କନକ ବ୍ୟୁରୋ : ସ୍ୱାସ୍ଥ୍ୟବସ୍ଥାରେ ସୁଧାର ଆସିବା ପରେ ହସ୍ପିଟାଲରୁ ହ୍ୱାଇଟ ହାଉସକୁ ଫେରି ଆସିଛନ୍ତି ଆମେରିକାର ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ । ସୋମବାର ୱାଲଟର ରିଡ ହସ୍ପିଟାଲର ଡାକ୍ତର କହିଥିଲେ, ରାଷ୍ଟ୍ରପତି ସଂପୂର୍ଣ୍ଣ ଠିକ ହୋଇ ନାହାନ୍ତି । ହେଲେ ତାଙ୍କୁ ହସ୍ପିଟାଲରୁ ଡିସଚାର୍ଜ କରାଯାଇ ପାରିବ । ଆଜି ଡିସଚାର୍ଜ ହୋଇ ହ୍ୱାଇଟ ହାଉସ ଫେରିବା ପରେ ଟ୍ରମ୍ପ ମୁହଁରୁ ମାସ୍କ ହଟାଇ ଗଣମାଧ୍ୟମ ପ୍ରତିନିଧିକୁ ସମ୍ବୋଧିତ କରିଛନ୍ତି । ଯାହାକୁ ନେଇ ଟ୍ରମ୍ପକୁ ସମାଲୋଚନା କରିଛନ୍ତି ବିରୋଧୀ ।
Kanak News is now on WhatsApp
Join and get latest news updates delivered to you via WhatsApp
ଭାରତୀୟ ସମୟ ଅନୁସାରେ ମଙ୍ଗଳବାର ସକାଳେ ୱାଲଟର ରିଡ ମେଡିକାଲ ସେଂଟରରୁ ଡିସଚାର୍ଜ ହୋଇ ହ୍ୱାଇଟ ହାଉସ ଫେରିଛନ୍ତି । ସେ କରୋନାରୁ ସଂପୂର୍ଣ୍ଣ ମୁକ୍ତ ହୋଇ ନାହାନ୍ତି, ସ୍ୱାସ୍ଥ୍ୟବସ୍ଥାରେ ସୁଧାର ଆସିବାରୁ ହ୍ୱାଇଟ ହାଉସକୁ ଫେରିଆସିଛନ୍ତି । ଏବେ ସେ କିଛି ଦିନ ହ୍ୱାଇଟ ହାଉସରେ ସଙ୍ଗରୋଧରେ ରହି ଚିକିତ୍ସିତ ହେବେ ।
ହେଲିକପ୍ଟରରେ ହ୍ୱାଇଟ ହାଉସ ପହଂଚିବା ପରେ ସିଧା ଉପର ମହଲାକୁ ଯାଇ ମୁହଁରୁ ମାସ୍କ ହଟାଇଥିଲେ ଡୋନାଲ୍ଡ ଟ୍ରମ୍ପ । ଏହାପରେ ଗଣମାଧ୍ୟମ ପ୍ରତିନିଧିଙ୍କୁ ସମ୍ବୋଧିତ କରି ଟ୍ରମ୍ପ କହିଛନ୍ତି, ସେ ସଂପୂର୍ଣ୍ଣ ସୁସ୍ଥ ଅଛନ୍ତି । କରୋନାକୁ ଡର ନାହିଁ, ନିଜ ଉପରେ କରୋନାର ପ୍ରଭାବ ବିସ୍ତାର କରିବାକୁ ଦିଅ ନାହିଁ ।
ଟ୍ରମ୍ପ ମୁହଁରୁ ମାସ୍କ କାଢିବା ଘଟଣା ନେଇ ଏକାଧିକ ପ୍ରଶ୍ନ ସୃଷ୍ଟି ହୋଇଛି । କାରଣ ସେ କରୋନା ସଂକ୍ରମିତ ହୋଇଥିବାରୁ ଏପରି ଅବହେଳା ଅଶାକରାଯାଉ ନାହିଁ । ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ହ୍ୱାଇଟ ହାଉସ ଫେରି ଆସିବା ଘଟଣାକୁ ନେଇ ପ୍ରତିକ୍ରିୟା ରଖିଛନ୍ତି ବିରୋଧୀ ଜୋ ବେଡାନ । ସେ କହିଛନ୍ତି ରାଷ୍ଟ୍ରପତି ଫେରିଆସିବା ଭଲ ଖବର, ହେଲେ ହ୍ୱାଇଟ ହାଉସ ଫେରିବା ପରେ ସେ ମାସ୍କ ପିନ୍ଧୁ ନାହାନ୍ତି କି ସାମାଜିକ ଦୂରତା ରକ୍ଷା କରୁ ନାହାନ୍ତି ।
ଆମେରିକାରେ ନଭେମ୍ବର ୩ ତାରିଖରେ ରାଷ୍ଟ୍ରପତି ନିର୍ବାଚନ ପାଇଁ ମତଦାନ ଗ୍ରହଣ କରାଯିବ । ଏହାପୂର୍ବରୁ ଟ୍ରମ୍ପଙ୍କୁ ଦୁଇଟି ବଡ ବିତର୍କର ସାମ୍ନା ବି କରିବାକୁ ପଡିବ । ଏପରି ସମୟରେ ସେ କରୋନାରେ ଆକ୍ରାନ୍ତ ହେବା ଦ୍ୱାରା ତାଙ୍କ ନିର୍ବାଚନୀ ପ୍ରଚାର ପ୍ରତି ବଡ ଝଟକା ବୋଲି କୁହାଯାଉଛି ।