ହଳଦୀ ପରେ ଏବେ ବ୍ରାଣ୍ଡିଂ ହେଉଛି କନ୍ଧମାଳ ଷ୍ଟ୍ରବେରୀ, ୬ ଟି ବ୍ଲକର ୧୪ ଏକର ଜମିରେ ହୋଇଛି ଚାଷ
କନକ ବ୍ୟୁରୋ : କ୍ଷେତରେ ହସୁଛି ଷ୍ଟ୍ରବେରୀ ଚାଷ । ଧଳା ପଲିଥିନ ତଳେ ଧାଡ଼ି ଧାଡ଼ି ହୋଇ ଲାଗିଥିବା ଷ୍ଟ୍ରବେରୀ ଗଛରେ ନାଲି ରଙ୍ଗର ଷ୍ଟବେରୀ ଫୁଲ ଫୁଟିଲା ଭଳି ଦେଖାଯାଉଛି । ଜିଲ୍ଲାର ସଦର ମହକୁମା ଫୁଲବାଣୀ ବ୍ଲକ ଅନ୍ତର୍ଗତ ବୁଢାଦାନୀ ଗାଁରେ ଏହି ଚାଷ ହୋଇଛିି । ଏଠାକାର ଜଳବାୟୁ ଷ୍ଟ୍ରବେରୀ ଚାଷ ପାଇଁ ବେଶ ଉପଯୋଗୀ ହୋଇଥିବାରୁ ଜିଲ୍ଲା ପ୍ରଶାସନ ପକ୍ଷରୁ ପରୀକ୍ଷାମୂଳକ ଭାବେ ଆରମ୍ଭ ହୋଇଥିବା ଷ୍ଟ୍ରବେରୀ ଚାଷ ସଫଳ ହୋଇଛି । ଏହି ଗାଁର ତାରିଣୀ ଏବଂ ନାରାୟଣୀ ମହିଳା ସ୍ୱୟଂ ସହାୟକ ଗୋଷ୍ଠୀର ୨୨ ଜଣ ମହିଳାଙ୍କୁ ନେଇ ୨ଏକର ଜମିରେ ଲାଗିଥିବା ଷ୍ଟ୍ରବେରୀ ଗଛରୁ ଏବେ ଫଳ ଅମଳ କରାଯାଉଛି । ଫଳ ଗୁଡ଼ିକ ଉନ୍ନତ ମାନର ଓ ବେଶ ସ୍ୱାଦିଷ୍ଟ ବୋଲି ମହିଳା ଚାଷୀ ମାନେ କହିଛନ୍ତି । ଏହା ସହିତ ପରିବା ଚାଷ ଅପେକ୍ଷା ଏହି ଚାଷ କରିବା ଦ୍ୱାରା ସେମାନେ ଅଧିକ ଲାଭବାନ ହେଉଛନ୍ତି । ଦୈନିକ ୪ରୁ ୫ କିଲୋ ଷ୍ଟବେରୀ ବାହାରୁଥିବା ବେଳେ ୪୦୦ରୁ ୫୦୦ ଟଙ୍କାରେ ବିକ୍ରି କରୁଛନ୍ତି । ଏହିଭଳି ଭାବେ ଦୈନିକ ୨ରୁ ଅଢ଼େଇ ହଜାର ରୋଜଗାର ହୋଇପାରୁଛି । ଆଗକୁ ପ୍ରଶାସନ ପକ୍ଷରୁ ଅଧିକ ସହାୟତା ମିଳିଲେ ସେମାନେ ଅଧିକ ଚାଷ କରିପାରିବେ ବୋଲି କହିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
କନ୍ଧମାଳ ଜିଲ୍ଲାପାଳଙ୍କ ନିର୍ଦ୍ଦେଶକ୍ରମେ ପରୀକ୍ଷା ମୂଳକ ଭାବେ ପ୍ରଥମ ଥର ପାଇଁ ଜିଲ୍ଲାରେ ଆରମ୍ଭ ହୋଇଛି ଷ୍ଟ୍ରବେରୀ ଚାଷ । ଉଦ୍ୟାନ ବିଭାଗ, କୃଷି ବିଭାଗ, ଜିବିକା ମିଶନ ଏବଂ ଓ,ଏଲ.ଏମର ସହାୟତରେ ଜିଲ୍ଲାର ୬ଟି ବ୍ଲକର ୭ଟି ସ୍ଥାନରେ ୧୪ ଏକର ଜମିରେ ଏହି ଷ୍ଟ୍ରବେରୀ ଚାଷ କରାଯାଇଛି । ଷ୍ଟ୍ରବେରୀ ଗଛ ଗୁଡିକ ମହାରଷ୍ଟ୍ରର ପୁନେରୁ ଅଣାଯାଇଛି ଏବଂ ଉଚ୍ଚ ଜମି ଗୁଡିକରେ ଲଗାଯାଇଛି । ୩ରୁ୪ ମାସ ମଧ୍ୟରେ ଫଳ ଅମଳ ଯୋଗ୍ୟ ହୋଇଛି । ବିକ୍ରୟ ପାଇଁ ପ୍ୟାକେଟ ଗୁଡିକୁ ଦାରିଙ୍ଗବାଡି ଷ୍ଟ୍ରବେରୀ ନାମରେ ବ୍ରଣ୍ଡିଂ କରାଯାଇଛି । ବର୍ତମାନ ଚାଷୀ ମାନେ ଷ୍ଟ୍ରବେରୀ ବିକ୍ରି କରି ଭଲ ଟଙ୍କା ରୋଜଗାର କରୁଥିବା କନ୍ଧମାଳ ଜିଲ୍ଲା ଉଦ୍ୟାନ ବିଭାଗ ଉପ-ନିର୍ଦ୍ଦେଶକ କହିଛନ୍ତି ।
ବର୍ତମାନ ସମୟରେ ପାରମ୍ପରିକ ଚାଷ ଅପେକ୍ଷା ଅନ୍ୟ ଚାଷ ପ୍ରତି ଚାଷୀ ମାନେ ଆଗ୍ରହ ପ୍ରକାଶ କରୁଛନ୍ତି । ଠିକ୍ ଏହି ସମୟରେ କନ୍ଧମାଳ ପ୍ରଶାସନ ପକ୍ଷରୁ ଆରମ୍ଭ ହୋଇଥିବା ଏହି ପ୍ରୟାସ ଚାଷୀମାନଙ୍କ ପାଇଁ ବେଶ ସହାୟକ ହେବ ବୋଲି କୁହାଯାଉଛି ।