ଫାଇଜର ଟିକା ନେଇ ନରୱେର ୨୩ ବରିଷ୍ଠ ନାଗରିକଙ୍କ ମୃତ୍ୟୁ । ପ୍ରଥମ ଡୋଜ ନେବାର କିଛି ସମୟ ମଧ୍ୟରେ ହରାଇଲେ ପ୍ରାଣ । ପାଶ୍ୱ ପ୍ରତିକ୍ରିୟା ଯୋଗୁଁ ମୃତ୍ୟୁ ହୋଇଥିବା ନେଇ ବ୍ୟବଚ୍ଛେଦ ରିପୋର୍ଟରୁ ସ୍ପଷ୍ଟ
କନକ ବ୍ୟୁରୋ : ଫାଇଜର ଟିକା ନେଇ ୟୁରୋପୀୟ ରାଷ୍ଟ୍ର ନରୱେରେ ଗୋଟିଏ ଦିନରେ ୨୩ ଜଣଙ୍କର ମୃତ୍ୟୁ ହୋଇଛି । ଟିକାର ପ୍ରଥମ ଡୋଜ ନେବାର କିଛି ସମୟ ମଧ୍ୟରେ ସେମାନଙ୍କର ମୃତ୍ୟୁ ହୋଇଥିବା ସୂଚନା । ସମସ୍ତ ମୃତକ ବରିଷ୍ଠ ନାଗରିକ ବୋଲି ଜଣାପଡିଛି । ସେମାନଙ୍କର ମୃତ୍ୟୁର କାରଣ ପାଶ୍ୱପ୍ରତିକ୍ରିୟା ବୋଲି ଶବ ବ୍ୟବଛେଦ ରିପୋର୍ଟରୁ ସ୍ପଷ୍ଟ ହୋଇଛି । ଏହି ସମାନ କାରଣ ଯୋଗୁଁ ଆହୁରି ଅନେକ ଲୋକ ଅସୁସ୍ଥ ହୋଇପଡିଥିବା ସୂଚନା ଦେଇଛି ନରୱେ ସ୍ୱାସ୍ଥ୍ୟ ବିଭାଗ ।
Kanak News is now on WhatsApp
Join and get latest news updates delivered to you via WhatsApp
ଏହି ଘଟଣା ସାମ୍ନାକୁ ଆସିବା ପରେ ନରୱେରେ ଟିକାକରଣକୁ ସାମୟିକ ଭାବେ ବନ୍ଦ କରାଯିବା ସହ ଘଟଣାର ତଦନ୍ତ ନିର୍ଦ୍ଦେଶ ଦିଆଯାଇଛି । ଏହି ଟିକା ବୟସ୍କ ଲୋକଙ୍କ ପାଇଁ ସୁରକ୍ଷିତ ନୁହେଁ ବୋଲି ନରୱେ ସରକାର ଘୋଷଣା କରିଛନ୍ତି । ଏନେଇ ନରୱେର ଜଣେ ଡାକ୍ତର କହିଛନ୍ତି କି ଟିକା ନେବା ପରେ ମୃତ୍ୟୁ ହୋଇଥିବା ସମସ୍ତ ଲୋକଙ୍କର ବୟସ ୮୦ ବର୍ଷରୁ ଅଧିକ । ସୂଚନା ରହିଛି କି ନରୱେରେ ଡିସେମ୍ବର ମାସରୁ ଏ ପର୍ଯ୍ୟନ୍ତ ୩୦ ହଜାର ଲୋକଙ୍କୁ ଫାଇଜର କିମ୍ବା ମଡର୍ଣ୍ଣା ଟିକା ଦିଆଯାଇଛି । ଆମେରିକା ସମେତ ୟୁରୋପୀୟ ରାଷ୍ଟ୍ର ମାନଙ୍କରେ ଫାଇଜର ଟିକାକୁ ନେଇ ଏଭଳି ଅଭିଯୋଗ ଆସିବା ପରେ ଟିକା ନିର୍ମାତା ଫାଇଜର ବାୟୋଏନଟେକ୍ ୟୁରୋପକୁ ଟିକା ଯୋଗାଣ ହ୍ରାସ କରିଛି ।
ଭାରତରେ ଟିକାକୁ ନେଇ ଏଭଳି ଅଭିଯୋଗ ଆସିବା ପରେ ଭାରତରେ ଏହାକୁ ନେଇ ପ୍ରତିକ୍ରିୟା ପ୍ରକାଶ ପାଇଛି । କଂଗ୍ରେସ ନେତା ମନୀଷ ତିୱାରୀ କହିଛନ୍ତି କି ଟିକାକୁ ନେଇ କଂଗ୍ରେସ ଯେଉଁ ଅଭିଯୋଗ ଆଣିଥିଲା ତାହା କପୋଳକଳ୍ପିତ ନୁହେଁ । ଯାହାର ପ୍ରମାଣ ନରୱେରେ ଦେଖା ଦେଇଛି । ଟିକାକୁ ନେଇ କଂଗ୍ରେସ ଯେତେବେଳେ ଅଭିଯୋଗ ଆଣିଥିଲା ସେତେବେଳେ କେନ୍ଦ୍ର ସ୍ୱାସ୍ଥ୍ୟମନ୍ତ୍ରୀ ଡ. ହର୍ଷବର୍ଦ୍ଧନ କହିଥିଲେ କି ଟିକାକୁ ନେଇ କଂଗ୍ରେସ ଗୁଜବ ପ୍ରଚାର କରିବା ସହ ଲୋକମାନଙ୍କ ମଧ୍ୟରେ ଅବିଶ୍ୱାସର ମଞ୍ଜି ବୁଣୁଛି ।