କନକ ବ୍ୟୁରୋ: ଗୋଳିଆ କରୁଛି ୧୫ ବର୍ଷର ଗାଡ଼ି! ଏବେ ବି ପନ୍ଦର ବର୍ଷର ଗାଡି ରାସ୍ତାରେ ଗଡ଼ିବା ନଗଡ଼ିବା ନେଇ ଲାଗି ରହିଛି ଦ୍ୱନ୍ଦ । କାରଣ ରାଜ୍ୟ ପରିବହନ କର୍ତ୍ତୃପକ୍ଷ କିଛି ଦିନ ତଳେ ଟ୍ୱିଟ୍ କରି ଜଣାଇଥିଲେ ଯେ, ରାସ୍ତାରେ ଗଡ଼ିବ ପନ୍ଦର ବର୍ଷ କିମ୍ବା ୧୫ ବର୍ଷରୁ ଅଧିକ ଗାଡ଼ି । ହେଲେ ଆଜି ବିଧାନସଭାରେ ବିଧାୟକ ରମେଶ ଚନ୍ଦ୍ର ସାଏ ଏହି ପ୍ରସଙ୍ଗ ଉଠିବା ପରେ ଯେଉଁ ଉତ୍ତର ରଖିଛନ୍ତି ମନ୍ତ୍ରୀ ତାହା ପୁଣି ଗାଡ଼ି ମାଲିକଙ୍କ ପାଇଁ ଦ୍ୱନ୍ଦ ବଢ଼ିଯାଇଛି ।

Advertisment

ପରିବହନ ମନ୍ତ୍ରୀ ପଦ୍ମନାଭ ବେହେରା ପ୍ରଶ୍ନର ଉତ୍ତରରେ କହିଛନ୍ତି, ରାଜ୍ୟରେ ପନ୍ଦର ବର୍ଷରୁ ଅଧିକ ସମୟ ଗାଡି ନିଷିଦ୍ଧ କରିବା ରାଜ୍ୟ ସରକାରଙ୍କ କ୍ଷମତା ପରିସର ଭୁକ୍ତ ନୂହେଁ । ଏସମ୍ପର୍କରେ ରାଜ୍ୟ ସରକାର କୌଣସି ନିୟମ ପ୍ରଣିତ କରିନାହାନ୍ତି । ଏହାକୁ ନିଷିଦ୍ଧ କରିବା ନକରିବା କେବଳ କେନ୍ଦ୍ର ସରକାରଙ୍କ କ୍ଷମତା ପରିସର ବୋଲି ପରିବହନ ମନ୍ତ୍ରୀ ସ୍ପଷ୍ଟ କରିଛନ୍ତି ।

ଅନ୍ୟପଟେ ଗତ କିଛି ଦିନ ତଳେ ରାଜ୍ୟ ପରିବହନ କର୍ତ୍ତୁପକ୍ଷ କରିଥିବା ଟ୍ୱିଟ୍ କୁ ନେଇ ଏବେ ବି ଦ୍ୱନ୍ଦ ରହିଛି । ପନ୍ଦର ବର୍ଷ କିମ୍ବା ତା’ଠୁ ଅଧିକ ବର୍ଷର ଗାଡ଼ି ରାସ୍ତାରେ ଗଡ଼ିବ ବୋଲି ସୂଚନା ଦେଇଥିଲେ । ଏବଂ କହିଥିଲେ, ରାସ୍ତାରେ ୧୫ ବର୍ଷରୁ ଅଧିକ ପୁରୁଣା ଗାଡି ଚଳାଇବାକୁ ହେଲେ ଆରଟିଓରୁ ଗାଡିର ରେଜିଷ୍ଟ୍ରେସନ ରିନ୍ୟୁ କରିବାକୁ ପଡିବ । ଏହାଛଡା ଗାଡିର ଫିଟନେସ ସାର୍ଟିଫିକେଟ ବୈଧ ଥିବା ଯାଏଁ ଗାଡିର ରେଜିଷ୍ଟ୍ରେସନ ବୈଧ ରହିବ । ଫିଟନେସ ସାର୍ଟିଫିକେଟକୁ ମଧ୍ୟ ପୁଣିଥରେ ପଞ୍ଜୀକରଣ କରିବାକୁ ପଡ଼ିବ ବୋଲି କହିଥିଲେ ରାଜ୍ୟ ପରିବହନ କର୍ତ୍ତୁପକ୍ଷ । ହେଲେ ବର୍ତ୍ତମାନ ମନ୍ତ୍ରୀଙ୍କ ବୟାନ ପରେ ଏବେ ଗାଡ଼ି ଚାଳକ ଚିନ୍ତାରେ । ପ୍ରକୃତରେ ୧୫ ବର୍ଷିର୍ୟା ଗାଡ଼ିର ଭାଗ୍ୟ କ’ଣ?