ପୁଣି ଉପରମୁହାଁ କରୋନା ସଂକ୍ରମଣ। ମହାରାଷ୍ଟ୍ରରେ ଲାଗିଲା କଟକଣା, ୫ରାଜ୍ୟକୁ କେନ୍ଦ୍ରର ଚିଠି ।
କନକ ବ୍ୟୁରୋ: ୩ ମାସର ଆଶ୍ୱସ୍ତି ପରେ ପୁଣି ଦେଶରେ କରୋନା ସଂକ୍ରମଣ ବୃଦ୍ଧି ଚିନ୍ତାର କାରଣ ପାଲଟିଛି । ଗତ କିଛି ସପ୍ତାହ ପୂର୍ବରୁ ଦୈନିକ ସଂକ୍ରମଣ ମାମଲା ହଜାର ତଳକୁ ରହୁଥିଲା । ତେବେ ଶୁକ୍ରବାର ୪ହଜାରୁ ଅଧିକ ଓ ଶନିବାର ୪ହଜାର ପାଖରେ ପହଁଞ୍ଚିଛି ଦୈନିକ ସଂକ୍ରମଣ । ଏଥିସହ ମହାମାରୀ ଦିନକରେ ୨୬ଜଣଙ୍କ ଜୀବନ ନେଇଛି । ସେପଟେ ପଜିଟିଭି ରେଟ ବୃଦ୍ଧି ଚିନ୍ତାକୁ ଦ୍ୱିଗୁଣିତ କରିଛି । କରୋନା ମାମଲା ଦ୍ରୁତ ବୃଦ୍ଧି ପରେ କେନ୍ଦ୍ର ସରକାର ୫ ରାଜ୍ୟକୁ ଚିଠି ଲେଖି ସଜାଗ ଓ ସତର୍କ ରହିବାକୁ କହିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
କେନ୍ଦ୍ର ସ୍ୱାସ୍ଥ୍ୟ ସଚିବ ରାଜେଷ ଭୁଷଣ ତାମିଲନାଡୁ, କେରଳ, ତେଲେଙ୍ଗାନା, କର୍ଣ୍ଣାଟକ. ମହାରାଷ୍ଟ୍ର ରାଜ୍ୟ ସରକାରଙ୍କୁ ଚିଠି ଲେଖିଛନ୍ତି । ସଂକ୍ରମଣ ରୋକିବା ପାଇଁ ଆବଶ୍ୟକ ପଦକ୍ଷେପ ଗ୍ରହଣ କରିବାକୁ ଚିଠିରେ କୁହାଯାଇଛି । ଦେଶରେ ଚିହ୍ନଟ ହେଉଥିବା ସଂକ୍ରମିତଙ୍କ ମଧ୍ୟରୁ ୭୦ ପ୍ରତିଶତ ସଂକ୍ରମିତ କେବଳ ଏହି ୫ ରାଜ୍ୟରୁ ଚିହ୍ନଟ ହେଉଛନ୍ତି । ତେଣୁ ରାଜ୍ୟମାନଙ୍କୁ ଚିଠି ଲେଖି ନିୟମିତ ପରୀକ୍ଷା, ସ୍କ୍ରିନିଂ ଟିକାକରଣ ଉପରେ ଅଧିକ ଗୁରୁତ୍ୱ ଦେବାକୁ କହିଛି କେନ୍ଦ୍ର ।
ମହାରାଷ୍ଟ୍ରରେ ୨୪ ଘଂଟାରେ ୧୧୩୪ ସଂକ୍ରମିତ ଚିହ୍ନଟ ଓ ୨ଜଣଙ୍କ ମୃତ୍ୟୁ ହୋଇଛି । କେରଳରେ ୧୨୭୮ ଜଣ ସଂକ୍ରମିତ ଚିହ୍ନଟ ଓ ୨୦ଜଣଙ୍କ ମୃତ୍ୟୁ ହୋଇଛି । କର୍ଣ୍ଣାଟକରେ ୨୫୯ ଜଣ ସଂକ୍ରମିତ ଚିହ୍ନଟ ହୋଇଥିବାବେଳେ ଦିଲ୍ଲୀରେ ୩୪୫ ଆକ୍ରାନ୍ତ ଚିହ୍ନଟ ହୋଇଛନ୍ତି । ସଂକ୍ରମଣ ବୃଦ୍ଧିକୁ ଦେଖି ମହାରାଷ୍ଟ୍ର ସରକାର ଶନିବାରଠୁ ରାଜ୍ୟରେ ପୁଣି କଟକଣା ଲାଗ କରିଛନ୍ତି । ସର୍ବସାଧାରଣ ସ୍ଥାନରେ ମାସ୍କ ପରିଧାନ କରିବା ପାଇଁ ନିର୍ଦ୍ଦେଶ ଜାରି କରିଛନ୍ତି ରାଜ୍ୟ ସ୍ୱୀକାର । ମହାରାଷ୍ଟ୍ର ଓ କେରଳରେ ସବୁଠୁ ଅଧିକ ସଂକ୍ରମିତ ଚିହ୍ନଟ ହେଉଛନ୍ତି ।