ବର୍ଷ ବର୍ଷ ଧରି ଗାଁ ରାସ୍ତାର ମରାମତି କଲେ ନାହିଁ ପ୍ରଶାସନ । ନିଜ ଗାଁର ରାସ୍ତା ତିଆରି କଲେ କଳାହାଣ୍ଡିର ୫ଟି ଗାଁର ଲୋକ

କନକ ବ୍ୟୁରୋ : କାହା ହାତରେ କୋଡି, କାହା ହାତରେ କୋଦାଳ । ନିଜ ପାଇଁ, ପରିବାର ପାଇଁ, ଗାଁ ପାଇଁ ରାସ୍ତା ତିଆରିରେ ଲାଗିଛନ୍ତି ଗ୍ରାମବାସୀ । କଳାହାଣ୍ଡି ଜିଲ୍ଲା ଆମପାଣି ପଂଚାୟତର ବିରିମୁହାଣ ଛକରୁ କୁଟୁରୁ ଗାଁକୁ ସଂଯୋଗ କରୁଥିବା କଚ୍ଚା ରାସ୍ତାରେ ଦେଖିବାକୁ ମିଳିଛି ଏହି ଦୃଶ୍ୟ । ଯେଉଁ କାମ ପ୍ରଶାସନ କରିବା କଥା ତାହା ୭୦ ଦଶକ ପରେ ବି ହେଲାନି । ନେତା, ମନ୍ତ୍ରୀ, ପ୍ରଶାସନିକ ଅଧିକାରୀଙ୍କ ପାଖରେ ଅଭିଯୋଗ ସତ୍ୱେ କିଛି ଫଳ ମିଳିଲାନି । ଶେଷରେ ୫ ଖଣ୍ଡ ଗାଁର ଲୋକେ ଶ୍ରମଦାନ କରି ତିଆରି କରିଛନ୍ତି ରାସ୍ତା ।

ଆମପାଣି ଠାରୁ ୧୨ କିମି ସାହାଜଖୋଲ ଜଙ୍ଗଲରେ ଥିବା ପ୍ରାୟ ୫ଟି ଗାଁର ଲୋକେ ରାସ୍ତା ଅଭାବରୁ ବର୍ଷ ବର୍ଷ ଧରି ହଇରାଣ ହେଉଛନ୍ତି । କୁଟୁରୁ, ଲୋକାଆମ, ଆନ୍ଧିଝରଣ, ସର୍ଗିପାଲି, ଗୋଇଚଂଚରା ଗାଁର ପୀଢି ପୀଢି ଧରି ଗମନାଗମନ ଓ ମୌଳିକ ସୁବିଧାରୁ ବଂଚିତ ହେଉଛନ୍ତି । ଗର୍ଭବତୀ, ରୋଗୀଙ୍କୁ ମେଡିକାଲ ନେବା ହେଉ କି ପିଡିଏସ ସାମଗ୍ରୀ ପାଇଁ ହେଉ, ୧୨ କିମି ଦୁର୍ଗମ ରାସ୍ତା ଚାଲିବାକୁ ପଡିଥାଏ । ଲୋକଙ୍କ ପାଇଁ ପ୍ରଶାସନ ଗମନାଗମନା ସୁବିଧା ନକରିବାରୁ ଲୋକେ ନିଜ ପାଇଁ ନିଜେ ରାସ୍ତା ତିଆରି କରିଛନ୍ତି ।

କଳାହାଣ୍ଡି ଜିଲ୍ଲାର ୨୬ ନଂବର ଜାତୀୟ ରାଜପଥଠାରୁ ୧୨ କିମି ଦୂର ଘଂଚ ଜଙ୍ଗଲର ୫ଖଣ୍ଡ ଗାଁର ଲୋକେ ଶ୍ରମଦାନ କରି ରାସ୍ତା ତିଆରି କରିବା ଅଂଚଳରେ ଚର୍ଚ୍ଚାର ବିଷୟ ହୋଇଛି ।