କନକ ବ୍ୟୁରୋ : ଗାଁରେ ଖୁସିର ମାହୋଲ । କିଏ ଖୁସିରେ କୋଳେଇ ଧରୁଛି ଅନ୍ୟ କିଏ ଖୁସିରେ ବୃଦ୍ଧାଙ୍କୁ କାନ୍ଧରେ ଟେକି ଧରୁଛି । କାହିଁକି ବା ନହେବ । ୩୦ ବର୍ଷ ପରେ ନିଜ ଜନ୍ମମାଟିକୁ ଫେରିଛନ୍ତି କପିଳ ସାହୁ । ପରିବାର ଖୁସି କହିଲେ ନସରେ । ଦୀର୍ଘ ବର୍ଷ ହେବ ନିଜ ପରିବାରଠୁ ଦୂରରେ ରହିବା ପରେ ଏବେ ନିଜ ଘରକୁ ଫେରିଛନ୍ତି । କପିଳଙ୍କୁ ଦେଖିବାକୁ ଲୋକେ ଘର ଆଗରେ ଗହଳି ଲଗାଇଛନ୍ତି । ଦେବଗଡ ଜିଲ୍ଲା ତିଲେଇବଣୀ ବ୍ଲକ ବଡଛାପଲ ପଂଚାୟତ ମାକରମୁଣ୍ଡା ଗାଁରେ ଦେଖିବାକୁ ମିଳିଛି ଏହି ଘଟଣା ।

କାମ ପାଇଁ କପିଳ ୧୯୯୨ ମସିହାର କାମ ପାଇଁ ବାହାର ରାଜ୍ୟକୁ ଚାଲିଯାଇଥିଲେ । ଅର୍ଥ ରୋଜଗାର ନିଶାରେ ପରିବାର ଛାଡି ରାଜଗାଙ୍ଗପୁର ଓ ପରେ ଛତିଶଗଡ, ମଧ୍ୟପ୍ରଦେଶ ରାଜ୍ୟରୁ ରାଜ୍ୟ ଘୁରି ବୁଲିଛନ୍ତି । କାମ ପାଇଁ ୩୦ ବର୍ଷରୁ ଅଧିକ ସମୟ ନିଜ ସ୍ତ୍ରୀ ,ପିଲା ଛୁଆ ତଥା ସମ୍ପର୍କୀୟଙ୍କ ଠାରୁ ଦୂରେଇ ରହିଛନ୍ତି । ବାହାର ରାଜ୍ୟରେ କାମ କରି ନିଜ ପେଟ ପୋଷୁଥିଲେ । କିଛି ଟଙ୍କା ସଂଜୟ ପରେ ତାଙ୍କର ପରିବାର କଥା ମନେ ପଡ଼ିବାରୁ ଏବେ ଘରକୁ ଫେରିଆସିଛନ୍ତି । ନିଜ ଗ୍ରାମ କୁ ଫେରିବା ପରେ କପିଳ ଘର କୁ ପହଂଚି ବଡ ପୁଅ ଲକ୍ଷ୍ମଣ ସମ୍ପର୍କରେ ଘରେ ଥିବା ବଡ ବୋହୁ ଙ୍କୁ ପଚାରିଥିଲେ ପୁଅ ବାହାରେ ଚାକିରୀ କରୁଥିବା ଜଣିବା ପରେ ସ୍ତ୍ରୀ ସରସ୍ୱତୀ ସମ୍ପର୍କରେ ପଚାରିଥିଲେ ।ତେବେ ସ୍ତ୍ରୀ ଅଙ୍ଗନୱାଡିରେ କାର୍ଯ୍ୟ କରୁଥିବା ଜାଣିବା ପରେ ସ୍ତ୍ରୀ ଙ୍କ ଆସିବା ବାଟ କୁ ଚାହିଁ ବସିଥିଲେ । ଦୀର୍ଘ ବର୍ଷ ଧରି ବିଚ୍ଚେଦର ଦୁଃଖ ଓ ହଜିଥିବା ସ୍ୱାମୀ କୁ ସମ୍ମୁଖରେ ପାଇବାର ଆନନ୍ଦରେ ସ୍ତ୍ରୀ ସରସ୍ୱତୀଙ୍କ ଆଖିରୁ ଝରି ପଡ଼ିଥିଲା ଲୁହ ।

ଦୀର୍ଘ ୩୦ ବର୍ଷର ବିଚ୍ଚେଦ ପରେ ଘର ବାହୁଡା ରେ ସେଦିନର କୁନି ପିଲା ଆଜି ବିବାହିତ ହୋଇ ନିଜ ବାପା କୁ ପାଇ ଖୁସିରେ ଜାବୁଡି ଧରି ନିଜ ଅତୀତକୁ ମନେ ପକାଉଛି । ସେହିପରି ଘର ବାହୁଡା ଦେଖି କପିଳ ଙ୍କ ପରିବାର ଓ ବନ୍ଧୁ ବାନ୍ଦବ ଓ ଗ୍ରାମବାସୀ ତାଙ୍କୁ ଦେଖା କରିବାକୁ ଘର କୁ ଆସୁଥିବା ଦେଖିବାକୁ ମିଳିଛି ।