‘ଫୋନି’ ପାଇଁ ପୁରୀ ସମେତ ଟ୍ୱିନସିଟିରେ ମୋବାଇଲ ସେବା ଠପ୍ । ଯୋଗାଯୋଗ ବିଚ୍ଛିନ୍ନ, ମୋବାଇଲ ସେବା ଯୋଗାଇ ଦେବାକୁ ରାଜ୍ୟ ସରକାରଙ୍କ ତତ୍ପରତା ।
କନକ ବ୍ୟୁରୋ: ‘ଫୋନି’ ପାଇଁ ଫୋନ୍ ସେବା ବାଧାପ୍ରାପ୍ତ । ଗତ ୩ ତାରିଖରେ ‘ଫୋନି’ ପୁରୀରେ ସ୍ଥଳଭାଗ ଛୁଇଁବା ପରଠାରୁ ହଜାର ହାଜର ବିଦ୍ୟୁତ୍ ଖୁଣ୍ଟି ଉପୁଡ଼ି ପଡ଼ିଛି । ଏପରିକି ବିଭିନ୍ନ ମୋବାଇଲ୍ ଟାୱାରର ସିଗନାଲ୍ ସେଟ୍ ଭାଙ୍ଗି ପଡ଼ିଥିବାରୁ ନେଟୱାର୍କ ଫେଲ୍ ହୋଇଯାଇଛି । ଫଳରେ ଦୂରଦୁରାନ୍ତରରେ ଥିବା ସମ୍ପର୍କୀୟ ମାନଙ୍କ ସହିତ ଟିକେ ଯୋଗାଯୋଗ କରିବାରେ ନାନାଦି ସମସ୍ୟାରେ ସମ୍ମୁଖୀନ ହେଉଛନ୍ତି ପୁରୀ ସହ ଭୁବନେଶ୍ୱର-କଟକ ଟ୍ୱିନସିଟିବାସୀ ।
Kanak News is now on WhatsApp
Join and get latest news updates delivered to you via WhatsApp
ଅନ୍ୟପଟେ ବାତ୍ୟା ପରେ ବହୁ ସ୍ଥାନରେ ଭାରତୀୟ ଦୂର ସଂଚାର ନିଗମ ବିଏସଏନଏଲ ନେଟୱାର୍କ କାର୍ଯ୍ୟକ୍ଷମ କରୁଥିଲେ ମଧ୍ୟ ସେଥିରେ କିଛି ବୈଷୟିକ ତ୍ରୁଟି ଯୋଗୁଁ ମୋବାଇଲ ସେବା ଠପ୍ ପଡ଼ିଛି । ଫଳରେ ଲୋକମାନେ ନାହିଁ ନ ଥିବା ସମସ୍ୟାର ସମ୍ମୁଖୀନ ହେଉଛନ୍ତି । ସବୁଠାରୁ ଗୁରୁତ୍ୱପୂର୍ଣ୍ଣ ବିଷୟ ହେଲା କି, ବର୍ତ୍ତମାନ ପୁରୀ, ଭୁବନେଶ୍ୱର ଓ କଟକ ଭଳି ସହରରେ ଇଣ୍ଟରନେଟ୍ ସେବା ସମ୍ପୂର୍ଣ୍ଣଭାବେ ଅଚଳ ପଡ଼ିଛି । ଯାହାଫଳରେ ବାତ୍ୟା ପରେ ବିଭିନ୍ନ ସରକାରୀ ଓ ବେସରକାରୀ ଅଫିସ୍ ଖୋଲାଥିଲେ ମଧ୍ୟ ଇଣ୍ଟରନେଟ୍ ସେବାରେ ବାଧାପ୍ରାପ୍ତ ହୋଇଛି ।
ସେପଟେ ପୁରୀ ଓ ଭୁବନେଶ୍ୱରରେ ହାତଗଣତି କିଛି ମୋବାଇଲ୍ ଟାୱାରକୁ ବାଦ୍ ଦେଲେ ଅଧିକାଂଶ ଭାଙ୍ଗିଯାଇଛି । ତେଣୁ ଟାୱାରଗୁଡ଼ିକୁ ମରାମତି କରି ମୋବାଇଲ୍ ସେବା ଯୋଗାଇବା ଏବେ ବିଏସଏନଏଲ ସମେତ ସବୁ ଘରୋଇ ଟେଲିକମ୍ ନେଟୱାର୍କ କମ୍ପାନି ପାଇଁ ଏକ ବଡ଼ ଚ୍ୟାଲେଞ୍ଜ୍ । ଏସଆରସି ବିଷ୍ଣୁପଦ ସେଠୀ କହିଛନ୍ତି, ମୋବାଇଲ୍ ସେବା ତୁରନ୍ତ ଆରମ୍ଭ କରିବା ପାଇଁ ଯୁଦ୍ଧକାଳୀନ ଭିତ୍ତିରେ ପଦକ୍ଷେପ ନେବାକୁ ଘରୋଇ କମ୍ପାନି ଓ ବିଏସଏନଏଲର ସ୍ଥାନୀୟ କର୍ତ୍ତୁପକ୍ଷଙ୍କ ସହ ଆଲୋଚନା ହୋଇଛି । ଖୁବ୍ ଶୀଘ୍ର ଏହି ସମସ୍ୟାର ସମାଧାନ ହେବ ବୋଲି ଆଶା ରହିଛି।