ବ୍ୟବହୃତ ମାସ୍କକୁ କାଟ ... ୭୨ ଘଣ୍ଟା ପରେ କାଗଜରେ ଗୁଡ଼ାଇ ଡ଼ଷ୍ଟବିନରେ ପକାଅ , ନହେଲେ ବଢିଯିବ ସଂକ୍ରମଣ । ସତର୍କ କଲେ କେନ୍ଦ୍ର ପ୍ରଦୂଷଣ ନିୟନ୍ତ୍ରଣ ବୋର୍ଡ଼ , ଆପଣଙ୍କ ଛୋଟିଆ ଅବଦାନ ରୋକିପାରିବ ସଂକ୍ରମଣ

ଦେଶରେ କରୋନାର ସ୍ଥିତି ଦିନକୁ ଦିନ ଅତି ଗମ୍ଭୀର ହେବାରେ ଲାଗିଛି । ହୁ’ହୁ ହୋଇ ବଢୁଛି କରୋନା ସଂକ୍ରମଣ । ଦେଶରେ ହଜାର ହଜାର ଲୋକଙ୍କୁ ଆକ୍ରାନ୍ତ କରିବା ସହ କାଳ ଆଡ଼କୁ ଟାଣିନେଇଗଲାଣି କରୋନା । ଏଭଳି ସ୍ଥିତିରେ ମାସ୍କ୍ ଏବଂ ସାନିଟାଇଜରକୁ ସାଥୀ କରିବା ପାଇଁ ଲୋକଙ୍କୁ ଚେତାଉଛନ୍ତି ସରକାର । ବଜାରରେ ଭଳି କି ଭଳି ଲୋକଙ୍କୁ ସୁହାଇଲା ଭଳି ମାସ୍କ୍ ମଧ୍ୟ ବିକ୍ରି ହେଉଛି । ୱାସେବଲ୍ ମାସ୍କ୍ ଠାରୁ ଆରମ୍ଭ କରି ଥରେ ବ୍ୟବହାର କରି ଫୋପାଡ଼ିବା ଭଳି ମାସ୍କ୍ ବଜାରରେ ଉପଲବ୍ଧ ରହିଛି । ହେଲେ କିଛି ଲୋକ ବ୍ୟବହୃତ ମାସ୍କକୁ ଏଣେତେଣେ ଫୋପାଡ଼ି ପ୍ରଶାସନ ଚିନ୍ତାକୁ ଦୁଇଗୁଣ କରିଦେଉଛନ୍ତି । ଲୋକେ ବୁଝିବା ଦରକାର ଯେ ଏହାଦ୍ୱାରା ସଂକ୍ରମଣ ଅଧିକ ବଢିଯିବ । ଏହାକୁ ନେଇ ବର୍ତ୍ତମାନ କେନ୍ଦ୍ର ପ୍ରଦୂଷଣ ନିୟନ୍ତ୍ରଣ ବୋର୍ଡ଼ (ସିପିସିବି) ପକ୍ଷରୁ ଏକ ନିୟମ ଜାରି କରାଯାଇଛି ।

ସିପିସିବିର ନିୟମରେ କୁହାଯାଇଛି ଯେ ବ୍ୟବହୃତ ମାସ୍କକୁ କାଟି କମ୍ ସେ କମ୍ ୭୨ ଘଣ୍ଟା ପର୍ଯ୍ୟନ୍ତ କାଗଜ ଥଳିରେ ରଖି ଡ଼ଷ୍ଟବିନରେ ପକାନ୍ତୁ । ବଡ଼ ବଡ଼ ବାଣିଜ୍ୟ ପ୍ରତିଷ୍ଠାନ ତଥା କାର୍ଯ୍ୟାଳୟ ବର୍ତ୍ତମାନ କରୋନା ସଂକ୍ରମଣ ଅଧିକ ଦେଖାଯାଉଥିବା ବେଳେ ଏହି ନିୟମକୁ ପାଳନ କରି ସଂକ୍ରମଣକୁ ଏଡ଼ାଇବାକୁ ସିପିସିବି ନିର୍ଦ୍ଦେଶ ଦେଇଛନ୍ତି । ସପିଙ୍ଗ୍ ମଲ୍ , ବଡ଼ ବଡ଼ ଶିଳ୍ପସଂସ୍ଥା ,ବାଣିଜ୍ୟ ଅନୁଷ୍ଠାନ ଆଦିକୁ ସତର୍କ କରାଇବା ସହ ୩ ଦିନ ପର୍ଯ୍ୟନ୍ତ ଅଲଗା ଅଳିଆଡ଼ବାରେ ଏଭଳି ବ୍ୟବହୃତ ମାସ୍କକୁ କାଟି ରଖିବାକୁ ନିର୍ଦ୍ଦେଶ ଦେଇଛନ୍ତି ସିପିସିବି । ସଂକ୍ରମିତଙ୍କ ଦ୍ୱାରା ଛଡ଼ାଯାଇଥିବା ଖାଦ୍ୟ ତଥା ପାଣି ବୋତଲକୁ ବାୟୋ ମେଡ଼ିକାଲ୍ ଡ଼ଷ୍ଟବିନରେ ରଖିବାକୁ ବାରଣ କରିଛନ୍ତି ସିପିସିବି । ଏକ ହଳଦିଆ ରଙ୍ଗର ପଲିଥିନ୍ କେବଳ କୋଭିଡ଼୍ ଆକ୍ରାନ୍ତ ରୋଗୀଙ୍କ ପାଇଁ ବ୍ୟବହୃତ ହେବା ଜରୁରୀ ବୋଲି ସିପିସିବି କହିଛନ୍ତି ।