ପୁଅ ପୁନର୍ଜନ୍ମ ପାଇବା ପରେ… ହସ୍ପିଟାଲରେ ରାହୁଲକୁ ଭେଟିଲେ ମାଆ । କୋହ ସମ୍ଭାଳି ନପାରି ପୁଅକୁ କୁଣ୍ଢେଇ ପକେଇଲେ, ଗେଲ କଲେ ।
କନକ ବ୍ୟୁରୋ: ଧନରେ ! ତୁ ଫେରିଆସିବୁ ବୋଲି ମୋର ବିଶ୍ୱାସ ଥିଲା । ମୃତ୍ୟୁକୁ ମାତ୍ ଦେଇ ମାଆ କୋଳକୁ ଫେରିବୁ ବୋଲି ମୋର ପୂରା ବିଶ୍ୱାସ ଥିଲା । ଭଗବାନ ଏତେ ନିଷ୍ଠୁର ନୁହଁନ୍ତିରେ ଧନ । ଅସମୟରେ ତତେ ମୋଠୁ ଛଡେଇ ନେବେ । ମୋ ପୁଅକୁ ମୋ ଠୁ କେହି ଛଡେଇ ନେଇପାରିବେନି, ମୋଠୁ ତତେ କେହି ଅଲଗା କରିପାରିବେନି । ହସ୍ପିଟାଲ ବେଡରେ ହୁଏତ ଏମିତି କିଛି କହିବା ପରେ ନିଜ ଲୁହ, କୋହକୁ ସମ୍ଭାଳି ନପାରି ପୁଅକୁ କୋଳେଇ ନେଇଛି ମାଆ । ଆଉ ତା ମଥାକୁ ସ୍ନେହବୋଳା ହାତରେ ଆଉଁଶି ଦେଇ ତାକୁ ଗେଲ କରିଛି ।
Kanak News is now on WhatsApp
Join and get latest news updates delivered to you via WhatsApp
ମୃତ୍ୟୁର ଗାତରୁ ମାଆ କୋଳାକୁ ପୁଅ ଯେତେବେଳେ ଫେରି ଆସିଛି ସେତେବେଳେ ସମୟ ସହ ଲଢି ପୁନଃର୍ଜନ୍ମ ପାଇଥିବା ପୁଅକୁ ହସ୍ପିଟାଲରେ ଆଇସିୟୁରେ ଦେଖିବାକୁ ଯାଇଛି ମାଆ । ଆଉ ସେତେବେଳେ ହସ୍ପିଟାଲ୍ ବେଡରେ ପୁଅକୁ ଦେଖି ନିଜ କୋହ ରୋକି ପାରିନଥିଲା ମା’ । ଆଉ କାନ୍ଦି କାନ୍ଦି ପୁଅକୁ କୁଣ୍ଢେଇ ପକାଉଛି ମା’ । ବିଳାସପୁରର ଆପୋଲୋ ହସ୍ପିଟାଲରେ ଚିକିତ୍ସିତ ହେଉଥିବା ରାହୁଲଙ୍କ ସହ ତାଙ୍କ ମା’ ଗୀତା ସାହୁଙ୍କର ଏମିତି କିଛି ଦୃଶ୍ୟ ଦେଖିବାକୁ ମିଳିଛି । ହସ୍ପିଟାଲରେ ପୁଅର ଦେଖାଶୁଣା କରୁଛନ୍ତି ମା’ । ଜୀବନ ସଂଗ୍ରାମରେ ବାଜିମାରିଥିବା ପୁଅ ରାହୁଲ ଶୁଣିପାରେ ନାହିଁ କି କଥା କହିପାରେ ନାହିଁ । କିନ୍ତୁ ମା’ ପାଖରେ ଏମିତି ଯାଦୁ ଅଛି, ଯାହାକୁ ଅନୁଭୂତ କରିପାରେ ତା’ର ପୁଅ । ପୁଅ ଓ ମା’ର ଏଭଳି ଭଲପାଇବା ଦେଖି ଲାଗୁଛି, ଯେପରି ଦୁହିଁଙ୍କୁ ପୂରା ଦୁନିଆ ମିଳିଯାଇଛି । ଆଉ ହସ୍ପିଟାଲ ବେଡରୁ ଏ ହୃଦୟସ୍ପର୍ଶୀ ଦୃଶ୍ୟ ସମସ୍ତଙ୍କ ମୁହଁରେ ହସ ଆଣି ଦେଇଛି ।