କ୍ରସ ଭୋଟିଂ ପରେ ମୋକିମକୁ ନେଇ ବଢିଲା ଚର୍ଚ୍ଚା । ୨୦୨୪ରେ କଂଗ୍ରେସ ଥିବ କି ନଥିବ, ଏମିତି ପ୍ରଶ୍ନ ଉଠାଇ ବିବାଦ ଛିଡା କଲେ କଂଗ୍ରେସ ବିଧାୟକ ।
କନକ ବ୍ୟୁରୋ: ଚର୍ଚ୍ଚାରେ କଂଗ୍ରେସ ବିଧାୟକ ମହମ୍ମଦ ମୋକିମ । ଗତକାଲି ଏନଡିଏ ରାଷ୍ଟ୍ରପତି ପ୍ରାର୍ଥୀ ଦ୍ରୌପଦୀ ମୁର୍ମୁଙ୍କୁ କଂଗ୍ରେସ ବିଧାୟକ ମହମ୍ମଦ ମୋକିମ ଭୋଟ୍ ଦେବା ପରେ ତାଙ୍କ ଆଭିମୁଖ୍ୟକୁ ନେଇ ପ୍ରଶ୍ନ ଉଠିଛି । ଏପରିକି ସେ ଆଗାମୀ ଦିନରେ ଦଳରେ ରହିବେ କି ନାହିଁ ସେ ନେଇ ମଧ୍ୟ ପ୍ରଶ୍ନ ଉଠିଛି । ହେଲେ, ସେ କଂଗ୍ରେସର ଜଣେ ଶୃଙ୍ଖଳିତ କର୍ମୀ କହିବା ସହ ଦଳରେ ରହିବେ ବୋଲି ଦୃଢ଼ୋକ୍ତି କରିଛନ୍ତିି ।
Kanak News is now on WhatsApp
Join and get latest news updates delivered to you via WhatsApp
୨୦୨୪ରେ କଂଗ୍ରେସ ଥିବ କି ନଥିବ, ଏମିତି ପ୍ରଶ୍ନ ଉଠାଇ ବଡ ବିବାଦ ଛିଡା କରିଛନ୍ତି କଂଗ୍ରେସ ବିଧାୟକ ମହମ୍ମଦ ମୋକିମ୍ । କନକ ନ୍ୟୁଜକୁ ସ୍ୱତନ୍ତ୍ର ସାକ୍ଷାତକାର ଦେବା ବେଳେ ଏଡିଟର ମନୋରଞ୍ଜନ ମିଶ୍ର ୨୦୨୪ରେ ସେ କଂଗ୍ରେସ ଦଳରୁ ନିର୍ବାଚନ ଲଢିବେ କି ବୋଲି ପ୍ରଶ୍ନ କରିଥିଲେ । ଆଉ ଯାହାର ଉତ୍ତରରେ ମୋକିମ କହିଛନ୍ତି, ସେ ଭବିଷ୍ୟବାଣୀ କରିବାକୁ ଚାହାଁନ୍ତି ନାହିଁ କିନ୍ତୁ ଯଦି ୨୦୨୪ରେ କଂଗ୍ରେସ ଦଳ ଥାଏ ତେବେ ସେ ଲଢିବେ ।
ଦଳର ନିଷ୍ପତି ବାହାରକୁ ଯାଇ ଏନଡିଏ ରାଷ୍ଟ୍ରପତି ପ୍ରାର୍ଥୀ ଦ୍ରୈାପଦୀ ମୁର୍ମୁଙ୍କୁ ଭୋଟ ଦେବା ପରେ ଏବେ ଚର୍ଚ୍ଚାରେ କଟକ ବାରବାଟୀ ବିଧାୟକ ମହମ୍ମଦ ମୋକିମ । ପାର୍ଟିର ସିଦ୍ଧାନ୍ତରୁ ଓହରି ମାଟିର ଝିଅକୁ ବିବେକ ଅନୁସାରେ ଭୋଟ ଦେଇଥିବ କହିବା ପରେ ତାଙ୍କୁ ଦଳରୁ ବିରୋଧ ବଢିଛି । ଏପରିକି ତାଙ୍କୁ କାରଣ ଦର୍ଶାଅ ନୋଟିସ ଦିଆଯିବ ବୋଲି କହିଛନ୍ତି ପିସିସି ସଭାପତି । ତେବେ କଂଗ୍ରେସରେ ଅଛନ୍ତି ଓ ଆଗକୁ ରହିବେ ବୋଲି ଦୃଢୋକ୍ତି ରଖିଛନ୍ତି ମୋକିମ ।
ମୁଖ୍ୟ ବିରୋଧୀଦଳ ପଦ ହରେଇବା ପରେ ବିଧାନସଭାରେ ସରକାରଙ୍କୁ ଘେରିବାକୁ ନବଗ୍ରହ ଭାବରେ କଂଗ୍ରେସର ୯ ବିଧାୟକ ଲଢେଇ ଜାରି ରଖିବେ ବୋଲି ପୂର୍ବରୁ କହିଥିଲେ କଂଗ୍ରେସ ନେତୃବୃନ୍ଦ କିନ୍ତୁ ଏବେ ପୁଣି ଥରେ ନିଜ ଘର କଳିରେ ଛନ୍ଦି ହୋଇପଡିଛି ରାଜ୍ୟ କଂଗ୍ରେସ ।