୀୟ ପୋଲିସ ପରିବାର ଲୋକଙ୍କଠାରୁ ଟଙ୍କା ନେଇ ସେମାନଙ୍କୁ ବିଳମ୍ବିତ ରାତି ପର୍ଯ୍ୟନ୍ତ ଭୋଜି ଆୟୋଜନ କରିବାକୁ ସୁଯୋଗ ଦେଇଥିଲେ । ତେଣୁ ଥାନା ଅଧିକାରୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ନିଆଯାଉଛି । ସେହିପରି ବିବାହ ଉତ୍ସବ ଆୟୋଜିତ ହୋଇଥିବା ମଣ୍ଡପକୁ ବର୍ଷକ ପାଇଁ ସିଲ କରିବାକୁ ଘୋଷଣା କରିଥିଲେ ।
ଜିଲ୍ଲାପାଳଙ୍କ ଏଭଳି କାର୍ଯ୍ୟକୁ ଚାରିଆଡୁ ନିନ୍ଦା କରାଯିବା ସହ ତାଙ୍କ ବିରୋଧରେ କାର୍ଯ୍ୟାନୁଷ୍ଠାନ ପାଇଁ ଦାବି କରିଛନ୍ତି ଖୋଦ ଶାସକ ଦଳର ୫ ବିଧାୟକ । ଜିଲ୍ଲାପାଳ ତାଙ୍କ କ୍ଷମତାର ଦୁରୂପ ଯୋଗ କରି ଲୋକଙ୍କୁ ଦୁର୍ବ୍ୟବହାର କରିବା ସହ ଆତଙ୍କ ସୃଷ୍ଟି କରିଥିବା ଅଭିଯୋଗ କରି ମୁଖ୍ୟ ଶାସନ ସଚିବଙ୍କୁ ଚିଠି ଲେଖିଛନ୍ତି । ଅନ୍ୟପଟେ ଏକ ସ୍ଥାନୀୟ ଗଣମାଧ୍ୟମକୁ ସାକ୍ଷାତକାର ଦେଇ ଜିଲ୍ଲାପାଳ ସଫେଇ ରଖିଛନ୍ତି । କହିଛନ୍ତି, ଯଦି ଗତ ରାତିରେ ମୋର କାର୍ଯ୍ୟ କାହାକୁ କଷ୍ଟ ଦେଇଥାଏ ସେଥିପାଇଁ ମୁଁ ଦୁଃଖିତ । କିନ୍ତୁ ଯାହା କରିଛି କେବଳ ଲୋକଙ୍କ ଭଲ ପାଇଁ କରିଛି । କାହାକୁ କଷ୍ଟ ଦେବା ବା ଅପମାନିତ କରିବା ମୋର ଉଦେଶ୍ୟ ନୁହେଁ ।