ଜନ୍ମ କରିଥିଲି କଣ ଏଇଥି ପାଇଁ…? ପୁଅ ପର କରିଦେବା ପରେ ବିଷ ପିଇଦେଲା ମାଆ । ମୃତ୍ୟୁ ମୁହଁରୁ ବଞ୍ଚି ମେଡିକାଲରୁ ମାଆ ପଚାରୁଛି; ବଳ ନଥିବା ହାତରେ କାମ କରୁଛି, ମାଡ ଖାଇବି କଣ ପାଇଁ ? ପୁଅ ଜନ୍ମ କରି ପାଇଲି କଣ…? ଶୁଣନ୍ତୁ ୮୦ ବର୍ଷୀୟା ମାଆର ଅସହାୟ କାହାଣୀ…
ଯଦି ପୁଅ ବୋହୂମାନେ ବୃଦ୍ଧା ମାଆର ସେବା କରି ଥାନ୍ତେ ତେବେ ସେ କଣ ଆଜି ଆତ୍ମହତ୍ୟା କରିବାକୁ ନିଷ୍ପତ୍ତି ନେଇଥାନ୍ତା ? ବୟସ ହେଲା ପରେ ମାଆକୁ ଯେଉଁ ପୁଅମାନେ ପର କରି ଦେଇଛନ୍ତି ସେମାନେ ବି ଦିନେ ବୃଦ୍ଧ ହେବେ ? ଆଉ ସେତେବେଳେ ମାଆକୁ ଦେଇଥିବା ସେ ଯନ୍ତ୍ରଣା କଥା ମନେ ପଡିବ ତ ?
କନକ ବ୍ୟୁରୋ: ମୁଁ ତମକୁ ଜନ୍ମ ଦେଲି, ତମେ ମତେ ଯନ୍ତ୍ରଣା ଦେଲ… ମୁଁ ତମକୁ ମମତା ଦେଲି, ତମେ ମୁହଁମୋଡି ଦେଲ । ମୁଁ ଚିରା ପଣତରେ ଝାଳ ପୋଛି ତମକୁ ପାଳିଲି ପୋଷିଲି, ହେଲେ ତମେ ମତେ ନଚାହିଁ ପରକରିଦେଲ । ନିଜ ଛାତିରୁ କ୍ଷୀର ଖୁଆଇ ତମକୁ ଏଡୁଟେରୁ ଏଡଟେ କଲି, ନିଜେ ନଖାଇ ତୁମକୁ ଖୁଆଇଲି… ହେଲେ ତମେ ମତେ ଛି କରିଦେଲ… ପୁଅ ଜନ୍ମ କରି ପାଇଲି କଣ ? ଧିକ୍ ଏ ପୁଅଙ୍କୁ, ଧିକ୍ ମୋ ମା’ପଣିଆକୁ… ଏ ଜୀବନ ରହି ଆଉ ଲାଭ କଣ ?
Kanak News is now on WhatsApp
Join and get latest news updates delivered to you via WhatsApp
ଜନ୍ମକଲା ମାଆକୁ ପୁଅମାନେ ପରକରିଦେବା ପରେ ବୋଧହୁଏ ଏମିତି କିଛି କଥା ଭାବି ବିଷ ପିଇ ଆତ୍ମହତ୍ୟା କରିବାକୁ ଚରମ ନିଷ୍ପତ୍ତି ନେଇଥାଇପାରେ ଏ ଅସହାୟ ମାଆ ଜଣକ । ବୟସ ହେଲା ପରେ ପୁଅବୋହୂ ଯେତେବେଳେ ଅଣଦେଖା କଲେ, ସେତେବେଳେ ସେମାନଙ୍କ ପାଖରେ ଆତ୍ମସମର୍ପଣ ନକରି ଆତ୍ମହତ୍ୟାର ବାଟ ବାଛିନେଇଥିଲେ ଏ ବୁଢିମାଆ । ଆଉ ଇଏ ହେଉଛି ଆତ୍ମହତ୍ୟା ଉଦ୍ୟମର ଆଖିଭିଜା ଚିତ୍ର ।
ବରଡା ପତ୍ର ପରି ହାତ ଥରୁଛି, ଆଖି ଭିତରକୁ ପଶିଯାଇଛି । ଆଉ ନିସ୍ତେଜିଆ ଶରୀରକୁ ମେଡିକାଲ ଶଯ୍ୟାରେ ଶୁଆଇ ଆଖିରୁ ଲୁହ ନିଗାଡୁଛି ଏ ପରିତ୍ୟକ୍ତା ମାଆ । ସ୍ୱାମୀ ମଲା ପରେ ସୋର ସାଣ୍ଟାପଡା ଗାଁର ୮୦ ବର୍ଷୀୟା ଏ ବୃଦ୍ଧାଙ୍କୁ ପୁଅମାନେ ପଚାରୁ ନାହାନ୍ତି । ୩ଟି ପୁଅ ଏବଂ ୪ଟି ଝିଅ ଥାଇ ବି ଏ ବୁଢିମାଆ କଥା କେହି ବୁଝୁନଥିବା ସେ ଅଭିଯୋଗ କରିଛନ୍ତି । ତେଣୁ ଅଶାନ୍ତିର ଅନ୍ଧାରରେ ରହିରହି, ଭୋକ ଉପାସର ଜଟିଳ ଗଣିତ ସମାଧାନ ନହେବାରୁ ଜୀବନକୁ ସମାଧି ଦେବାକୁ ସେ ଆତ୍ମହତ୍ୟା କରିବାକୁ ବିଷ ପିଇଛନ୍ତି ।
ତେବେ ବୃଦ୍ଧା ଜଣଙ୍କ ଆତ୍ମହତ୍ୟା ଉଦ୍ୟମ କରି ଗୁରୁତର ହେବା ପରେ ତାଙ୍କୁ ସୋର ମେଡିକାଲ ନିଆଯାଇଥିଲା ଆଉ ସେଠାରେ ତାଙ୍କର ଚିକିତ୍ସା କରାଯିବା ସହ ପାଖରେ ଥିବା ରୋଗୀଙ୍କ ସମ୍ପର୍କୀୟମାନେ ଏ ଅସହାୟ ବୃଦ୍ଧାଙ୍କ ସେବା କରୁଛନ୍ତି । ଯଦି ପୁଅ ବୋହୂମାନେ ବୃଦ୍ଧା ମାଆର ସେବା କରି ଥାନ୍ତେ ତେବେ ସେ କଣ ଆଜି ଆତ୍ମହତ୍ୟା କରିବାକୁ ନିଷ୍ପତ୍ତି ନେଇଥାନ୍ତା ? ବୟସ ହେଲା ପରେ ମାଆକୁ ଯେଉଁ ପୁଅମାନେ ପର କରି ଦେଇଛନ୍ତି ସେମାନେ ବି ଦିନେ ବୃଦ୍ଧ ହେବେ ? ଆଉ ସେତେବେଳେ ମାଆକୁ ଦେଇଥିବା ସେ ଯନ୍ତ୍ରଣା କଥା ମନେ ପଡିବ ତ ?